قازىرگى ورنىڭىز:ولەڭدەر مەن جىرلار » تولىق مازمۇن

ءمىناجات (تىلەك)

قوسىلعان ۋاقىت:2016-03-01كورىلىمى:加载中

اينالايىن قۇدايىم،
ءمىناجات قىلىپ جىلايىن،
وزىڭنەن قۋات سۇرايىن.
ءمۇساپىر بولدى قاجىشىلار
سالاماتلىك باعىشلا
بەرە كورمە ۋايىم!

تاۋبە قىلىپ ءيا اللا،
قۇلىڭ ساعان قارادى.
وزىڭنەن قاجات تىلەرگە
بايتوللانى ىزدەپ بارادى.
راسۇلىڭ مۇحاممەد
سەلسىلام سونى قىلارعا
جۇرەككە ماككام الادى.

ون سەگىز مىڭ عالامدى،
جاراتقان ءوزىڭ بار قۇداي.
ءبىر ءوزىڭنىڭ حۇكىمىڭا،
قاراتقان ءوزىڭ بار قۇداي.
بىزلەرنى جەرگە جۇرگىزىپ،
بىرلىگىڭنى بىلگىزىپ
تاراتقان ءوزىڭ بار قۇداي.
عارىپ بىلەن مىسكىنگە
جاردام بەرگەن بار قۇداي.
نىعىمەتىڭنى ساتپاستان
ارزان بەرگەن بار قۇداي.
تىرشىلىگىن عالامنىڭ
جاننان بەرگەن بار قۇداي.
جان ساقتاۋىن ادامنىڭ
مالدان بەرگەن بار قۇداي.

مۇحاممەدتى جاراتىپ،
دوسىت قىلدىڭ وزىڭە.
مۇحاممەدتىڭ قۇرمەتى
جاس تولتىردىم كوزىمە.
راحىم ايلا جاساعان
ءمىناجات قىلعان سوزىمە.
ءيا، قۇدايا رازى بول،
بەتىمىز قويدىق جولىڭا.
راسۇل اللا مۇحاممەد
ساللا اللاھۇعالايى ۋاسسالامنىڭ جولىنا.
ماقساتقا تولىق جەتىسىپ
سالاماتلىك ساپارى
بىزلەرگە ءناسىپ بولار ما؟!

ءيا، راسۇل اللا مۇحاممەد
ۇممەتلەرىڭ جىلادى.
قۇرمەتىڭە جالىنىپ،
شاپاعات جاردام سۇرادى.
ماداتكار بول راسۇلىم
ءلاتيف بولسا وزىڭنەن
اللا راحىم قىلادى.

ابۋباكىر، ءيا عۇمار،
عۇسىمان، عالي ول حايدار.
ادام اتا ھام بارشا
ءمۇرسال ءنابي پايعامبار.
قۇرمەتىندە سولاردىڭ
سالاماتلىك بەر جاپپار.
رازى بولىپ ءيا اللا،
قابىل ايلا جولدى وڭعار.
قۇرمەتىنە سولاردىڭ
جارىلقاعىل ءيا عاففار.
مارحامات بولىپ اللادان،
جاميح ارۋاق، انبيە
رۋحلارى بولعاي ماداتكار!

جارانلار، ءبىز كەلەلىك جولىمىزعا،
قار جاۋىپ جول توسىلدى سورىمىزعا.
كوكقويدان التىنشى كۇن قاربىز ءجۇردى
كۇن ءوتتى ءبىرسىپىرا سونىمىزعا.

قاربىزبەن دومعا كەلدىك سۋمەن اعىپ،
پاۋەسكەگە وتىردىق ءبىر ات تاعىپ.
ءبىر كۇن تۇرىپ ەرتەڭى ءجۇرىپ كەتتىك
كۇن تيسە كەشىگەمىز مۇندا ناعىپ.

ءتورت اتتى اربا جالدادىق سەكسەن سومعا،
ەكى ءجۇز شاقىرىم جەر ەكەن سەمەي دومعا.
اراعا ەكى قونىپ ءجۇرىپ كەتتىك،
قاراماي اسىعامىز وڭ مەن سولعا.

سەمەيگە بۇرىن كەلىپ كورمەپ ەدىك،
ەشقايسىمىز ساۋدا ءۇشىن كەلمەپ ەدىك.
قارا جاقىپ بالاسى ىبىراي، ءداۋىت
سولاردى ءبىر كورۋگە ىزدەپ ەدىك.

ىبىرايقان جوق، تابىلدى ءداۋىت ۇيدەن،
ءبىر جان ەكەن سىعاندىق جەكە تيگەن.
ۇيىنە قوندىرماستان قۋىپ سالدى
ەلگە بارسا كەم ەمەس تورە - بيدەن.

ەلىمىزگە بارعاندا ءبارى تورە،
تورەمىز دەپ وتىرار قوسشى نەمە.
رامازاندا جىبەردى ورىسقا ايداپ
جارانلار، ەستىگەندى دوسىم دەمە.

ەرتەڭىندە جولىقتى ىبىرايقان،
قادىرلەپ جايدى بىزگە كەڭ داستارقان.
جولعا سالىپ شىعاردى مەيمان ەتە
وسىنداي ءبىر ءمۇلايىم بەك عازەز جان.

سەمەيدە ەكى - ءۇش كۇن ەرۋ جاتتىق،
بۇيىرعان ءبىر اللانىڭ ءدامىن تاتتىق.
ات جالداپ اقتاس قالا كەلدىك تاعى
ونان سوڭ ىلگەرى اتقا مىنە شاپتىق.
الدا بار تورە باسشى، كەرەي قاجى
سەمەيدەن تەلەگرامما ومبى قاقتىق.

ونان شىعىپ ءبىز باردىق كەرەكۋگە،
تاۋەكەل دەپ توقتاماي كۇندىز - تۇنگە.
ونان شىعىپ جونەلدىك توقتاماستان
جۇمىسسىز جاتامىز ءبىز ءسىرا كىمگە.

سەمەيدەن التى تاۋلىك ومبى باردىق،
ساۋ بولسا بىلىنبەيدى كورگەن تارلىق.
مامىربەك تورە ىشىندە كوپ قاجىشىنى
ومبىدان سۇراستىرىپ تاۋىپ الدىق.

ءجايىردان مايتاق، مۇقى ءبارى سوندا،
بارشامىز باس قوستىق وسى جولدا.
مولقىدان التاي بەتتەن كەلگەن كىسى
دودان، زامبى، شوكىمدى تاپتىق سوندا.

التايداعى جادىكتەن جارقاي قاجى،
اتالاسقا وتەدى ادام نازى.
بارعان قاجى اتتارىن مەن جازايىن
ءبىلىنسىن بارعانداردىڭ كوپ پەن ازى.

جانە بار وسى جولدا قاجى تەرلىكباي،
جاناتتان ۇزبەجان مەن قاجى ماڭكىباي.
قايتاردا جولداس بولىپ بىرگە كەلدىم
ءبىلىمدى ەرلەر ەكەن اقىلعا باي.

اسان شال، قۇماق، اپاق جانە اقىمبەك،
جيدادان قايتقان ولار جەر جاقىن دەپ.
ءادىل قاجى ىشىندە دامبىل سوپى
امان - ەسەن قۇرالدىق ءبىرقاتار كوپ.

ءجايىردان قاجى مامىربەك ءارى تورە،
حانىمى بىرگە جۇرگەن قاسىنا ەرە.
بايشەشەك ءبىر قۇلپىرعان ادام ەكەن،
ءبىر اللا باقىت بەرسە قالاي دەمە.

قۇدايىم سۇلۋلىقتى بەرگەن ەكەن،
كەلىستى تۇل بويىنا بىتكەن دەنە.
ازاماتتىڭ قۇنىنا كەلگەن ەكەن،
ايىبى ءۇشىن قىزايدان كەرەي ەلگە.

جاس بالا عۇسىمانبەك قولىنداعى،
باقيعا ءدافىن ەتتىك ونى داعى.
قالتوقان تورە، راقىش باۋىرلارى
تورەنىڭ جولداسى ەكەن جولىنداعى.

بارقى بوزان، دونەنبەك جانە بازار،
ءبىر - بىرلەپ پاقىر اقىت ءبارىن جازار.
ءتىرى قايتقان قاجى بوپ كەلىپ جاتىر،
اقيقاتقا كىم سالدى انىق نازار؟!

شىبارايعىر باباقان ءجۇردى كارى،
قاسىندا مايقايىڭ بار ول ءبىر شالى.
ءبىر جولداس بەيشوراعا كەرەك ەكەن
بالاعا دا كەرەك قوي قالعان مالى.

بوتاقارا كەلباتىر، جامان بالا،
كونساداقتان قۇراق بار جەكە دارا.
اقشاسى از، اتاسى بولسا ناشار
سول ادامنان كەتپەيدى قايعى سانا.

وسى كىسى ءبىر توپتان ءوزى جەكە،
ءارقايسىسى ەتەدى ءبىر كەلەكە.
ازعا زورلىق، السىزگە كۇش كورسەتىپ،
زايا بولىپ كەتپەسىن قايران مەككە!

ەسىرگەپتەن ءمانجىباي مۇندا جۇرگەن،
قايىر، ماناپ، ءبىتىمباي توپقا كىرگەن.
مەركىتتەن بالىقشى ءجۇر ءوزى جەكە
بايىپتى ادام ەكەن حالىن بىلگەن.

شەرۋشى ءداۋىت قاجى ءام سەرىكباي،
ءتىرى قايتىپ كەلگەنى ءبىر شوكەتاي.
اينالاسى الپىستاي ادام ەكەن,
تەگىس تەرىپ جازىلسا ءجايىر - التاي.
ۋاقتان قاجى عابدوللا قاتىنىمەن،
قاسىندا باشىق قاجى جاقىنىمەن.
ءوزىن - ءوزى اڭدىعان ادام ەكەن,
كامىل جۇيرىك، ءبىلىمدى اقىلىمەن.

الپەمىش موللا ءجۇردى بيبيىمەن،
جول قيىن جالعىزعا دا ءبىر جۇرۋدەن.
تىنىشتىقپاي كارى كىسى ول دا ءجۇردى
قاسىنداعى ءابىشتاي ىنىسىمەن.

جالعىز كەپتى ءمۇساپىر جالەل موللا،
بەلگىسى موللالىقتىڭ انىق سوندا.
تۇردىباي دەگەن موللا تاعى بار ەد
مەككەدەن ۇيگە قايتتى وسى جولدا.

مانبازار مەن تاستاعان سامىراتتان،
كۇشىكباي جانتەكەيدەن ءجايىر جاتقان.
ميقان موللا، شىتاي حانىم ول دا تورە
قىزمەتكەر الىپتى ۋاق تاپتان.
جادىك اققوي جايىردان كەلگەن ەكەن
تەرىپ جازساق شىعىپتى ءاربىر تاپتان.

مۇرىننان بوتاقارا دەگەن ءجۇردى،
نەشە جۇرگەن ەر ەكەن اقشا تاپقان.
سۇلتانسەيىت قاشقارلىق ءجۇردى سارتتان
وسىنىڭ دا مىندەتىن تورە① تارتقان.
پايداسى دا زالالدان ارتىق ەمەس
جارايدى ەكەن مىندەتىن قۇدايعا ارتقان.

جول جونىندە بوتاەكەڭ باسشى بولدى،
اقشا كوپتە باسشىمىز جاقسى بولدى.
اۋەل باستا توپ - توپتان اقشانى ۇستاپ
اقىرىندا سول اقشا تاپشى بولدى.

ومبىدا ءبىز قوسىلدىق قالىڭ كوپكە،
كوپپەن جۇرمەي جەكەلەپ جۇرگەن ەپ پە؟
ومبىدا ەشمۇحاممەت ابىلايحانوۆ
قوناق قىپ سي كورسەتتى مامىربەككە.

مامىربەككە مىڭ تەڭگە سيعا بەردى،
تورەلەر ءبىرىن - ءبىرى سيلادى ەندى.
ونان ارى تەمىر جول بولادى ەكەن
پويەز ءمىنۋ كەزەگى تۋعانى ەندى.

پويەزعا وتىردىق ءبىز بەلەت الىپ،
پويەز ءۇستى جەتەرلىك ازىق سالىپ.
ونان ارى اۋىستىق شيلى ارباعا
اۋىسۋ قيىن جۇمىس اۋىق - اۋىق.

ونان ارى ءبىز وتتىك ورال تاۋدان،
ءبارىمىز دە ءدام تاتتىق، كوڭىل اۋعان.
ءدال وسى كەز بولسا دا جەلدى ايى
ورالدىڭ قىسى ءتۇسىپ، قارى جاۋعان.
بەيشارا ءمۇساپىرمىز عارىپ بولعان
بەرەگور ءوزىڭ جاردەم ءيا حاننان!

ونان ارى ءبىز وتتىك ۋفا، سامار،
ورتاسىندا ەدىل مەن جايىق قالار.
باسى جاتىر ورالدان كولدەرەڭدەپ
اياعى سۇلتۇستىككە اعىپ بارار.

ەرتەڭىندە پويەزبەن حاركوب باردىق،
قايتا اۋىسىپ كەمەگە ءمىنىپ الدىق.
ومبىدان شىققان بويى توقتالماستان
توعىز تاۋلىك دەگەندە ھادىس باردىق.

ھادىسكە ءبىر كۇن تۇنەپ ەرۋ بولدىق،
اقشا بار اربىرەۋدە جۇرگەن جولدىق.
ەرتەڭىندە ءبىر بافىر جۇرەدى ەكەن
سول بافىرعا سويلەسىپ جۇرمەك بولدىق.

ءسوز تىڭدا كامىل ويلى كارى - جاستار،
پەندەنى ءار نارسەگە ءتاڭىرىم باستار.
مامىربەكتىڭ قوسشىسى سۇلتانسەيىت
تورە سونى جىبەردى بار دەپ باسقار.

ول بارىپ ءجونىن تاپپاي قايتىپ كەلدى،
بافىردىڭ تىعىزدىعىن ايتىپ كەلدى.
نە بولسا دا جۇرەلىك، جاتامىز با
دەپ قاجىلار شىعاردى ابىگەردى.

ون ءتورتىنشى شاۋالدا سارسەنبى كۇن،
جانە توسىپ تۇنەدىك ءدال ەكى كۇن.
ءبىر ادامنىڭ كىرەسى الپىس بەس سوم
بەلەت الىپ جونەلدىك ءدال سەنبى كۇن.

كىرە تولەپ اق بافىر مىنگەنىمىز،
جوق ەدى كەساپاتىن كورگەنىمىز.
ستامپولعا جەتسەك دەپ قۋانىپ ەك
بۇزىلدى جۇرمەي جاتىپ ول كەمەمىز.

اق بافىرعا ەل كىرگەن جارتى اي بۇرىن،
ءولىمى كوپ ايتپاعان بىزگە سىرىن.
سوعان كەز بوپ ءمىنىپپىز امال بار ما
اۋەلدەن جول جۇيەسى بولعان قىرىن.
سىناپقا ءبىزدى اپاردى تەرىس - قاعىس،
جەر ەكەن قيعاش تۇرعان شارشى - الىس.
اپارىپ كارەنتين قىپ قاماپ قويدى،
نەشە كۇن قويداي شۋلاپ قىلدىق نالىس.

كارەنتيندە جيىرما ءۇش كۇن تۇردىق ساناپ،
قۇدايعا زار جىلايمىز قۋات سۇراپ.
ءار كۇنى نەشە جانلار دۇنيە سالدى،
ءار ادام ءوز مۇڭىمەن تۇردى جىلاپ.

ون، ون بەس، جيىرمادان كۇن - كۇن سايىن،
كەز قىلدى كوپ ولىمگە بار قۇدايىم.
كىمدە - كىم ومىرىنەن ءتۇڭىلۋلى
كورۋى ەكىتالاي مەكەن - جايىن.

سىناپتا ءوتتى مۇقى دۇنيە سالىپ،
سالەم ءسوز ەلىنە ايتتى قىلىپ زارىق.
تاپسىردى ءبىر اللاعا اماناتىن
كاليمالاءىي شاھاداتىن اۋىزعا الىپ.

تاعى دا سەرىكباي مەن ءوتتى ءداۋىت،
كۇن كەلسە كىم قۇتىلار ەبىن تاۋىپ.
دايىرباي، مانبازار مەن مۇقى، ءبىتىم
سولار ءوتىپ بولدى عوي ۇلكەن حاۋىپ.

تالاي جان دۇنيە سالدى قالىڭ توپتان،
تۇردىق قوي قاشار جەر جوق امال جوقتان.
قاجىنىڭ بار ازىعىن جيىپ الىپ
دوحترلار وتقا ورتەدى قۇداي سوققان.

اۋرۋ، اشتىق ەكەۋى بىرگە كەلدى،
ستامبولعا كىرمەيسىڭ دەدى ەندى.
كەبىن مەن ازىق - تاماق كەرەك بولىپ،
تىرىلەر اقشانى ارزان بەرە بەردى.

جيىرما ءۇش كۇن دەگەندە كەمە ءجۇردى،
ولگەنى ءولىپ تىرىلەر كەمە ءمىندى.
شىبىنى بويدا كەمەگە كىرگەن جاندار
كورگەندەي سول كۇن مەككە شۇكىر قىلدى.
ستامبولعا تاياتىپ الىپ بارىپ
تاعى ءبىر كۇن كارەنتين سۋدا قىلدى.

ونان تاعى كىرگىزبەي ستامبولعا،
توقتاتسا دا، جۇرسەك تە بولدىق سۋدا.
ءتورت تاۋلىكتە سىناپتان تىنباي ءجۇرىپ
پورت ساعيتقا ءبىز جەتتىك ءسوزىم تىڭدا.

پورت ساعيتقا اينالدىق ءبىراز توقتاپ،
نان ساتىپ جەپ، دامىلداپ، قارىن توقتاپ.
قالعانىمىز قۋ جاننىڭ قامىندامىز،
ولگەندەردى ەسكە الدىق تاعى جوقتاپ.

قارا تەڭىز، اق تەڭىز،... ساب تەڭىز بار،
اق تەڭىزدىڭ ار جاعى قازعان كانال.
كانال قازعان فرانسۋز سۋرەتى تۇر
كانالمەن كەمە ءجۇرىپ ارى بارار.

كانالدان كەشكە جاقىن ءجۇرىپ كەتتىك،
سۋەيشكە ونان ءوتىپ بارىپ جەتتىك.
اق بافىردىڭ عاداتى شاھار كورسە
از تۇرىپ تاعزىم قىلىپ سالەم ەتپەك.

جونەلدىك تاعى ءجۇرىپ ونان ارى،
تاۋسىلماس مۇساپىرلەر كورگەن زارى.
مايتاق، زامبى، اقىمبەك قاريالار
ستامپولدىڭ تۇسىندا ءوتتى ءبارى.
جەرلەيتىن تەڭىز ءۇستى قارا جەر جوق،
كەبىندەلىپ بارلىعى سۋدا قالدى.

مايتاق ايتتى: − كوپ سالەم سۇكىربايعا،
مەن قۇربانمىن، تۋىس ول مەكەن - جايدا.
بالالار ءبارى جاستاۋ قالىپ ەدى
قايتەيىن مەن تاپسىردىم ءبىر قۇدايعا.

كوپ سالەم بايبىشەمە، ىدىرىس بالام،
ەندى الدىنان وڭعارسىن حاق تاعالام.
كىم ءوتىپ دۇنيەدەن، كىم قالمايدى،
ساقتاسىن قالعاندى اللا ەسەن - امان.

زامبى ەكەڭ سالەم دەدى اۋىلىنا،
كەيىنگى قاتىن - بالا، باۋىرىنا.
تاپسىرىپ اركىم جاتىر اماناتىن،
قاراڭلار امانات ءسوز اۋىرىنا.

اقىمبەك سالەم ايتتى كەيىنگى ەلگە،
ءبادال جايىن سەن موللا ءوزىڭ جوندە.
(سول كەزدە ءار ادام ءوز باسىن سۇراپ
قاراي الماس دۇنيەدە ارتىق - كەمگە).

موللا ساعان امانات ايتار ءسوزىم،
بۇيرىقشا مۇنداي بولدى مەنىڭ كەزىم.
اكەم، شەشەم، وزىمە ءبادال قىلىپ
اياماي حاق جولىنا تارقات ءوزىڭ.

وسىنى ايتىپ ءوتتى عوي عازەز جانلار،
شاھيت بولعان ادام دەپ ءبىلىڭ انلار.
اللانىڭ امىرىنەن كىم قۇتىلار
باتىر، باي، قۇتىلماعان پاتشا - حانلار.

سۋەيشتەن كەشىندە كەتتىك ءوتىپ،
ءبىر كۇن، ءبىر ءتۇن ءجۇرىپپىز ونان كەتىپ.
كوكجيەك كورىنبەيتىن كوكشىل تەڭىز،
شىعامىز با جاعاعا امان ءوتىپ.
سۋەيشتەن ازىراق جۇرگەننەن سوڭ
ءباحىر احمار① ايدىنىنا كەلىپ جەتتىك.
قىزىل بوياۋ قوسقانداي قىزىل سۋدى
كورگەندە كورمەگەن جان قايران ەتتىك.
سەنبى كۇن تاڭ نامازدىڭ ۋاقىتىندا
كەمە تولقىپ بارادى ءدۇر - ءدۇر ەتىپ.

شايقالىپ كەمە كەتتى قاتتى تولقىپ،
قيسايىپ بولىپ كەتتى ولپىق - سولپىق.
ادامزات قويداي شۋلاپ يمان ايتىپ
بەيشارا تامام جانلار كەتتى قورقىپ.

قيسايىپ كەمە قاپتى تاسقا توقتاپ،
ادامعا كۇن تۋماسىن سوعان وقشاپ.
مۇندايدان ءتىرى شىعۋ ەكىتالاي
ءار ادام ءوز داۋرەنىن تۇردى جوقتاپ.

سول جەردە جان قالمادى جىلاماعان،
شىن جۇرەكتەن قامىعىپ شىنداماعان.
كۇناسى ءار پەندەنىڭ ەسكە ءتۇستى
اقىل مەن ءناسيحات ءسوز تىڭداماعان.


بەس تاۋلىك كەمە تۇردى سۋدا قاراپ،
قايعىرىپ حالىق تۇردى اتتاي جاراپ.
جيددادان ەكى كەمە كەلدى سوندا
قاجىلار بولماسىن دەپ سۋدا حاراپ.

ءبىز مىندىك جالداپ تۇرك بافىرىنا،
اماندىق بەرسىن اللا اقىرىنا.
سەركەش قاجى ءمىنديلار ورىس بافىر
قويامدى تالاسپايتىن اقىلىنا.

سول جەردە نوعاي مەن سارت، تۇرك تە بار،
سەركەش، حاجام، قىزىلباس بورىك تە بار.
جانە بار ءبىرازداعان قازاق قاجى
جىگىتتەر، مۇنى ايىرىپ ىرىكتەپ ال.

اۋىستىق سول كەمەگە بارشا ادامدار،
تارقايدى ەسەن بولساق قايعى - قامدار.
قايىق ءمىنىپ كۇزەتىپ كەمەلەرىن
سول جەردە تۇرىپ قالدى كاپيتاندار.

جيددادان بارىپ شىقتىق ەسەن - امان،
كەمەگە اقى ساناپ بەردىك تامام.
قۇدايعا نەشە مارتە قىلدىق شۇكىر
شىققان سوڭ زور قاتەردەن ەسەن - امان.
زيارات ەتىپ اۋەلى سوندا باردىق
بار ەكەن قازىرەت ءوممي حاۋا انام.
ەكى دۇنيە ىسىندە شاپاعات قىل
سولاردىڭ قاسيەتى ءۇشىن حاق تاعالام.
ماداتكار بول رۋحى ارداقتى انا
قاسىڭا كەلدى شۋلاپ قانشا بالاڭ.

ەكى حارام مەشىتكە كىرسەم اگار
كوڭىلدەن كەتەر ەدى قايعى - جارام.

جيدداعا ءبىر ءتۇن قونىپ ەرتەڭ جۇردىك،
اقشاعا كىرە جالداپ تۇيە مىندىك.
وتىزىنشى زۇلحاھدا سەنبى كۇنى
مەككەگە ءتاۋاب قىلا بارىپ كىردىك.
اينالىپ ءتاۋاب قىلار بايتوللانى
قادىرىن ءىسلام ءدىننىڭ كامىل بىلدىك.
ءجۇزءسۇرتىپ حاجاراسۋات مۇباراككا
اللاعا ءجۇز مىڭ قايتا شۇكىر قىلدىق.
اينالىپ كورگەن سايىن بايتوللانى
مۇستاحاپ ادەپتەرگە مويىن بۇردىق.
ءزامزام ءىشىپ جۇرگىزىپ ساپا - ءمارۋا
يحرام كيىپ تىنىعىپ از كۇن تۇردىق.

بايتوللانىڭ سىرتىندا مەشىت حارام،
ەسىگى بار حارامنىڭ بابۇسالام.
ىبىراھيمعا جاساتىپ بايتوللانى
قۇرمەتتى ءۇيىم دەگەن حاق تاعالام.
انادان تۋعان كۇندەي كۇنادان پاك
اينالسا ءناسىپ بولىپ بارعان ادام.
ءتورت مازھاپ ءتورت جاعىنان ناماز وقىر
قانشا جان ءمىناجات قىپ تۇرعان تامام.

كۇنشىعىس تارابىندا ءزامزام قۇدىق،
شافيق ناماز قىلعان وندا تۇرىپ.
ماحامى يمام شافيق سونىڭ ارتى
حاتام ديار تۇرعانداي سوعان ءتيىپ.
يمام اعزام مازھابى ورىن العان،
مالىك پەن ءشافيقتىڭ اراسى بار.
ياعني قىبلامىز ەسەپتەلەر
قيىس باتىس وڭتۇستىك اراسى ءدال.
كۇنباتىستا مالىكتىڭ ماحامى بار.
ءدال تۇستىكتە ماحامى حانباليلار.
تۇس - تۇسىنان ادا قىپ بەس پارىزدى
جۇمادا حانيفاعا ۇييدى ولار.

حانيفا مادداح سولتۇستىك تاراپىندا،
حاتام ديار تۇسىنىڭ اراسىندا.

ءتۇرت بۇرىش رۋكۇن عيراق، رۋكۇن شامي،
حاتام ديار سىماعۇل سالعان تامى.
وڭ جاعى حاجاراسۋات − ءجۇز سۇرتەتىن
وسىلار بايتوللانىڭ ءبىر اۋماعى.

سىرتىندا بايتوللانىڭ ۇلكەن قورعان،
سول قورعاننىڭ اتى ەكەن مەشىت حارام.
بايتوللانىڭ سول جاعى حاتام ديار
قاسىندا سىماعۇلدىڭ قۇجىراسى تۇرعان.

بەس قاقپا بار ايلانا بۇل حارامدا،
شىعىس قاقپا اتى ەكەن بابۇسالام.
ەستىدىم بۇل حارامدا ەسىك كوپ دەپ
ادەپ قىلدىم كورۋدەن ءبارىن تامام.

حارامنىڭ ورتاسى اشىق، جانى شاتىر،
تامىنىڭ ءبارى تەسىك اشىق جاتىر.
ادامدار لاببايكا ايتىپ شۋىلدايدى
كوشكەن ەلدەي ءبارى دە اپىر - توپىر.

ءىسلامنىڭ ورتالىعى مەككە جەرى،
تانىعان اھىلى قۇران ءبۇتىن تەگى.
تاۋلارى ءايۇ - قۇبايىس نۇر مەنەن ءسۇر،
مەكەندەپ تۇرعان ونى اراب ەلى.
مۇحاممەد پايعامباردىڭ تەگى سونان
ساناساڭ جيىرما جەتى اتاسىن ناق
عادىنان رۋىنان شىعادى ءوزى.
ونان ارى سىماعۇل ءتۇپ اتاسى
مەككە سول پايعامبارىم تۋعان جەرى.

ونان سوڭ ۇرپاعىنان ون ەكى يمام،
ءبارى دە سول ارانى مەكەن قىلعان.
ايتىلدى جوعارىدا ءتورت مازھابى
كۇن سايىن ءمىناجاتىن قىلىپ تۇرعان...

تىنىعىپ مەككەدە از كۇن تۇردىق تامام،
سول جەردە ناۋقاس بولدى لايىق اعام.
حارامدا ەكى كۇندەي زار ەڭىرەدىم
قۇدايىم قوياگور دەپ جانىن امان.
ەكى ءجۇز سوم شىعاردىم ساداقاعا
جىلاپ - سىقتاپ كەتتى ابدەن مەنىڭ باعام.
اللانىڭ حاق ءامىرى بولعانى عوي
قۇرمەتتى جەرگە جەتكىزدى حاق تاعالام.
قولدان كەلەر ءىس بولسا ايانام با
اجالدان سۇراپ الارعا كەلمەس شامام.
بەرمەسىن ءبىر اللانىڭ تىلەيمىن دەپ
بولدىم با الدە عاسي ءتاڭىرىم ساعان.

وتەر جانعا ەش شارا بولمايدى ەكەن
بەرەگور ارت قايىرىن ءتاڭىرىم ماعان.
جانناتۇل مۇعاللوعا قويدىق جەرلەپ
كورشى بوپ مەككەمەنەن مەشىت حارام.
وتكەنلەرگە سول جەردە ءبادال بەردىك
بولسىن دەپ نۇقسانى جوق قاجى تامام.
ەلجىرەپ ءىشى - باۋىرىم ەزىلدى عوي
قايدا بار مۇنداي جولداس ەندى ماعان؟!

عاراپاعا جاقىن بوپ ەندى كوشتىك،
كۇن ىستىق ماداتكار بول اللا دەستىك.
جەكسەنبى كۇن بەت الىپ عاراپاعا
مۇزداليپا - مينادان وتە كوشتىك.

عاراپا قۇربان ايتتىڭ قارساڭ ءتۇنى،
قاجى پارىزى وتەلەر وسى كۇنى.
عاراپادا سول جەردە بولۋ پارىز
بولماساڭ وتەلمەيدى قاجى جۇگى.

تۇنەدىك عاراپاعا تۇندە بارىپ،
ەرتەسى بەسىن وتەدىك ول جەردە انىق.
بۇلت شىعىپ عاراپادا جاڭبىر جاۋىپ
سالقىنداپ راقاتتاندى تامام حالىق.
كەشكە جاقىن ءبىز كوشتىك مۇزداليپا
عاراپانىڭ مىندەتى ءتامامدالىپ.

تورە ءابىش، كۇشىكباي وسىندا وتكەن،
عاراپادا قاجىلار ءدافىن ەتكەن.
مەككەدە موللا الپەمىش جۇبايىمەن
مالىك جانە تاستاعان دۇنيە كوشكەن.

مەككەدە ءتورت ءمۇساپىر بىزگە كەلگەن،
ساياق جۇرگەن ادامدار وردەگى ەلدەن.
ۇشەۋى عاراپادا بىرگە بولدى
بىرەۋى بايتوللادا ونىڭ دا ولگەن.
ءبىر اللا تىلەكتەرىن بەرسە دەيمىز
ەرلەر عوي پارىز وتەپ تىلەپ كەلگەن.
ايتا بەرسەك اڭگىمە تاۋسىلمايدى
دەيتىندەي ەستىگەندەر كوپتى كورگەن.
سەيسەنبى كۇن مۇزداليپاعا قوندىق كەلىپ،
ءۋاجىپتى تۇسىرەلىك تۇنەپ كورىپ.
عاربىلىك ميحىناتىندا ءىسىم شالا
ءۇمىتتى بولىپ ءجۇرمىز حاققا سەنىپ.

تاڭەرتەڭ ءميناعا كەپ اتتىق تاستى،
قور قىلىپ ويرانداۋعا شايتان قاستى.
بار ەكەن سىماعۇلدىڭ قۇربان ورنى
زيارات قىلىپ توگىستىك كوزدەن جاستى.
جۇگىرىپ قۇربان شالىپ سول ارادا
بوسانىپ يحرامنان الدىق شاشتى.
حانفي مەشىتىندە ناماز وقىپ
اللاعا شۇكىر ەتىپ قويدىق باستى.

ءمۇرسالات دەپ سول جەردە ءبىر ۇڭگىر بار،
پايعامبارىم وتىرعان كولەڭكە عار.
جابىرايىل ءمۇرسالاتىن اكەلگەندە
وسى ۇڭگىردە وتىرعان حاق پايعامبار.

سول جەردە پايعامبارىم جاتقان ەكەن،
تاس ەرىپ قورعاسىنداي اققان ەكەن.
قوزعالىپ تۇرعانىندا پايعامبارىم
توبەسى تاسقا ءتيىپ باتقان ەكەن.
زيارات قىلىپ تيگىزدىك توبەمىزدى
پەندەگە ءناسىپ ەتپەك حاقتان ەكەن.
قۇدايىم ەر جىگىتكە بەرسە داۋلەت
تالاپ قىپ سول جەرلەردى تاپپاق ەكەن.
جۇرت ءبىلىپ ىقىلاس قىلسىن دەپ ايتامىز،
كوپ ايتۋ شاريعاتقا ماقتان ەكەن.
ميناعا ەكى تۇنەپ ءجۇرىپ كەتتىك،
مەككەگە قايتا اينالىپ كىرىپ كەتتىك.
مەككەگە كىرەتۇعىن جولىمىزدا
جانناتۇل مۇعاللونى باسىپ وتتىك.

پايعامباردىڭ اتاسى مەكەن جەرى،
ءامينا، قاديشا انا كۇمبەزدەرى.
كوپ شاھيت، كوپ اۋليە قابىرى بار
تاۋاپ قىپ ارالادىق بىزدەر ونى.

اتقاردىق بەيسەنبى كۇن پارىز تاۋاپ،
ءىنشا اللا قابىل قىلسا ۇلكەن ساۋاب.
العىمىرا ارالاپ از كۇن جاتىپ
كورىپ - ءبىلىپ وقىدىق قۇران ايات.

وسىلايشا مەككەدە از كۇن جاتتىق،
از كۇن جاتىپ بۇيىرعان ءدامىن تاتتىق.
ارتىمىزدا ەل - جۇرت بار، پارىز ءبىتتى
ەندى قالاي قايتساق دەپ اقىلداستىق.

مامىربەك تورە باستىق قانشا ادامدار،
شام اينالىپ، رۋزاعا جۇرمەك ولار.
ال، بىزگە ءۇش ءمۇساپىر بوگەۋ بولىپ
جيدداعا بارماق بولدىق قانشا جانلار.

ءبىز كەلىستىك جيدداعا بارالىق دەپ،
ءۇش ءمۇساپىردى كەمەگە سالالىق دەپ.
قايتارىپ اقشاسى ازدى سول ارادان
اقشاسى بار ءبولىنىپ قالايىق دەپ.
مادينا مۇناۋارانى زيارات قىلىپ
رۋزانىڭ نۇرىنا قانايىق دەپ.
مادينا پايعامبارىم تۇرعان قالا
ءبىر كورىپ ۇلگى - ونەگە الايىق دەپ.
تالاي ەل تۇيە ءمىنىپ قىرمەن كەتتى،
قوبدا، التايدان بارعان ءبىز جيددا قايتتىق،
ءمۇساپىردى جولىنا سالالىق دەپ.

مەن عارىپ جولداستاردىڭ تىلىنە ەردىم،
جيدداعا وسىلارمەن بىرگە كەلدىم.
ك ... اشىق كوڭىلشەكتىڭ دەگەندەيىن
جالعىزدىق كوڭىلشەكتەن از كۇن كوردىم.

بايتوللادا ماديناعا بارامىز دەپ،
ۋاعدا قىلعان ەدى ءبىرقانشا كوپ.
ورازبەك، دودان باستىق ءبىرقانشاسى
وزگەردى شۇعىل ۇيگە قايتامىز دەپ.

جيددانىڭ شاھارىندا ءوتتى سايىر،
راحىماتىن قىلسىن اللا باتىن - زايىر.
بىرگە جۇرگەن جولداستىڭ بىرەۋى ءولدى
قىلاگور پاتشا قۇداي اقىرىن قايىر.

بۇيرىقشا وسى ارادا ۋاقىت جەتتى،
قاسىنا حاۋا انانىڭ ءدافىن ەتتى.
كوبەيىپ بارعان سايىن شىعىنىمىز
جولداستار قايتپاق بولىپ زارە كەتتى.

بىزگە جۇك اقشاسى جوق ءۇش ءمۇساپىر،
كۇن سايىن اقشا ازايىپ بارا جاتىر.
نە دە بولسا ەل جاققا قايتپاق بولدى
بۇيرىق بولسا كەلمەككە تاعى دا اقىر.

وسىمەن ءبارى تۇگەل قايتپاق بولدى،
اقشامىز از دەپ جولدى الىس كوردى.
ءباداۋي جۇرگىزبەيدى جول توسادى
دەگەن حابار جانە دە ەمىس كەلدى.

ويلادىم ءاربىر ويدى مەن ءبىر عارىپ:
كىم قۇتىلماق اجالدان ۇيگە بارىپ؟
ءناسىپ بولسا رۋزانى كورەيىن دەپ
بەكىندىم جولداستاردان جالعىز قالىپ.
ءدام بۇيىرسا مەككەگە كەلسەم - اۋ دەپ
كەلەر جىلعى قاجىعا جىل ايلانىپ.

امانداستىم سونى ويلاپ جولداسىما،
كوز جەتتى كوپتەن پايدا بولماسىنا.
ۋاعدادا شىركىندەر تۇرماس بولسا
كوپتەن نەگە ايىردى تۋ باسىندا؟!

جولداستار قايتتى ەلگە بافىر جالداپ،
توتەلەپ بەلەت الىپ ھادىسكە ارناپ.
قايتارىپ ورىس بافىر بەلەتتەرىن
تۇركتىڭ بافىرىمەن بولدى بارماق.
الىسىپ جولداستاردىڭ جول بەلەتىن
كەمەگە تەگىس سالىپ قويدىم جايلاپ.

حات جازىپ سالەم ايتتىم تۋعان ەلگە،
وقشادىم جالعىز قالىپ اققان سەڭگە.
اينالىپ بارعانىمشا كىم بار، كىم جوق،
امان بول اباق ەلىم التاي جەردە.

كوپ سالەم قازاق ەلىم تامامىنا،
ەل يەسى دانا ۇلىق ادامىنا.
اتالار، اعايىندار دۇعادا بول
ايرىلعان اقىت ۇلىڭ امانىنا.

كوپ سالەم جوتا قاجى ەلىمەنەن،
كەرەي ەل مولقى تۋعان جەرىمەنەن.
ۇستازىم داموللا ەكەم − كارى اتامىز
دۇعادان تاستاماڭىز مەنى بىلگەن.

باردامعا سالەم ايتتىم قوبداسىمەن،
كەرەي ەل ءشۇيىنشالى ورداسىمەن.
كوز كورىپ بارعانىمشا ەكى عايىپ
بىرىگىپ جۇرەر - جۇرمەس مولداسىمەن.

اعايىن، قاتىن - بالا ارتتا قالعان،
قوش دەپ ايتىپ كەتپەگەن ارتتاعى ارمان.
بارا الماسام ءبارىڭ دە دۇعادا بول
بولمايدى ءتۇبى ارمانسىز شىركىن جالعان.

امان بار، جولداستارىم ساقتاسىن حاق،
بولسا ەگەر قاۋىشارمىز تىرىلىك شاق.
امان جەتكىز ەي، اللا ماديناعا
رۋزاعا ءجۇز سۇرگىزىپ بەرەگور باق!

اتتاندى ءۇي جولداس تا، جەر جولداس تا،
قالمادى بۇل ساپارعا مەنەن باسقا.
ارابتىڭ ءتىلىن بىلگەن ءتايىپ ەدىم،
مەدەۋ جوق ءبىر اللامەن ونان باسقا.

قاسىمدا مادينالىك عابدىلحاميت،
جالعىز - اق سوعان ەردىم سوزبەن تانىپ.
ول اراب، ويلاساڭىز مەن قازاقپىن
ارالاپ بوتەن ەلدى جۇرگەن عارىپ.

مادينا، شام - قۇددىسقا بولدىم قۇمار،
ەل - جۇرتقا امان - ەسەن بارسام جارار.
ەگەردە وسى جولدا ءولىپ كەتسەم
بولماسا مىنا جۇرگەن ءىزىم قالار.

جولداس كەتىپ، ءبىز مىندىك تۇرك بافىر،
يامبۇقتان شىعايىق دەپ قىلدىق اقىل.
بافىرعا ءبىز وتىرىپ از جۇرگەن سوڭ
قايرانداپ الگى بافىر باتىپ جاتىر.

قاراساق تۇرىپ قاپتى قۇمعا كىرىپ،
كەسەلسىز كەتسە نەتتى ءتۇزۋ ءجۇرىپ.
بۇل جەردە تامىرىم جوق، تانىسىم جوق
جولداسىم قاسىمداعى اراب، تۇرك.
بارۋعا رۋزاعا رۇقسات جوق دەپ
ەستىگەندە كوڭىلىم كەتتى سىنىپ.

توقتالىپ بافىر تۇردى ءبىر كۇن، ءبىر ءتۇن،
سۇيرەدى ءبىر كەمەمەن ەكىنشى كۇن.
ونان شىعىپ ءبىر جەرگە تاعى تۇردى
قورشىلىق مۇنان وتپەس دۇنيە سۇم.

ەڭكەيىپ سۋعا قاراپ ۇڭىلەمىز،
سەندەلىپ سوقتىعىسىپ ءبىز جۇرەمىز.
ءار جەردە باتقان كەمە اعاشى تۇر،
ونى كورىپ ءبىز جاننان تۇڭىلەمىز.

بۇل تەڭىز تالايلاردى تارتقان ەكەن،
كۇنى بىتكەن عارىپ بوپ جاتقان ەكەن.
ءباحىر احمار − قىزىل قان تەڭىزى دەپ
ۇلگى قىپ بۇرىنعىلار ايتقان ەكەن.
كۇنانىڭ كەساپاتى شىرمادى - اۋ دەپ
سول جەردە مىنا جىردى ايتقان ەكەم.


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428