قازىرگى ورنىڭىز:ولەڭدەر مەن جىرلار » تولىق مازمۇن

قاجى بايان

قوسىلعان ۋاقىت:2016-03-01كورىلىمى:加载中

ءبيسمىللا ءسوز باستايىن اۋىزعا الىپ،
وزىڭە سيىنامىن جاپپار حالىق.
سالاۋات راسۇلىڭە بولسىن اللا
سيىنعان ءبىر وزىڭە مەن ءبىر عارىپ.

راسۇلگە سالات سالەم اسحاپ ءالي،
ابۋباكىر، عۇمار مەن عۇسمان، عالي.
ريزۋان اللا عالايىم بارشاسىنا
قۇدايىم راقىمەتىنە السىن ءانى.

ءيا، اللا راسۇلىڭە سالات سالەم،
پازىلىڭە ۇممەتىڭدى العىل تامام.
ريزۋان اللا عالايىم بارشاسىن دا
جارىلقا پازىلىڭمەن يا راحىمان.

ءيلاھي ساعان جىلاپ قالام الدىم،
تاۋەكەل بار ءىسىمدى ساعان سالدىم،
جارانلار، اتىم اقىت، موللا ءتايىپ
جاسىمدا وتىز توعىز مەككە باردىم.

جاراتتى جەر مەن كوكتى جاپپار كارىم،
تاراتىپ بارلىعىنا مۇقۇلىقتارىن.
كورسەتكەن كوپ عاجايىپ بۇل جاھاندا
ىسىنە قۇدىرەتتىڭ قايران قالدىم.
سۇراساڭ اتام قازاق، كەرەي زاتىم،
كورگەن جول تاماشالاپ جازعان حاتىم.
التايدا ءۇلىمجى ۇلى مەنىڭ ءجونىم،
ءتايىپ دەپ ءباداۋيلار قويعان اتىم.

التاي تاۋ، اباق كەرەي، ءجايىر، ساۋىر،
مۇحتادىل جازى - قىسى، كۇزى ءتاۋىر.
ءار جەردە مەشىت پەنەن مەدرەسە بار،
ەلىمىز ساحارادا كوشپەندى اۋىل.

ءۇش جۇزدەن اباق كەرەي ءوردى الدى،
وزگەسى روسسيادا كەيىن قالدى.
جالاڭاش شاشتى ءاز بابا دۇعاسىمەن
جاعالاپ التاي تاۋعا اباق باردى.

بيلەگەن كوگاداي گۇڭ اباق ەلدى،
ەجەن حان ەل سۇراۋعا تاڭبا بەردى.
بالاسى اجى تورە، گۇڭ قاسىمقان
جەڭىسقان زامانىنا جاڭا كەلدى.

جاباعى، سامەن تورە، قوجامجار،
دۇسپانى زامانىندا بولماعان پار،
باتىر سامەن، ەر وتكەن جاڭگىر تورە
ءبارىن دە ۇلىقتىقتان ءبىر نىسان بار.

التايدا قازىرەت اتاڭ ۇلىق ءپىرىم −
مۇحاممەت مومىن ەشەن جارىقتىعىم.
جاھاننان عازەز ەرىم ءوتىپ كەتتى،
ارۋاعى سول ەشەننىڭ ءمادات قىلىڭ.

كەرەيگە جەتپىس جىلداي تاعىلىم جايعان،
تىلەگەن تاۋپيق بەر دەپ ءبىر قۇدايدان.
قاسيەتى ءوز تۇسىندا بولعانى ايقىن
كەم بولماي شىراعى ونىڭ تۋعان ايدان.

كەرەيدە كوركەن، توپان، يەيسەمبى ءبي،
جۇرت جيىلىپ ءبارى كورگەن سىباعا، سي.
قۇلىبەك، ناشىن بيلەر، جۇرتپاي مىرزا
بيلەگەن اربىرەۋى مىڭ - مىڭنان ءۇي.

جانىبەك جانتەكەيدەن شىققان ەرىم،
ابىلاي حانعا سەرىك بولعان كەمەڭگەرىم.
بوتاقارا تىنىبەك، اقتاي، بوزتاي
ويلاعان تۇپتەن تارتىپ كەمەڭگەرىم.

ءمايتى ءبي، تىلەۋلى ءبي، باتىر كوبەش،
بايبوسىن شەشەندىكتەن بەرگەن ەمەس.
التايدان جوڭعارلاردى جۇنشە ءتۇتىپ
بارلىعى زامانىندا قىلعان ەگەس.

بۇل كۇندە كەرەيدەگى ءمامي ەرىڭ،
ويلاعان تۇپتەن تارتىپ كەمەڭگەرىڭ.
ءومىش قاجى، وسپان ءبي جادىگىندە
قايراتتى، قايىسپايتىن اسقار بەلىم.

ەر ەدى اعايىندى باپى - سارى،
باپىلار ەسكى كوزدەن تۇرعان كارى.
عابدوللا امبى بالاسى زاكاريا
ماقتايدى بەدەلدى دەپ ەلدىڭ ءبارى.

بيلەگەن وسى ادامدار كەرەي ەلىن،
يە بوپ، مەكەن ەتىپ التاي جەرىن.
مەركىتتىڭ تياناعى جاكە ۇكىرداي
ءسوز كەلسە بوگەلمەيتىن قۇلا كەرىم.
مولقىدا جۋانقان ءبي قوبدا تاراپ،
كەڭ ويلاپ، تۇپتەن تارتقان كارى ماناپ.
جىلقىشى مەن ءبىتىمشى، مۇرىندىقتار
ءبىراز جىل بەرەكەگە تۇرعان قاراپ.
بالاسى جىلقىشىنىڭ سۇگىرباي ءبي
اتتارىن شونجارلاردىڭ جازدىم ساناپ.

تارى ءبي ءور جانتەكەي تياناعى،
مەكەندەپ ءور التايدى ۇيالادى.
بۋراتاي سارباستاعى بەلدەمشە ۇلى
قولباڭدى بىرىكتىرىپ سۇراماعى.

مامىربەك ءجايىرداعى ەل يەسى،
وسىلار كوگادايدىڭ نەمەرەسى.
كوگاداي ابىلاي حاننىڭ① ۇرپاعى ەكەن
كەلەدى جەلىلەسىپ حان جۇيەسى.

مامىربەك قاجى، تورە ءجايىر ەلدىڭ،
ساپاردا قاجى بارعان بيىل كوردىم.
از عانا ەل مەن جەردى بايان ايلاپ
جارانلار، ساپار جولعا ەندى كەلدىم.

* * *

قوبدادا بوتاقارا باردام مىرزا،
جان ەكەن باعى وسكەن جىلدان - جىلعا.
اباقتىڭ ۇرپاعىمىز اتام قازاق
ايتايىن ەگجەيىمدى عايىپ قىلما.
باردامدا بالا وقىتىپ از جىل تۇردىم،
كوڭىل قوش ويناپ - كۇلىپ ءومىر ءسۇردىم.
بالاسى سولتەكبايدىڭ لايىق اعا
سول كىسىمەن كىرشىكسىز دوس بوپ ءجۇردىم.

بۇل دۇنيە بايانى جوق ءتۇبى جالعان،
دۇنيەدە تاۋسىلمايدى مۇڭ مەن ارمان.
ەلدەگى باسالقانىڭ اقىلىمەن
قوبدادان سەگىز كىسى قاجى بارعان.

ويلادى لايىق مىرزا قاج بارسام دەپ،
پارىزدى ورىنداۋدان قالماسام دەپ.
جازامىن كەيىنگى جاس ازاماتقا
تاريحىن قاجىلاردىڭ جالعاسام دەپ.

لايىققا ەلدىڭ قويعان اتى باتا،
قامدانعان وسى جولعا مالىن ساتا.
اجىنتايدىڭ بالاسى سايىر مىرزا
ول دا جۇرمەك داۋلەتتىڭ ءدامىن تاتا.

ءدوڭتاي ۇعىلى قانجار بار بالا قاجى،
ول داعى قامدانىپ ەد وسى جازى.
بەت قويدى بارلىعى دا بۇل ساپارعا
كوپ ەلدىڭ ىلەسپەدى داۋلەتى ازى.

مولقى ورازبەك، سۇلەيمەن ەكى جىگىت،
بۇل دا ءجۇردى شاريعات ءسوزىن ۇعىپ.
جاستاباننان قويباعار كارى ءجۇردى
بەيشارا ءبىر اۋىلدان جالعىز شىعىپ.

شىبارايعىر اقىمبەك زاڭگى ءجۇردى،
كارى ەدى قالدى دەرلىك از عۇمىرى.
ول دا اللانىڭ پارىزىن وتەمەككە
جانىنان اللا ءامىرىن ءماندى ءبىلدى.

قاجىلار سەنبى كۇنى ۇيدەن شىقتى،
وتەۋگە قاجى پارىز اۋىر جۇكتى.
قول قىسقا ەشنارسەنىڭ ءمانى بولماي
ويدا جوق بارام دەگەن ءسىرا ءتىپتى.

قاجىلاردى شىعاردى ەلدىڭ ءبارى،
بالا - شاعا، جاماعات، جاس پەن كارى.
ەكىتالاي كورىسۋ بول زاماندا
شەكتەن استى بۇلاردىڭ قىلعان زارى.

ۇسىگەننەن بۇلارعا جۇرت قوشتاستى،
قازا جەتسە كەتكەنى ورالماس - تى.
بالا - شاعا، ەل - جۇرتقا قوش ايتىسىپ،
سايىر، قانجار كوزىنەن توكتى جاستى.

ۇسىگەننەن قوش ايتىپ قايتتى باردام،
اقجول تىلەپ اماندىق ايتىپ قالعان.
ساقسايعا بارىپ ءبىراق قوش ايتپاق بوپ
مەن قايتپادىم ىلگەرى بارعانداردان.

بىلگەن جان بولعان با ەكەن تاعدىردى ءوزى،
عاجاپ قوي باسقا كەلگەن الۋان كەزى.
كەتەر مە ەستىگەننىڭ قۇلاعىنان
جىلاعان قازىكەيدىڭ زارلىق ءسوزى.

سول كۇنى ءدال ساقسايعا قوندىق بارىپ،
كوپ جۇرت مەنى ءجۇر دەدى اۋىزعا الىپ.
سول جەردە جۇرەيىن دەپ ايتىپ سالدىم،
نە بەرەكە تابام دەپ توپتان قالىپ.
كوپ قالاۋى كەلمەك بوپ قاجى بارىپ،
بەل بۋدىم شىقپاسام دا دايىندالىپ.
جالعىز - اق ەل - جۇرتىما قوش دەمەدىم،
وسى جەرىم بولدى عوي ۇلكەن زارىق.

قوش دەپ بارىپ قايتۋعا ۋاقىتىم تار،
عارافاعا جەتە الماس حاۋپىمىز بار.
اۋىلىم الىس قوشتاسپاي اتام قالدى،
مەن پاقىرعا بولاگور ءبىر اللا جار.

جارانلار، تىڭدا مەنىڭ ءمان - جايىمنان،
ءدام ايداسا ساپار جول قالمايدى جان.
بالا - شاعام تاپسىردىم ءبىر قۇدايعا،
ءبىر سيپاماي كەتىپ - ەم ماڭدايىنان.

بارامىز ساپار شەگىپ الىس جەرگە،
قۇدايىم كەز قىلماسىن قايعى - شەرگە.
اتامىزعا ءبىز ءۇشىن رۇقسات سۇراپ،
كۇدەرى اعا، باراگور ءبىزدىڭ ەلگە.

موللا سىدىق، كۇدەرى وعان بارسىن،
بالاڭا دۇعا قىل دەپ حابار سالسىن.
بۇل جولعا ناقتاپ رۇقسات الماپ ەدىم،
ەل - جۇرتىم ريزا بوپ، قوش بوپ قالسىن.

اعايىن، قاتىن - بالا ارتتا قالعان،
قوش ايتىسىپ كەتپەگەن اۋىر ماعان.
قايتا الماسام ءبارى دە امان بولسىن
تۇگەلدىكپەن بولماعان مىنا زامان.

تاۋەكەل دەپ جونەلدىك جولعا ءتۇسىپ،
كوڭىل شىركىن تىنبايدى ءىشىم پىسىپ.
بايتوللا، راسۇل اللا نۇرى تارتىپ
توقتاتپاس قاجىلاردى الىپ ۇشىپ.

دۇيسەنبى كۇن اتتانىپ بەيسەن باردىق،
قاجى باتەگەن ۇيىندە رازىلىق الدىق.
وسى كۇننىڭ ەرتەڭى رامازان،
بەيسەنگە سول كۇن بارىپ قونىپ قالدىق.

تاڭەرتەڭ ءبىز اتتاندىق ورازا تۇتىپ،
امىرگە كىم رەنجىر قاباق شىتىپ.
اۋباكىر اكەپ سويىپ ەكى قويىن،
بەيشارا توي قىپ جاتىر قاتتى كۇتىپ.

تاڭەرتەڭ ۇلجان قالدى امانداسىپ،
اتاسى ءۇشىن قيا الماي زار جىلاسىپ.
شەرۋشى اتاڭ① ادامى ول دا قايتتى
قاجىلارمەن قوشتاسىپ ماۋقىن باسىپ.

تومپىش بالا جىلايدى اتاسىنا،
تومپىش تۇر عوي ەل جىلار باتاسىنا.②
پەندە شىركىن قىلادى نەشىك شارا
اللا شاتلىق بەرمەسە قاپاسىنا.

ونان قوندىق قوزىكە اۋىلىنا،
قاراڭدار تۋعان ءىستىڭ تاۋىرىنە.
عۇبايدوللا اقىل قىپ كوپ ءسوز ايتتى،
بەيشارا جانى اشىپ باۋىرىنا.

ۇيعۇرعا بارىپ قوندىق ونان كوشىپ،
ءبىز دە ءجۇرىپ كەلەمىز اللا دەسىپ.
ونان شىعىپ قالۋتۇن بارىپ قوندىق
جۇماعا ەرۋلەدىك جۇكتى شەشىپ.
قالىڭ كوش، قالىڭ توپپەن تۇكتى بىلمەي،
كوڭىل شىركىن بارادى جەلدەي ەسىپ.

ونان شىعىپ ءبىز قوندىق شىندىعاتاي،
اياعى ۇلكەن وزەن قالىڭ التاي.
كوكىدابا، سامانعا ونان قوندىق
وزىپ كەتتىك تۇيەمىز كەلسىن دەپ جاي.

ونان شىعىپ كەپ قوندىق سارىمساقتى،
اقشا، ساۋدا بىتىردىك الىمساقتى.
سارسەنبى، بەيسەنبى كۇن ەرۋ بولىپ
جۇما كۇنى ويلادىق جۇرەر جاقتى.

جۇما كۇنى جونەلدىك قۇدايىم دەپ،
سەنەن جاردام قۇدايا سۇرايىن دەپ.
جەنتىباي، ساقاريا، ءابىش بالا
سول جەردە كوپ جىلادى ۋايىم جەپ.

ول جەردە تيىلمادى كوزدىڭ جاسى،
كوپ جىلاسا بولادى پەندە عاسي.
ارباشى مىنگىزىپ اپ جونەلگەندە
مۇساپىرلىك تارتادى ادام باسى.

امانداستى ءمۇزاپبار، قاجى قۇمار،
ەر قادىرىن بىلەتىن جىگىت بۇلار.
حات جازىپ سالەم ايتتىق تۋعان ەلگە
امانداسپاي كەتكەننىڭ ارتى مۇنار.
بايتوللا، راسۇل اللا ەكى حارام
ولارعا امان بارساق كوڭىل تىنار.
ونان باردىق قاراتاي جاقسىبايعا،
شىققان كۇنى كەز بولدىق وسىندايعا.
رامازاندا قوندىرماي اۋرە قىلدى،
وسىمەن جاعاما ەكەن ءبىر قۇدايعا.

ونان شىعىپ كوبەگەن قوندىق بۋرا،
نارىنقول كۇنباتىسقا جۇردىك تۋرا.
قىزىلجارعا ءبىز باردىق ەرتەڭىندە،
ءتورت اربا اپ، قىرىق بەس سوممەن باردىق مۇندا.

ونان باردىق مويىلتى بەكەتىنە،
بەكەت سايىن ون ءۇش سوم زەكەتىنە.
قار جاۋىپ اربا جۇرمەي كوپ قينالدىق،
قاراڭدار مىنا جولدىڭ كەسەتىنە.

ونان شىعىپ تەسىكتاس، كوكقوي باردىق،
كەمە جوق قاربىز توسىپ جاتىپ قالدىق.
تاۋىنان اربا جۇرمەس جولى قيىن
ول جەردە بەس - التى كۇن تۇرىپ قالدىق.

ورىستىڭ پاتەرىندە جاتتىق قاراپ،
تىنىش كەتتى قاندالا، بۇرگە تالاپ.
جول توقتالىپ، عارىپتىق باسقا ءتۇسىپ،
كۇن سايىن جۇدەي بەردىك اتتاي جاراپ.

سول جەردە تۇسكە كىردى قالعان شالىم،
كورىنىپ ءبارى بىردەي ەل - جۇرتتارىم.
اپىرىم - اۋ، رازىلىعىن بەرسە ەكەن دەپ
نەشە كۇن بولىپ ءجۇردى كوڭىل جارىم.

التايدا رۋىم كەرەي، قازاق ەلىم،
مەنى ويلاپ جۇدەپ ءجۇر مە اتام مەنىڭ.
بۇل جولدا ۋاقىت جەتسە نە بولامىز
ايلانىپ امان - ەسەن بارسام كورىم.

اتامنان كەتىپ ەدىم رۇقسات الماي،
مۇنى ويلاسام كەتەدى سابىرىم قالماي.
بايتوللا، راسۇل اللا ەكى حارام
پاقىرىڭ شىدامايدى سوعان بارماي.

كەرەيدە حازىرەت اتام ۇلىق ءپىرىم،
مۇحاممەت مومىن ەشەن جارىقتىعىم.
كەرەيگە دۇعاڭ تيگەن قورعان ەدىڭ،
قابىرىڭا بارا الماستان كەتكەن ءمىنىم.

قۇدايا ءبىر وزىڭە تاۋبە قىلدىم،
ماعلۇم دۇر وزىڭە ىشكى سىرىم.
قازاقتا ون ەكى اباق كەرەي ەلى،
التاي، ساۋىر، قوبدادا تۇرعان جەرى.
سول ەلدىڭ بارشاسىنا تاعىلىم جايعان
مۇحاممەت مومىن ەشەن ءدىننىڭ كەنى.

كەرەيگە ول جەتپىس ءۇش جىل تاعىلىم جايعان،
تىلەگەن تاۋپيق بەر دەپ ءبىر قۇدايدان.
ول ەشەنگە ىقىلاس قىلعان ادام،
ءىنشا اللا جوق شىعار جولدان تايعان.

قازىرەت اتام جەتى جول قاجى جۇرگەن،
كاراماتىن اقىلمەن سۇلتان بىلگەن.
قوناقتىققا شاقىرىپ اتامىزدى
اتامىز ستامبولعا نەشە كىرگەن.

سيلاعان كالام ءشارىپ اتامىزعا،
جاقسىنىڭ قادىرىن ەلگە ساتامىز با.
موي مۇباراك بەردى دە دۇعا ءوتىندى
تاقسىرىم قۇمارمىز دەپ باتاڭىزعا.

وسى كىسى ەلىمىز تياناعى،
تالاي جانعا جاقسىلىق ۇيالادى.
كوز كورىپ، قۇلاق سەزگەن بۇل زاماندا
ەشكىمدى پاتشا مۇنداي سيلامادى.

سول كىسى ەد ەل اتاسى تاقسىر ءپىرىم،
جارانلار، حاتقا سالعان بارلىق شىنىم.
جاھاننان عازەز ەرىڭ ءوتىپ ەدى
عازەزدىڭ رۋحى بىزگە ءمادات قىلىڭ.

جول ءجۇرىپ جاھان كەزگەن عارىپ بولار،
جۇمىسسىز جول كۇزەتسەڭ زارىق بولار.

جارانلار، بەينەت بولماي داۋلەت قونباس
پەندەگە ۇنەم راقات اركەز بولماس.
جامان ولسە جاقسىمەن بىلىنبەيدى
ون جامانمەن ءبىر جاقسى ورنى تولماس.

كوكقويدا بەس كۇن جاتتىق قاربىز توسىپ،
قىرعا شىعىپ جۇرەمىز ۇيدەن شوشىپ.
قۇدايىم اقىرىنا قايىر بەرگىن
جاقسى ورىندى كورسەتىپ ەلگە قوسىپ.


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428