قازىرگى ورنىڭىز:ولەڭدەر مەن جىرلار » تولىق مازمۇن

تىلەك جىرى

قوسىلعان ۋاقىت:2016-03-01كورىلىمى:加载中

ءبيسمىللاھي ءيا اللا،
ءيلاھي ساعان جىلايىن.
ءمۇساپىر بولعان ءبىز عارىپ
جىلاماي قايتىپ شىدايىن.
مىڭ ءبىر اتىڭ قۇرمەتى،
ۇلىق زاتىڭ قۇرمەتى،
وزىڭنەن قۋات سۇرايىن.
جالعىزدىڭ جارى بار قۇداي،
پالەدەن ساقتا بار قۇداي.
سەنبى كۇنى ايرىلدىم
جيددادان شىعىپ جولداستان.
توقتادى كەمە جۇرە الماي
ساپارى وڭ بولماستان.
جەتەمىز دەپ ەك يامبۇققا
جولعا تۇنەپ قونباستان.
كۇپىرلىك الدە قىلدىق پا
وزىڭنەن راحىم بولماستان.

كەمە باتتى جۇرە الماي،
كوتەرەم مالداي تۇرا الماي.
كەمەدە تۇگەل شۋلادىق
نە بولارىن بىلە الماي.
ماديناعا جەتپەكشى
كوڭىلىم تۇر تىنا الماي.
كەمە بولدى جۇرمەيتىن،
جاعداي دا جوق سۇيرەيتىن.
جۇرگىزگەن مۇنى قانداي جان
تەڭىزدىڭ سىرىن بىلمەيتىن.
يەسى تۇر كەمەنىڭ
حالىقتى كوزگە ىلمەيتىن.
قاجىلادىڭ قايعىرعان
زارىنا قۇلاق تۇرمەيتىن.
تالىعىم بۇلاي بولعان سوڭ،
ىشكە ۋايىم تولعان سوڭ،
بولدىم با دەپ جىلادىم
رۋزانى كورمەيتىن.
ساپار ءجۇردىم وتەۋگە،
بەس پارىزدىڭ اقى ءۇشىن.
مادينانىڭ ىشىندە
جاتقان ۇلى زات ءۇشىن.
وكىنىشىم كەتپەيدى
رۇقساتسىز قالعان اتا ءۇشىن.
الدىندا تۇرىپ الماعان
اق نيەتتى باتا ءۇشىن.

قۇرمەتى ءۇشىن حابيبىڭ،
قۇلىڭدى اللا حار قىلما.
پاقىر بولىپ سەندەلگەن
بەيشاراڭدى زار قىلما.
جولىما پالە كەز قىلما.
كۇنىمدى اللا تار قىلما.
قۇدىرەتىڭە جالبارىپ،
قول كوتەردىم دارمەن جوق.
مەن ءبىر عارىپ ءمۇساپىر
شىندا دارمەن قالعان جوق.
زيارات قىلسام راسۇلگە،
رۋزاسىنا باس قويىپ،
وسى جولعى ساپاردا
باسقا مەندە ارمان جوق.

ءيا، اللاھي بار قۇداي،
جاراتقان يەم سەن ەدىڭ.
بەيشارا بولعان ءمۇساپىر
زايىپ قۇلىڭ مەن ەدىم.
ءىسىمنىڭ ارتىن جاساعان
تاۋەكەل ساعان دەر ەدىم.
تاۋەكەلدىڭ كۇشىمەن
ساپار جۇرگەن مەن ەدىم.
ءبىر باسى ءۇشىن قاڭعىرعان
كەزبە ەدى دەر ەلىم.
وزىڭە عانا جالبارىپ،
وزىڭە عانا سەنەمىن.
نە قىلساڭ دا جاراتقان
سالعانىڭا كونەمىن.

ءيا، اللاھي قۋات بەر،
قۇرمەتى ءۇشىن دوسىڭنىڭ.
رۋزاسىنا بارماققا
نيەت قىلىپ ۇمسىندىم.
جاردەم، ءمادات، قۋات بەر
قاھارىڭنان شوشيمىن.
ءيا، اللاھي تىلەدىم:
ءىسىم اعزام قۇرمەتى،
سۇيەر دوستىڭ مۇحاممەد
مۇستافانىڭ قۇرمەتى.
بارىنەن بۇرىن جارالعان،
زياراتى تارالعان،
اتامىز ادام قۇرمەتى.
ۇجىماقتان شىعىپ زارلانعان،
ەرىن تاپپاي ساندالعان،
حاۋا انانىڭ قۇرمەتى.
كەنجە بولىپ تۋعان ۇل،
اتا جولىن قۋعان ۇل،
شەس ءنابيدىڭ قۇرمەتى.
حالىققا تاعىلىم بەرگەن ول،
تىرىدەي كوكتە جۇرگەن ول،
تاماشالاپ توزاقتى
اقىرى بارىپ كورگەن ول.
اقىرى كورىپ ۇجىماقتى،
شىقپايمىن دەپ تۇنەگەن
ىدىرىش دوستىڭ قۇرمەتى.
مىڭ جىل عۇمىر سۇرگەن ول،
حاقتى تانىپ - بىلگەن ول،
دۇعاسىن اللا قابىل عىپ
قاۋىمىمەن كەمە مىنگەن ول؛
ەكىنشى اتا اتانىپ،
دۇعاسىن اللا قابىل عىپ
ەكىنشى ۇرپاق كورگەن ول،
نۇح ءنابيدىڭ قۇرمەتى.
تاستان تۇيە شىعارعان
سۇتىمەن ەلدى سۋارعان،
ساليق ءنابي قۇرمەتى.
عالامعا ھادي بولعان ول،
ءريسالاتىڭ قونعان ول،
ھۇت پايعامبار قۇرمەتى.
حالىققا ايتقان اقىلدى،
كەڭەس بەرگەن تاتىمدى،
جاماندىقتى قىلما دەپ
زالالعا مويىن بۇرما دەپ
لۇت پايعامبار قۇرمەتى.
ناق دوسىڭ بوپ دۇنيەدە،
بايتوللانى جاساعان،
ءامىرىن كۇتىپ اللانىڭ
بالاسىن قۇربان اتاعان
ىبىراھيمنىڭ قۇرمەتى.
ءامىرىن ەستىپ اتانىڭ،
جولىنا ءبىر اللانىڭ
جانىن قۇربان اتاعان
سىماعۇلدىڭ قۇرمەتى.
حاقتىڭ ءامىرىن جۇرگىزگەن،
ءريسالاتىن بىلگىزگەن،
سىقاق ءنابي قۇرمەتى.
بالاسى ءۇشىن جىلاعان،
شىنىمەن تىلەپ سۇراعان،
بالاسى دا زار بولىپ
تىلەك قىلعان قۇدايدان.
دۇعاسى قابىل الىنعان،
قۇتىلعان ءزابىر - زارىنان
جاقىپ، ءجۇسىپ قۇرمەتى.
بار اللامەن سىرلاسقان،
زارىن ايتىپ مۇڭداسقان،
ءتاۋرات بەرىپ جولىنا
تاياق بەرىپ قولىنا
تاجىلى نۇرىن حاق شاشقان
مۇساكالام ول ءنابي،
ءىنىسى ءنابي ول ھارۇن،
قۇتقارىپ ءوزى مۇڭ - زاردان
قابىل قىلعان تىلەگىن
سول ءمۇرسالدار قۇرمەتى.
ءداۋىت ءنابي پايعامبار،
پاتشالىق ءمانساپ العانلار،
پاتشا بوپ ۇلى سۇلەيمەن
عالامعا حۇكىم جايعان بار.
اللاعا قاتتى تاۋبە قىپ
بەك جىلاعان ھام انلار
سول نابيلەر قۇرمەتى.
زۇلكاپىل مەن شۇعايىپ،
تانىنە قۇرتتى قويعىزىپ،
شۇكىرلىك قىلعان ول ايىپ،
مەن جۇرگەن مىنا جول عايىپ،
تاۋەكەل قىلدىم قۇدايا،
قۇدىرەتىڭە شىن نانىپ.
سابىرلىق قىلعان اۋىرعا،
سول نابيلەر قۇرمەتى.
ءجۇنىس، جىرجاس، ءىلياس،
اللانىڭ دوستى بارشاسى.
ءجۇنىستى جۇتىپ ءبىر بالىق
شىعارعان ەسەن پاتشاسى.
جەتى ءولىپ جىرجاس تىرىلگەن،
ميحىنات كورگەن قانشاسى،
سول ءمۇرسالدار قۇرمەتى.
دۇنيە كەزگەن ەسكەندىر،
جاۋلارى قايعى جەسكەن ءبىر،
سول ەسكەندىر ايباتى
بار اللا سەنىڭ قۇدىرەتىڭ.
ەسكەندىر جەيتىن ناندى جەپ،
مىڭ جاساعان لۇقپان ەر
سول نابيلەر قۇرمەتى.
زاكاريا، ياحيا،
قىزىر، ءىلياس ھام عايسا،
ساناپ بولماس مىڭ قيسا،
پايعامبارلارعا سالاۋات
سول نابيلەر قۇرمەتى.

بۇل عالامدى بار قىلىپ،
دوستىڭ ءۇشىن جاراتتىڭ.
دوسىڭا بەرگەن نۇرىڭمەن
الەمگە جارىق تاراتتىڭ.
اتىن جايىپ جەر - كوككە
ءار مەكەنگە تاراتتىڭ.
رۋزاسىن كورۋگە
بەتىمدى اللا قاراتتىم.
ماقساتقا وسى جەتكىزىپ،
اقىرىن قىلعىل قايىرلى
وسى جۇرگەن تالاپتىڭ!
حابيبىڭا جەتكىزگىل،
زيارات سالەم ەتكىزگىل.
قاتەرلەردەن وتكىزگىل
انبيە مەن اۋليە
قۇرمەتى ءۇشىن بار اللا
قام - قايعىنى كەتكىزگىل!

ءمىناجات قىلدىق سوندا حاققا زارلاپ،
تۇردىق قوي باستى سوندا ولىمگە ارناپ.
جولىنان مادينانىڭ ءۇمىت ءۇزىپ
رۋزاعا عايىپ بولدى بارۋ - بارماق.
عارىپ باسقا بۇل ميحىنات دۋشار بولىپ
كوڭىلگە ءتۇسىپ كەتتى قاتتى سالماق.
ءۇش جارىم تاۋلىك بافىر قالدى توقتاپ
تۇردىق قوي ولمەسەك تە ولىككە ۇقساپ.
سول كەزدە تەڭىز تولقىپ شىقتى كەمە،
جۇرەرگە پاتشا قۇداي بەردى سوقپاق.

جەل تۇرىپ، تەڭىز تولقىپ شىقتى كەمە،
جاساعان جار بولسا ءوزى قيىن دەمە.
كەمەدە راسۇلدىڭ زارۋلەرى
قۇدايىم جاردەم قىلماي قويسىن نەگە؟
ءمىناجات قابىل بولسىن دەگەنلەرىڭ
جارانلار، قاج جولىندا ارام جەمە.

جونەلدى ءيا اللا دەپ كەمە ءجۇرىپ،
يامبۇققا جاقىندادىق كەمە ءمىنىپ.
ءبىر تاۋلىكتە تەڭىزدەن ءوتىپ شىعىپ
يامبۇقتىڭ شاھارىنا كەلدىك كىرىپ.
شۇكىرلىك قىلدىق حاققا ەسەن - امان،
بار ەدى سول كەمەدە ءبىر مىڭ ادام.
ءباداۋي جۇرگىزبەيدى، جول بەرمەيدى
سول جەردە سەگىز كۇندەي بولدىق تامام.

جول قيىن: ميحىنات كوپ، توسقىنشى بار،
جۇرگىزبەيدى دەگەنگە قىلامىز زار.
توعىزىنشى كۇن رۇقسات بولىپ جولعا شىقتىق
مەدەت بەرىپ قۇدايىم بولعان سوڭ جار.

تۇيە ءمىنىپ جونەلدىك ءتۇسىپ جولعا،
عيبىرات الىپ قارايمىز وڭ مەن سولعا.
راسۇلىڭا ەي اللا ءبىز بارامىز
مەدەت بەر جولىمىزعا ءوزىڭ وڭدا.

يامبۇق پەن مادينانىڭ ەكى اراسى،
تاۋ - تاس پەن ءشول بولادى اينالاسى.
وندايدا قارۋ - قايرات قولدا بولماس
سورايىپ جۇرگەن ادام قاڭقا باسى.

ءبىز ءجۇرمىز قارا، قوڭىر، قىزىل، سارى،
ءتىلى باسقا ءدىنى ءبىر بارشالارى.
ءبىر مازارعا كەپ جاتتىق قونالقادا
عابدىراحىم اۋليە دەپ اتالادى.
باتيما مەن عاليعا قاقپاشى ەكەن
جەر اتى عابدىراحىم اتالادى.

بەس قونىپ جەتتىك ايتەۋ التىنشى كۇن،
كورسەتپەس ادامعا وپا دۇنيە سۇم.
رۋزاعا تۇندە كىرۋ بولمايدى ەكەن
جىلدان ۇزاق ءوتتى ايتەۋ قىپ - قىسقا ءتۇن.

ماديناعا جەكسەنبى كەشتە جەتتىك،
كىرە الماي رۋزاعا ءتۇندى كۇتتىك.
بەرگەن سوڭ اللا مەدەت پەندەسىنە
تاڭ نامازىن وتەپ اپ كىرىپ كەتتىك.

رۋزادان نۇر بالقيدى تۇرساڭ قاراپ،
جۇپار عانبار ءيىسى تۇرار تاراپ.
ءيشارات، ءبيشاراتى بىلىنگەندەي
شىن كوڭىلمەن رۋزاعا بارساڭ قالاپ.
ءومىردىڭ شىن ءلاززاتىن تاتقانداي بوپ
مەن تۇردىم بۇل كۇنىمدى مىڭعا بالاپ.
ءجۇز مىڭ مارتە شۇكىرلىك پاتشا قۇداي
دوسىڭدى ساعىنىپ - ەم اتتاي جاراپ.

اسسالاتۇ ۋاسسالامۋ عالايكا يا راسۋل اللا،
اسسالاتۇ ۋاسسالامۋ عالايكا يا حابيبوللا.
يا نابييۇ سالامۇن عالايكا،
يا راسۇلۇ سالامۇن عالايكا،
يا حابيبۇ سالامۇن عالايا
سالاۋاتۇ اللاھي عالايكا!

اسسالاتۇ ۋاسسالامۋ عالايكا يا ساييدۇل ءمۇرسالين،
اسسالاتۇ ۋاسسالامۋ عالايكا يا يمامۇل مۇتتاقين.
اسسالاتۇ ۋاسسالامۋ عالايكا يا حاتامۇل نابيىن
اسسالاتۇ ۋاسسالامۋ عالايكا يا راسۇل عالامين.

يا راسۇلىم شاپاعات،
كەلدى ساعان ءۇممەتىڭ.
اق بابىڭا سۇرگالى
كۇنالى قارا كىر بەتىن.
بەتىمنىڭ كىر بولعانى
تۇتا المادىم ءسۇنناتىڭ.
اللادان تىلەپ العان ەڭ،
ءۇمماتىڭ كۇنا مىندەتىن.
انادان تۋىپ جۇرگەنىم،
از كۇن عۇمىر سۇرگەنىم،
حاق جولىنا جۇرگەنىم،
ءبارى سەنىڭ قۇرمەتىڭ.

الدىڭا كەلدىم يا راسۇل،
سالاۋات سالەم بەرگەلى.
مۇباراك جەرگە جارالعان
رۋزاڭىزدى كورگەلى.
مەككە ءجۇزىن كورمەسە،
رۋزاڭىزعا كەلمەسە،
سالاۋات سالەم بەرمەسە،
ارماندا ءموئمىن ولگەنى.
الدىڭا كەلدىم ءيا راسۇل،
كوڭىلىم تولىپ بالقىدى.
رۋزاڭىزدى اينالدىم
نۇر بالقىپ، جۇپار اڭقيدى.
ساۋدايى بولعان كوڭىلىم،
جەتە الماعان زارىعىپ.
قۇجىراڭىزدى وبكەن سوڭ
جادىراپ كەتتىم ساۋىعىپ.
بەيشارا بولىپ كەلىپ - ەم
حالقىمنان تۋعان ايرىلىپ.
يا راسۇل اللا شاپاعات،
يا حابيپ اللا شاپاعات.
قۇرمەتىڭ ءۇشىن جارالعان
دۇنيە مەن اقيرەت.
سالاۋات سالەم قىلعالى،
كەلدىم ساعان الىستان.
ءتانىم الىس جان جاقىن،
پەرۋانا رۋحىم زارىعىپ،
تاقاتتارىن تاۋىسقان.
مىڭ - مىڭ شۇكىر قۇدايا
راسۇلىڭنىڭ ورنىنا
جايىم وسى قاۋىشقان.
سەن، سەن شافيق يا راسۇل،
شاپاعات سەنەن يا راسۇل.
رۇقسات بولسا اللادان
الدىڭا كەلىپ قايتقالى،
سالاۋات سالەم ايتقالى،
پاقىرىڭ كەلدى بەيشارا
جانىنا ساۋاپ تاپقالى.
كۇنا جەڭگەن اقىلىن،
اسۋدا ايلاپ باتىنىن.
سۋمەن جۋىپ زاھارىن،
بابىڭا كەلدى زارلانىپ،
موينىنا الىپ عافىلىن.
سەنەن باسقا كىمىم بار،
تىلەيتىن كۇنا - ءمىنىم بار.
جاراتقاننان جەڭىلدىك
تىلەيتىن جاقىن ءوزىڭسىڭ
پايعامبارىم سيىنار.
ءبيشارات سەنەن يا راسۇل،
ءيشارات سەنەن يا راسۇل.
يا راسۇل اللا شاپاعات،
يا مۇستافا شاپاعات،
يا احىمەت شاپاعات!

اسسالاۋماعالايكۇم شاھاريارلار،
ابۋباكىر سىدىق، بىن حاتتاپ عۇمار.
عۇسمان، قازىرەت عالي وزدەرىڭە
سالەم بەردى پاقىرىڭ جانى قۇمار.
ءيا، باتيما قازىرەت،
بارلىق عازەز انالار.
سىزدەردەن مادەت تىلەگەن
ۇممەت بولعان بالالار.
اللانىڭ عازەز قۇللارى
وتىز ءۇش مىڭ اسحابلار.
بارلىق يمام مۇسىلمان
يماندى جولعا باستاپ بار.
سالاۋات سالەم بارىڭە،
اقىت پاقىر جولدادىم.
نيەتىمدى قابىل عىپ
رۋحىڭ تىلەپ قولداۋىن!!!


يا اللا، قابىلدايگور جىلاعانىم،
شاپاعات راسۇلىڭنان سۇراعانىم.
راسۇلىڭنىڭ قۇرمەتىنە جارىلقاساڭ
شۇكىرلىك جاي بولعانداي بۇل ارمانىم.

تاۋسىلماس ارمانىم كوپ ايتا بەرسەم،
قۇدايا ءناسىپ ەتسەڭ قايتا كەلسەم.
امانات قويدىم اللا شاھاداتىم
كەلە الماي اجال جەتىپ ساحارادا ولسەم.
جولىعىپ قيامەتتە راسۇلىڭە
قۇدايا مەن رازى ءديدار كورسەم.

رۋزانىڭ سىرتىندا ەكەن مەشىت حارام،
مەكەنى پايعامباردىڭ ءبارى تامام.
بەس ەسىگى بار ەكەن بۇل حارامنىڭ
ءبىرەۋىنىڭ اتى ەكەن باب ءىسلام.
باب نيسا، باب راحىمان، باب جابىرايىل
باب مۇحاممەد دەلىنگەن قاقپاسى بار.

راسۇلدىڭ رۋزاسىن اركىم كوكسەر،
بارىپتى وعان ءار مەللات نەشە ون مىڭ ەر.
مۇندا بار ميھىراپ ءنابي، ميھىراپ عۇسمان،
ميھىراپ سۇلتان جانە بار ميھىراپ سۇلەيمەن.
ەگەر سەن جولىڭ ءتۇسىپ بارا قالساڭ
راسۇلدىڭ ميھىرابىنا قۇلشىلىققا ەن.

بەس مۇنارا جانە بار بەس جاعىندا،
ازان ايتار نامازدىڭ ۋاعىندا.
كىشى مۇنارا سالمەن دەپ اتالار
جانە ءبىر مۇناراسى اشكاليە.
باب راحىمان، باب ءىسلام مۇناراسى،
مەشىتتىڭ ويىڭ جەتپەس عيماراتى،
التىن، ياقۇت زيناتى اينالاسى.
التىن بەرىپ جازىلعان ايات - حاديس
بارعاندارىڭ ءساپ سالىپ ءبىر قاراشى.
«ۇجىماق جولىن ءناسىپ قىل، − دەپ جازىلعان، −
شىن تاۋاپقا كەلگەندى جارىلقاشى!»
وندا بارىپ وقىساڭ بۇل حاديستى
كوڭىلىڭنىڭ تارقار ەد عام جاراسى.

اۋەلى زيارات قىلدىق پايعامبارعا،
ابۋباكىر ھام عۇمار جارانلارعا.
جابىرايىلدىڭ ورنى ەكەن باب جابىرايىل
ونان سوڭ سالەم بەردىك ءام انلارعا.
جابىرايىل، ميكايىل، عازىرايىل،
سىرايىل اللا دوستى عازەزلارعا.

ۇحىت تاۋدا كوپ شاھيت اداملارعا،
باقيعا شاھيت كەتكەن جارانلارعا.
مەشىتتەن سول جاقتارعا قاراپ تۇرىپ
ءبىر - ءبىر سالەم بەرەدى تامام جانعا.

باب نيسا تارابىندا جانات باقي،
عيزاتلۇ حاق جاراتقان مەكەن رابيق.
سول ورىن ءناسىپ بولىپ جاتقانلارعا
پايعامبارىم بەگىرەك قىلار شافيق.

باقيدا كۇمبەزى بار حازىرەت عۇسمان،
راسۇلدىڭ ەكى نۇرىن قابات قۇشقان.
ەكى قايتا بارۋعا رۇقسات جوق بوپ
ءبىر - اق جول زيارات ەتتىك اسىعىستان.
ءابۋ ساعيت قاتارلى ساحابا بار،
راسۇلدىڭ جارانلارى عيزاتلۇ جار.
جاننات باقي ەسىگىندە قانشا شاھيت
عازەزلار ماڭگىلىك بوپ جاتقان انلار.
تاعى دا ءبىر جاعىندا جاتقان ونىڭ،
حاليما، ساعديا دەگەن ەكى حانىم.
حاليما، ساعديانىڭ ءمانىسى سول
ءسۇت ەمىزگەن اناسى پايعامبارىم.

اسەت قىزى باتيما تاعى سوندا
عۇسماننىڭ كۇمبەزىنە بارار جولدا.
عازىرەت عالي اناسى وسى كىسى
زيارات قىپ بارىستىق تاعى دا وندا.

ىبىراھيم پايعامباردىڭ ءوز بالاسى،
جارىق نۇرى، ءتانىنىڭ ءبىر پاراسى.
باقيدىڭ باعى ىشىندە سونىڭ ءبارى
باقتىڭ سىرتى قورعاندى اينالاسى.

يمام شافيق، ساحابا يمام مالىك،
ءبىر مازھاپتىڭ يەسى دىنگە جارىق.
سارى مايداي بالقىسىن ءدىن مۇسىلمان
عازەزلاردى سويلەسەم اۋىزعا الىپ.

ءابۋتالىپ ۇعىلى حازىرەت عاقىلى،
بۇل كىسىمەن تۋىسقان عالي باتىر.
پايعامبارعا جار بولعان ساحابانىڭ
باقيدا مەكەن ايلاپ كوبى جاتىر.

ءبىر كۇمبەزدىڭ ىشىندە تامام انا،
بارشاسى ءۇمماتلارعا بولار پانا.
حازىرەت قاديشا باستىعى انالارىم
انالاردان رازى بولسىن حاق تاعالا.
شاپاعاتشى بولاگور انالارىم،
ماحشاردا بارشامىزعا بولىپ پانا،
انالاپ ەسىگىڭە بارعان كەزدە
جىلاعاننان جوق بولدى باسقا شارا.

ءبىر ۇيدە پايعامبارىم تامام قىزى،
اقيرەتتىڭ نۇرلارى قامار ءجۇزى،
بولىنگەن پايعامبارىم دەنەسىنەن
كوزگە سۇرمە ولارنىڭ باسقان ءىزى.

ءبىر كۇمبەزدە وسىلار جاتقان ىڭعاي،
ىڭعاي عانا قويىپتى بولەك قىلماي.
ءبىر كۇمبەزدە تامام قىز اپالارى
مەشىت حارام قاسىنا قويعان مۇنداي.

ءبىر كۇمبەزدە جانە بار حازىرەت عابباس،
قاسىندا يمام قاسەن وعان جالعاس.
يمام باقىر مۇحاممەد، جاعىپار سىدىق
قۇلاق سالىپ ۇعىڭدار ءاييۇانناس.

ەرعاليدىڭ وسىلار بالالارى،
قىز باتيما ولارنىڭ انالارى.
اللا عازەز جاراتقان كامەل زاتلار
ايتقانمەنەن تاۋسىلماس باعالارى.

زيارات ەتىپ بارىنە سالەم بەردىك
شۇكىرلىك عازەزلارنىڭ قابىرىن كوردىك.
شاپاعاتشى بولاگور، اعالارىم،
بارشاڭىزدان مارحامات تىلەپ كەلدىك.

جاعىپار سىدىق بالاسى سىماعۇلعا،
زيارات قىلدىق سالەممەن بارشاڭىزعا.
قازى، ءمۇپتي، پاتشا، اۋليە، اسحاب
باقيدا تىم كوپ ەكەن، تولسىن نۇرعا!

تاعى بار مادينانىڭ قالاسىندا،
كۇنشىعىس جۇرەر جولدىڭ جاعاسىندا.
مەشىت قۇببا، جەزدە، مەشىت قۇبىلا
بۇعان كۇشىڭ جەتكەنىڭ باراسىڭ دا.
پەندەسىنىڭ شىنايى ءدىن تاپپاعىن،
جاساعان ءوزى جار بوپ قالاسىن دا.
ۇممەتىنە شاپاعات، مەدەت قىلۋ
پايعامباردىڭ ءاردايىم ساناسىندا.
تۇگەندەپ ءبارىن ايتۋ وڭاي ەمەس
قابىرلار تولىپ جاتىر اراسىندا.
پايعامباردىڭ راۋزاسىنا كىرگەن شاقتا
ادامنىڭ قايعى تۇرماس ساناسىندا.

ءبىرى كۇمبەزدە ساحابا مالىك ءانسار،
باراقى دەپ وسىعان لاقاپ ايتار.
قازاقتىڭ ءتۇپ اتاسى ءدال وسى دەپ
شامداعى شايىق احىمەتتەن ءراۋايات بار.
ءراۋايات تاۋرايح بولا الا ما
زەر ساپ كورسەڭ شىندىعىن تابارسىڭ ءدال.
كوپ شاھيت ۇحىت تاۋدىڭ ءبىر جاعىندا،
ەر جىگىت ءجۇرىپ كورسىن دەن ساۋىندا.
عابدوللا مۇسحاپ شاماس قاسىنداعى
ول دا عۇسمان بالاسى جاسىنداعى.
وسىلار ۇحىت تاۋدىڭ ەتەگىندە،
زيارات قىلساڭ تاۋسىلماس نەشە كۇندە.
ءبارىن كۇتكەن شىراقشى اداملار بار
قاستارىنان كەتپەيتىن كۇندىز - تۇندە...

شاشىلعان بۇ دۇنيەگە يمان تاراپ،
عالامنىڭ ءبارىن كەزگەن جيھانشالاپ.
قاي تاراپقا بارسا دا شىققان ورنى
تۇرادى ماديناعا ءجۇزى قاراپ.

كىرەدى ماديناعا شىر ايلانىپ،
تارتادى اسىلىنا ىڭعايلانىپ.
ايلانار ماديناعا اقىر يمان
جىلان ءىنىن تاپقانداي ءبىر ايلانىپ.

پايعامبارىم ايتىپتى رۋزام حاق،
تىرىدە ءجۇزىم تويار كورگەندەي - اق.
رۋزاما ءجۇز ءسۇرتىپ كەلگەن جانلار
شىن نيەتپەن مەنى ءبىر قىلسىن تاۋاپ.
رەنجىتىپ كەتكەندەي دەگەن ەكەن
كەلمەي كەتسە اتەيگە تاپپاس ساۋاپ.

رۋزادا بەس - التى كۇن ەرۋ بولدىق،
ورنىعىپ كوڭىل شىركىن جاڭا تولدىق.
راسۇلدەن رۇقسات سۇراپ امانداسىپ
سەنبى كۇنى كەشىندە شىعا قوندىق.

تىلەيمىن راسۇل اللا شاپاعاتىڭ،
امانات ەسىگىڭدە اتىم - زاتىم.
ءوزىڭ ءبىر، راسۇلىڭ حاق پاتشا قۇداي
قالدىرعىل قيامەتكە شاھاداتىم.

شەرىگىڭ جوق جاراتقان ءوزىڭ ءبىرسىڭ،
راسۇل دوستىڭ شاپاعات بىزگە قىلسىن.
ءولى - ءتىرى بولسام دا كۋا بولىپ
وسى ءسوزىم امانات مۇندا تۇرسىن.
جەكسەمبى كۇن بەتتەدىك شامعا قاراي،
ۇزاق قالىپ بارادى حارام ساراي.
ءيا، اللا ولگەنىمدە قىلعىل جاقىن
تىرىدە كوز كورمەگىم ەكىتالاي.

قافيلا - كەرۋەن جۇردىك شامعا تامان،
مىڭنان اسا كىسىمىز جۇرگەن تامام.
عابدىلحاميت جولداسىم مادينادا
دۇعادا بوپ تۇرىڭىز ەندى ماعان.

ءبىر جىنىستان قازاق جوق ءوزىم جەكە،
جان اماندا كورگەن جول توي - مەرەكە.
ءتورت تۇرك، بەس ءباداۋي ءبىر وداقپىز
كوڭىل شىركىن ءجۇردى عوي حاۋىپ ەتە.

ويلاسام ۋايىم قىپ ءولىم جاقىن،
قاي جەردە قالادى دەپ پاقىر باسىم.
قۇدايىم ءباداۋيدى مەيىربان قىپ
قويىستى موللا ءتايىپ مەنىڭ اتىم.
دۇشپان دەگەن ءباداۋىي مەيىربان بوپ
جاساعان كورسەتتى اللا مارحاماتىن.

ءتورت تۇركتىڭ باسشىسى قاجى مۇسا،
ءار انادان وسىنداي بالا تۋسا.
ساپار ءۇستى توسىننان تانىسساق تا
ەكەۋىمىز جاقىن بولدىق تۋعان ۇلشا.
الىستى جاقىن قىلعان پاتشا قۇداي
پەندەسى نە قىلمايدى راحىم قىلسا.

جەكسەنبى كۇن كەرۋەن جولعا قوندىق،
ەرتەڭى.................. قوناق بولدىق.
ءۇشىنشى كۇن ءباداۋىي كوشتى قاماپ
مىلتىق اتىپ از عانا قىلدى زورلىق.
قۇداي ساقتاپ كەرۋەن امان وتتىك،
سول كۇنى ساجدا دەگەن جەرگە جەتتىك.
افيناعا ءبىز قوندىق ءتورتىنشى كۇن
بەسىنشى كۇن ءيدانى ءمانزىل ەتتىك.

التىنشى كۇن ءبىز قوندىق ىراكاعا،
اشالاپ ءبارىن ايتپاي جاراسا ما.
جەتىنشى كۇن جەتىپپىز شويىن جولعا
ۇعىپ ال كوڭىل قويعان بالا - شاعا.

شويىن جولدىڭ اۋزىندا ءيبىري حاديت،
جاڭا قۇدىق وسى جول تەمىر جاديت.
بادىعا دەيدى ەكەن بۇل ورتەڭ - بەكەت،
وسى كۇنى تۇنەدىك وندا قالىپ.

جەكسەنبى كۇن ءبىز ءتۇسىپ شويىن جولعا
مادينا ءىي ساليققا جەتتىك بارىپ.
سول جەردە كارانتيندە نەشە مىڭ جان
الدىڭعى جولداستاردى كوردىم تانىپ.
سوڭعىنى بۇرىنعىعا قوسپايدى ەكەن،
بارا الماي تۇردىم سوندا قايران قالىپ.

كۇزەتشى جىبەرمەيدى قاراپ تۇرعان،
ور قازىپ ورتا جەردەن زانجىر قۇرعان.
مىلتىق سالىپ، قىلىش اپ نەشە سولدات
جازىقتىنى جايپاۋعا دايىن تۇرعان.

ءتۇن بولعاندا جاعادى پانار شامدال،
بارلىق جەر كۇندىزگىدەي بيىك ساندال.
كەزەك - كەزەك كۇزەتىپ قانشا اسكەر
ياپىرىم - اۋ، جالىقپايتىن نەتكەن جانلار.

شەتىنە كەرۋەندەردىڭ كەلدىم سىرعىپ،
سىزدەرگە ۇقتىرايىن نازىم جىر عىپ.
كوزەتشى ارتقا اينالا بەرگەنىندە
تاۋەكەل دەپ شىنجىردان كەتتىم ىرعىپ.
ازاپتانىپ سولداتتار كۇزەتىپ تۇر
كارەنتين دەگەن پاتشا ءسوزىن بۇل عىپ.

قوسىلدىم جولداستارعا سوندا كەلىپ،
تاۋەكەلدىك عارىپقا جانعا سەرىك.
«بەيشارا قۇداي ساقتاپ كەلدىڭ بە» دەپ
جىلادى قالىڭ جولداس مەنى كورىپ.
ادامعا جالعىز جۇرمەك قانداي قيىن،
جابىرقاپ جۇرەدى ەكەن كوڭىل ءولىپ.

مامىربەك قاجى تورە جۇرگەن باستاپ،
جولداستارى قايتاما ونى تاستاپ.
شام، قۇددىس، مادينا دەپ قاجىشىلار
اۋليە، انبيەنىڭ ءىزىن باسپاق.

حانىمى ساپارىندا بىرگە جۇرگەن،
تاقتى راۋان تۇيەنى جالداپ مىنگەن.
جاس بالا قولىنداعى عۇسىمانبەك
شاھيت بوپ مادينادا جاننات كىرگەن.
قالتوقان تورە، راقىش تاعى سوندا
قۇرعاق جولمەن مەككەدەن ساپار قىلعان.
مەككە مەن مادينانى تەكسى ارالاپ
وسى جۇرگەن اداملار كوڭىلى تىنعان.

ۋاقتان قاجى عابدوللا تاعى سوندا،
قاتىنى بىرگە جۇرگەن ساپار جولدا.
الپەمىش كارى موللا جانە ميحان،
ءابىشتاي جانە داعى باشىق موللا.
باشىق دەگەن ءمۇلايىم ادام ەكەن،
ءدىنى كامال، ساپ زەيىن، ءتىلى جورعا.
بارقى بوزان، دونەنبەك جانە بازار،
وتىزداي اۋەل باستان جۇرگەن كۇندە.
كەلباتىر، جامان بالا، ءام ءمانجىباي
قۇداي ءۇشىن جۇرەدى كىمدە - كىمدە.

كونساداق قۇراق قاجى تاعى دا بار،
شىبارايعىر مايقايىڭ، باباقان شال.
شەرۋشىدەن شوكەتاي ءوزى جەكە
وزگەسىن ساپار جولدا العان اجال.

قاجى بالىقشى مەركىتتەن جانە تاعى،
كامال جەتەر مۇراتقا كوڭىل اعى.
نوعايدان موللا جالەل جانە وسىندا
جولداس بوپ ءبىر توپ ادام جۇرگەن شاعى.

ەرتىستىڭ ءور باسىنان جادىك جارقاي،
زيارات شارپىلارىن جۇردىك اڭساي.
تەردىكباي، ۇزبەجان مەن دامبىل سوپى
ءبارىمىز مەكەنىمىز جوعارى التاي.

ماڭكىباي ءبىر جولداستىڭ تاعى دا اتى
بىرەۋى ءبىز پاقىردىڭ ماعلۇم زاتى.
زيارات ءبىز جەرلەردى ۇمىتپاسقا
انىقتاپ عارىپ اقىت جازعان حاتى.

ساليقتاعى كىرەندە ءبىز قوسىلدىق،
ساليق ءنابي مەكەنىن كورىپ بىلدىك.
بىزدەن بۇرىن ءبىر جۇما تۇرعان ەكەن،
ءبىز كەلگەن سوڭ جەتى كۇن تاعى تۇردىق.

شاھارلاردىڭ نىشانى قۇم مەنەن تاس
جەرمەن جەكسەن بولىپتى كۇنا سۇمدىق.
پايعامباردى قورلاعان ازعان ەكەن
قۇرتىپتى ورنىمەنەن تىپ - تيپىل عىپ.

ەندى شامعا جۇرمەككە ىڭعايلاندىق،
جەكسەنبى كەشكە قاراي پويەز ءمىنىپ.
كارانتيننەن قۇتىلىپ امان - ەسەن
قۇدايعا شۇكىرلىك قىپ العا جۇردىك.

تۇندە كەلدىك ساليقتىڭ قۇدىعىنا،
تاڭ قالاسىڭ اللانىڭ بۇيرىعىنا.
وسى دەدى ۇڭىلدىك كورە المادىق
ۋاقىت جوق پويەز توقتاپ تۇرۋىنا.

دۇيسەنبىنىڭ كەشىندە كەلدىك تابۇك،
تاماشا قىپ جان - جاققا ءجۇرمىز باعىپ.
قيىپ سالعان جولداردان ءتورت - بەس وتتىك
وت اربا توقتامايدى سۋداي اعىپ.

سەيسەنبى كۇن ءبىز وتتىك باراحاجدان،
كەي جەرىندە بۇلاق بار ارىق قازعان.
تابۇككە تاياعان سوڭ جەر ءشوپ ەكەن
تاماشا ايلاپ كورگەنىن پاقىر جازعان.

نەشە ءتۇرلى مەكەنلەر قالدىق تاڭعا،
سالاماتلىك بەر اللا عارىپ جانعا.
ساليقتان ءبىز ءجۇرىپ ءۇش كۇن، ءۇش ءتۇن،
سارسەنبىنىڭ كەشىندە كىردىك شامعا.

شام دەسە شام شاھارى شام جاققانداي،
بولماسا تۇندە اعارىپ تاڭ اتقانداي.
اقاۋسىز ءزاۋلىم ساراي قۇرىلىستار
تاڭ قالاسىڭ سالدى دەپ قالاپ قالاي.

تورە ناۋقاس سول جولدا جۇرگەن ارىپ،
شام شاھارعا جەتتىك ءبىز امان بارىپ.
ءتورت كۇندەي شام شاھارعا بولدىق ەرۋ
مەشىت توبا قاسىنان پاتەر الىپ.

بۇل مەشىت بولعانداي - اق دىنگە ۇيا،
انبيەلەر كوپ تۇرىپ قالعان مۇرا.
ۇزىنى ەلۋ، ەنى قىرىق سارجان كەلەر
ادامزات بايىپتاسا ەسىن جيا.

قابىرى سوندا ەكەن ياحيا ءنابي،
سالەم بەرىپ ءبىز زيارات ەتتىك ونى.
قازىرەت ياحۇپ، ءداۋىتتىڭ قابىرلارى
مەشىتتىڭ قىبلا تاراپ بولار جانى.

شاھزادا قۇسايىننىڭ سوندا باسى
موي مۇباراك راسۇل ونىڭ قاسى.
سول جەردە عابدوللا ۇلى زەينەلعابدەن
ميقىراپتىڭ ورنى ەكەن ءبىر قابىرعاسى.

زيارات كوپ بۇل شاھاردىڭ اينالاسى،
ەگىن، ءشوپ، جەمىس اعاش شام قالاسى.
ھوم ءسالىم حابيبتىڭ دە زيراتى بار
وڭتۇستىك پەن كۇنشىعىس ەكى اراسى.

ساحابا حازىرەت ءۇببي ءىبىن كاھاپ،
قويىپتى قاسلارىنا جاقىن جاناپ.
ءبىر - ءبىر سالەم ايلادىق بارشاسىنا
ارۋاحلار جار بولسىن ءتاڭىرىم قالاپ.
ساحابا ماعاۋيا، حازىرەت ھوش
مۇساپىرگە كوپ جۇرمەك بولادى كۇش.
قازىرەت ءبىلال ساحابا ازانشى بار
قابىرى شام شاھاردا وڭ تاراپ تۇس.

باتيما ساپارادا سول جەردە بار،
قۇسايىننىڭ قىزى ەكەن ماھ ءانۋار.
بار ەكەن عابدوللا ءىبىن جاعىپار سىدىق
ءۇببي جاقتا شايحى احىمەت ءدارۋىش بار.

وڭتۇستىكتە ءبىر عارىپ مۇحاممەد الدديىن
زامانىندا ەش ادام بولماعان تەڭ.
ەكى ۇلى مەن ءۇش پاتشا قاسىندا بار
بارشاسى عازەز ەرلەر اۋليە الدديىن.

مۇحاممەتۇن اۋليە عايىت ۇلىق،
اس قازاندا كوجەسى قايناپ تۇرىپ.
ەلىنىڭ رۋحىنا ءنازىر بەرگەن
پاقىرلارعا تارقاتىپ تاماق قىلىپ.
وسيەتى سولايشا بولعان ەكەن
زيارات ەتتىك مەشىتىنە بارىپ كىرىپ.

سوعان جاقىن شىعىستا حازىرەت مامىق،
اياعىن جاتىر ەكەن كورنەۋ سالىپ.
سەگىز ءجۇز جىل بولىپتى وتكەنىنە
كورگەن قايران بولادى ەسىن تانىپ.

ول اياق شىرىگەن دە، ساسىعان جوق
زيارات ەتتىك جاقىنداپ قىلىپ جارىق.
بۇل كىسىنىڭ مۇحاممەد ءىسىم - اتى،
قاسىنداعى ءىنىسى اتى ساليق.

تاۋ جاعىندا زۇلكاپىل ماحامى بار
ماحام ەتكەن ءۇيى دۇر ول پايعامبار.
تاۋدا حازىرەت قىزىرنىڭ بار بەلگىسى
سالاۋات اللاعالايىم اجماعيلار.

اسحاب كاھىف اۋليە اسىل زاتىم،
بارلىققا بەلگىلى عوي كاراماتىڭ.
اسحاب راحىم جانە دە دەيدى مۇنى
جەتى اۋليە دەيمىز عوي ماشھۇر اتىن.
ەسىگىندە قاسيەتتى قىتىمىر جاتىر
زيارات قىلىپ وتەدىك ولار حاقىن.
راحىمەتىڭدى بەرەگور پاتشا قۇداي
الارنىڭ عالي ايلاپ كاراماتىن.

قىرىق شىلتەنلەر ماحامى تاۋ باسىندا،
تاۋ باسىنان سالىنعان جاي قاسىندا.
شىلتەنلەرنىڭ ۇشەۋى وپات بولىپ
قويىلىپتى شاھاردىڭ ءدال قاسىنا.
شىلتەنلەر كۇندىز ەلدەن جاسىرىنىپ
تۇندە سايران سالادى تاۋ باسىنا.
تاسقا تامعان قاندارى كەتپەي قالعان
ءابىلدى قابىل ولتىرگەندە العاشىندا.
تاۋ مەنەن تاس جىلاعان عالاماتقا
قۇدايىم كەتىرمەگەن تاڭباسىن دا.

حاقيقاتىن ءبىلۋشى پاتشا قۇداي،
تۇرا ما - تۇرماي ما بۇل ءدايىم ونداي.
كەي اداملار جولىعىپ شىلتەنلەرگە
بەلگىسىن الۋان - الۋان كورگەن مۇنداي.

ەرىنبەي جۇرە بەرسە زيرات تا كوپ،
ماشھۇرلاردىڭ انىعى وسىلار دەپ.
حازىرەت ادام اتادان بەرى قاراي
اۋليە - انبيەلەر جۇرگەن جەرلەپ.

شامدى ەركىن ارالادىق ءتورت كۇن جاتىپ،
كوپ ەكەن ەت پەن جەمىس، ماي مەن قاتىق.
وزگە جەردىڭ تاعامىن بەس دارحاملىك
ءبىر دارحامعا ءبىز شامنان الدىق ساتىپ.
اداملارى كىشى پەيىل عارىپ دوستى،
امانداسىپ سويلەسسە سونداي جاتىق.
كوڭىلى نۇرلى ادامنىڭ ءجۇزى نۇرلى
قاجەتىڭە قايىرىمىن قويماس شارت قىپ.

پاتشا سالعان سارايلار نەشە ءتۇرلى،
كوكتەگەن جەمىستى اعاش ءبارى ءبۇرلى.
اق ءمارمار تاس، بولات پەن كوكتاس ۇيلەر
ەسىگى، تەرەزەسى ءبارى سىرلى.
شام شاھاردىڭ ادامى سۇلۋ ەكەن،
ەر - ايەل، ۇلكەن - كىشى ءبارى نۇرلى.
تالاي جەردىڭ ادامىن كورىپ كەلدىك
كەزدەسپەگەن سۇلۋلىق وسى عۇرلى.

ون ءۇشىنشى ساپاردا جەكسەنبى كۇن،
پويەز مىندىك شامنان ءبىز كەشىندە ءتۇن.
بيروت شاھار جولىنا ساپار شەگىپ
ءتۇن ءجۇرىپ كىردىك ەرتە دۇيسەنبى كۇن.

كارەنتين ءۇش كۇن تۇردىق مۇندا تاعى،
جول جۇرگەنگە دەن ساۋلىق ەردىڭ باعى.
كارەنتيننەن بوسانىپ شاھار كىردىك
ءتورتىنشى كۇن بەيسەنبى بولعان شاعى.
شاھارعا كىرىپ تۇردىق پاتەر الىپ،
جيىلعان توڭىرەكتەن ءاربىر حالىق.
ەندى قالعان كوڭىلدە ماقسۇت ارمان
زيارات ەتۋ بولدى قۇددىس بارىپ.

جولداستار ءبىرى ناۋقاس، ءبىرلارى ساۋ،
ساۋلارى اقىل قوسپاس باۋ مەنەن تاۋ.
باعزانلارى اقشا از دەپ ۋايىم قىپ
مۇنداي بولسا قۇددىسقا بارمايمىز - اۋ.

تورە سىزىپ اۋىردى وسى جولدا،
جۇرت ايتتى بارساق - اۋ دەپ اقشا مولدا.
اقشامىز دا از، تاعى بار ناۋقاسىمىز
بۇل جولعا بارا المايمىز دەدى - اۋ سوندا.

سونىمەن توقىرادىق وندا بارماي،
ەرجىگىت ءىس بىتىرمەس باتىل بولماي.
اللانىڭ بۇيرىعىنشا ءدام تارتپادى
وسىمەنەن جونەلدىك ارمان قانباي.
جاقسى - جامان تاعدىردىڭ ءبارى حاقتان
شارا بارما تاعدىرعا پەندە نانباي.

بيروتتا ءۇش كۇندەي ءبىز ەرۋ جاتتىق،
جۇما وقىپ قىلسا ساۋاپ تاپتىق.
ياقيا ءنابيدىڭ ءبىر ورنى بار دەپ
زيارات قىپ وعان دا كىرىپ باقتىق.

مۇندا دا موي مۇباراك بولادى ەكەن،
ءتاۋاب قىلساڭ كوڭىلىڭ نۇرعا تولادى ەكەن.
جاقسىلىققا توياما پەندە جانى
قاناعات، نىساپ قىلسا بولادى ەكەن.


قاجىشىلار شاھاردى ارالادى،
ساۋعا الماققا كوشەسىن جاعالادى.
باسشى ادامدار توقتاتتى بايىزداتىپ
ستامپولعا بارعاندا ال دەپ ولاردى.

ستامپولعا جۇرمەككە باستىق قادام،
ىزدەپ كەرەك الماققا قالىڭ ادام.
جىگىرمانشى ساپاردا دۇيسەنبى كۇن
كەمەگە شىقتىق كەلىپ كەشكە تامان.
جۇرۋگە بۇيرىق بولماي كەمە ونان،
سەيسەنبى، سارسەنبى كۇن تۇردىق تامام.
بەيسەنبىگە قاراتا كەمە ءجۇردى
بۇل ءبىر شارقىش كەمە ەكەن وتە جامان.

بۇقاداي ورگە ايداعان ەنتىگەدى،
مالتاقتاپ شايقالادى جەل تيەدى.
ىشقىنىپ سۋدى ساباپ سۇر شورتانداي
يزمەرگە ءتورت تاۋلىكتە ءبىر تىرەلدى.
ادامزات مۇنداي كەمە جاسايدى ەكەن
داۋىسى دا وياتار ۇيقىلى ەلدى.
دەگەندەي كوكجالقاۋدىڭ قورىلىنا
قورادا ەمەس ۇيىنەن ءيت ۇرەدى.

يزمەردە ءبىر كۇن تۇرىپ تاعى جۇردىك،
كوپ ەكەن قازىنا - مۇلىك كورىپ بىلدىك.
باعاسى دا ارزانلىق كيىم - تاماق
جولاۋشىمىز اقىرى كەمە مىندىك.

كوشەلەرى رەتتى جاقسى - اق ەكەن،
سالعان ءۇيى كوك ءمارمار تاستان ەكەن.
جول شىعىپ، دەن ساۋ بولسا كوپ ارالاپ
قىلارلىقتاي جەر ەكەن پاتشا مەكەن.
يزمەردەن فرانسۋزدىق كەمە مىندىك،
ۇيرەكتەي تەڭىزدىڭ كوك سۋىن تىلدىك.
جاقسى كەمە ميحىناتى از بولادى
جۇرە - جۇرە ونىڭ دا سىرىن بىلدىك.

قالتوقان تورە ناۋقاس وسى جولدا،
عارىپ بوپ ءجۇرىپ ەدى ارەڭ زورعا.
فرانسۋز كەمەسىنىڭ دوحترى الماي
يزمەردىڭ پاتشالىعى الدى قولعا.

بەيشارا يزمەردە قالدى پاقىر،
باسقا ءىس تۇسسە سەپ قىلماس سەرگەك اقىل.
جولداستان جولداس قالىپ ايرىلعاندا
باسقا كەپ ورناعانداي زامان اقىر.

ءبىر تاۋلىك ءجۇرىپ كەلدىك ستامبولعا،
جاقىنداپ كەپ قوسىلدىق بارعان جولعا.
ستامبولعا كىرگىزبەي قاماپ قويدى
شاما جوق كارەنتين دە قالىڭ سورعا.

سۇلتاننىڭ ورداسىنا تۇردىق جاقىن،
كورىپ تۇردىق وسى دەپ عيماراتىن.
ءدىن ءىسلام قۇرمەتىنە دۇعا قىلىپ
وقىپ تۇردىق پاتشالىق عيزات حاقىن.

ايا سوفيا مەشىتى تۇر الدىمىزدا،
ونىڭ دا كورىپ تۇردىق عيماراتىن.
پاتشالار عارىپ جايىن تەكسەرە مە
قايدان ءبىلسىن قازاقتىڭ ءناسىل زاتىن؟!

مامىربەك وسى جەردە ويلادى اقىل،
قالتوقان عارىپ بولىپ كەيىن جاتىر.
سۇلتانسەيىت بارىپ كەل دەپ ءامىر قىلدى،
جارايدى دەپ ول داعى كوردى ماقۇل.
ولسە قويىپ، الىپ كەل ءتىرى بولسا،
نە بولادى جولداس جوق قالعان پاقىر.
اققوي بارسىن قاسىڭا جولداستىققا
ەكى ادام بىرگە جۇرسە بولار باتىل.

مىڭ ەكى ءجۇز سوم الىپ قاراجاتقا،
ەكەۋى ءجۇرىپ كەتتى يزمەر جاققا.
امان بارىپ كەلۋىن تىلەپ قالدىق
دۇعا قىپ جالبارىنىپ جالعىز حاققا.

ءبىز تۇردىق كەمە ۇستىندە ءبىر - ەكى كۇن،
بارابار بۇيرىق كەلسە كۇن مەنەن ءتۇن.
كەمەدە دامبىل سوپى دۇنيە سالدى
كىمگە وپا قىلادى دۇنيە سۇم.

بەيشارا وپا تاپتى دۇنيە سالىپ،
شىبىنى شىرىلدادى بەك قينالىپ.
وكىل بوپ مايقى بارىپ ءدافين قىلدى
جاساۋىلدار اكەتىپ قويدى اپارىپ.

ماڭكىباي ەد جولداسى قاسىنداعى
ول دا كەتتى بەلەتىن الا بارىپ.
سۇلتاننىڭ ادامدارى ءتارتىپ ساقتاپ
قويمايدى جۇرۋىڭە ەرىك الدى.

اقىرى ستامبولعا كىرە المادىق،
كەمە ۇستىندە كوپ كۇندەر تۇرا المادىق.
اۋىسىپ ورىستاردىڭ كەمەسىنە
قارا تەڭىز ۇستىمەن بۇراڭدادىق.

جەتكىزبەككە ھادىسكە ۋادە ەتتىك،
ءبىر تاۋلىكتەن اسقاندا ھادىس جەتتىك.
تەڭىزدەن امان - ەسەن شىققانعا ايتەۋ
قۇدايعا مىڭ مارتەبە شۇكىر ەتتىك.

بەيسەنبى كۇن رابىق اۋال ايى،
ءبىر تۇنەتتى كەمەگە كادەن - باجى.
بەس جاڭاسى دۇيسەنبى جەرگە ءتۇسىپ
بۇعان دا تاۋبە قىلدىق ءبىز قۇدايى.

كادەنشىلەر ءتىنىتتى بۋعان جۇكتى،
اتكەز نارسە بار ما دەپ تىققان ءتىپتى.
انا - مىنا «كورىمدىك» نەگە الماسىن
ايتسە دە اڭعارىمىز امان شىقتى.

ھادىستە دۇنيە سالدى باباقان شال،
كۇن كەلسە كىمگە جولداس باس مەنەن مال.
ھادىستەگى نوعايدىڭ يمامىنا
اقشا بەرىپ تاپسىردىق قابىرگە سال.

كەرەگىنە بەرىلدى ءبىر ءجۇز تەڭگە،
باسقا تۇسسە كونەدى اركىم جونگە.
تاپقانىمىز سول بولىپ تاپسىرىستىق
مۇحتابار كىسى جوق بوپ ونان وڭگە.

بەيسەنبىنىڭ تۇنىندە پويەز ءجۇردى،
ءبىر تىركەۋى جيىرما - وتىز بىلسەڭ ونى.
ەكى تاۋلىك جول ءجۇرىپ توقتاماستان
جۇما كۇنى كارمانشوققا كەلىپ كىردى.

نيرول دەگەن وزەن بار وسى جەردە،
اقىرى قارا تەڭىز قۇيار كولگە.
نيرولدىڭ كوپىرىنەن وتە شىعىپ
ەرتەڭىندە حاركوفقا كەلدى - اۋ ەندى.

نيرولدىڭ وزەندەرى ورماندى، ءشوپ،
تەڭىزدەن بەرى وتكەن سوڭ ەگىندىك كوپ.
حاركوفتا ءبىر تاۋلىكتەي بوسقا تۇرىپ
جالىقتىق بۇل پويەزدى بولمايدى دەپ.
كىسى باسى جىگىرما ءۇش سوم تولەم تولەپ
شىعىپ كەتتىك كوپ شىعىن بولماسىن دەپ.

تورە ءمىندى ءتورت كىسى پەرۋاي جالداپ،
قىرىق تەڭگە ومسىكىگە بەردى ارناپ.
ءتورت - بەس كۇنگە وزگەمىز پويەز مىندىك
بولماسىن دەپ اقشامىز ارتىق سىراپ.

ءبىز وتتىك حيكمەتتى كوپىرلەردەن،
پويەز جول تاۋدى تەسىپ زىركىلدەگەن.
فىنزى دەگەن جەرگە دە كەلىپ جەتتىك
جاي قازاق كەلمەيتىن جەر وتىنگەنمەن.

بۇل ساپاردا ءار ءتۇرلى جەردى كوردىك،
سول پويەزبەن جۇردىك تە سامار كەلدىك.
جەرگە تۇسپەي پويەزدەن جالىققان سوڭ
ونى قويىپ ماشينا مىنسەك دەدىك.
ون بەس كۇندەي ەت پەن ماي كورمەپ ەدىك
سول جەردەن ەت پەن مايدى تاۋىپ جەدىك.
ماشينانى تابا الماي جالداپ الار
اينالىپ كەپ پويەزعا تاعى مىندىك.
پەتروگرات بەلەتىن ساتىپ الىپ
ەرتەڭىندە ول جەردەن سوندا جۇردىك.
كەزىندە وقىلاتىن ناماز بامدات
پەتروگرات كوپىرىن كەلىپ كوردىك.
تاڭ قالدىق بۇل كوپىردىڭ بىتۋىنەن،
كوپىردەن پويەز ءوتىپ كەتۋىنەن.
ورتاسىنان كوپىرى كوككە اشىلىپ
سۋىنان زور كەمە ءوتىپ كەشۋىنەن.
ۆولگا دەيتىن بۇل وزەن ەدىل - جايىق
تانيسىڭ سولتۇستىككە كەتۋىنەن.
ورىس تا اسقان ونەرلى حالىق دەيسىڭ
دارياعا مۇنداي كوپىر ەتۋىنەن.
ءۇش شاقىرىم بولعانداي سۋدىڭ ەنى
قايرانسىڭ بۇعان كوپىر بىتۋىنەن.
كوپىرىنىڭ ۇستىندە شويىن جولى
اشىلىپ سۋدان كەمە وتۋىنەن.
تەمىر كوپىر ەسىكتى ەكى جاعى
ساقتانعان حاۋىپتى ءىستىڭ وتۋىنەن.

عابدوللين شاھارىنان كەسىپ وتتىك،
ايگىلى ۋفا شاھارعا كەلىپ جەتتىك.
ءبارىن كەزبەك قايدا بار مۇساپىرگە
كورگەن، تۇسكەن جەرلەردى تاماشا ەتتىك.

ورال تاۋدان ءبىز وتتىك جەكسەنبى كۇن،
پويەزعا بىردەي ەكەن كۇن مەنەن ءتۇن.
تاۋدى جارىپ جول سالعان تاستى شاۋىپ
پاتشالىقتىڭ كۇشىندە بولمايدى ءمىن.

عاجايىپ بۇل پاتشالىق قىلعان ىستەر،
اقىل جەتپەس ءىس قىلعان كوپ مىنىسكەر.
كوشپەندى ەلگە مۇندايدى قىلۋ قايدا
بولماسا ناس ۇيقىدا كورگەن تۇستەر.

ورالدى كەزە اينالىپ كەسىپ وتتىك،
زالا تاۋ دەگەن بەلگە سوندا جەتتىك.
ايالداماي ول پويەز وتە شىقتى
تەمىر كەنىن كورە الماي قاپى كەتتىك.

شەلەبەگە ءبىز كەلدىك ونان بەرمەن،
ونىڭ ءبارى شاھارلار جولدا كورگەن.
قايتا اۋىسىپ پويەزعا شىعىپ الدىق
ءبىر اۋىسار عاداتى مۇندا كەلگەن.

ونان شىعىپ ءبىز كەلدىك پەتروپاۋىل،
قىزىلجار دەپ ايتادى قازاق قاۋىم.
ەسىل، نۇرا، قاراوتكەل ءور جاعىندا
بۇل ارادا كوپ ەكەن قازاق اۋىل.

ءۇش كۇن تۇردىق ارالاپ قىزىلجاردا،
كەرەكتى زات الدىق پۇل قولدا باردا.
عابدوللا، سابىرجانداي نوعايلاردىڭ
ەكى - ءۇش كۇن قوناق بولدىق پاتەرىندە.

ونان تاعى جونەلدىك پويەز ءمىنىپ،
ومىسكىگە ءبىز كەلدىك ءبىر ءتۇن ءجۇرىپ.
قازاق كەرەي كۇدەرى مۇسا ۇعلىنا
تىنىقتىق پاتەرىنە كەلىپ تۇرىپ.
ءوزى موللا، ءمۇلايىم ادام ەكەن
بەيشارا قۇرمەتتەدى قوناق قىلىپ.
مىڭ مارتەبە شۇكىرلىك جاراتقانعا
ماقسۇتىمىزدى ورىنداپ كەلدىك تىرىك.

ومبىدا ءتورت - بەس كۇندەي ەرۋ تۇردىق،
ءمۇساپىردىڭ بولادى كوڭىلى مۇڭلىق.
الدىڭعى جىل اباقتان وتكەن قاجى
ءدالىبايدىڭ قابىرىن زيارات قىلدىق.

مۇسىلماندار سيلايدى ءمۇساپىردى،
ونىڭ ناعىن زيراتتا كورىپ بىلدىك.
وزگە جولداس قالديلار كەمە توسىپ
ءبىز جۇرۋگە ات - اربا جالداپ مىندىك.

جونەلدىك كوپ جولداسقا امانداسىپ،
ەسەن بار ەلدەرىڭە دەپ جىلاسىپ.
مامىربەك قاجى، عابدوللا، باشىق موللا
امانلىق بارشامىزعا بولسىن ءناسىپ.

ءۇش تاۋلىك ومىسكىدەن جۇردىك قاتتى،
ون التى بەكەت ەكەن جەرى ۇزاقتى.
كەرەكۋگە ءبىز كىردىك ءۇشىنشى كۇن
بەكەت سايىن جاڭالاپ ارباعا اتتى.

قازاقتا باسەنتيننەن قىستاۋبايعا،
كەلىپ ءبىراز تىنىقتىق پاتەر جايدا.
رابىح اقىر ايى سوندا تۋىپ
جاز شىعىپ جاقىنداسىپ قالدى مايعا.

ءۇش جاڭا دۇيسەنبى كۇن مىندىك كەمە،
جايباسار جۇك كەمەسى ميمىرت نەمە.
ءتورت - بەس تاۋلىك سەمەيگە ازەر كەلدىك
ۇزاق جولعا شاباندى جاقسى دەمە.

سەمەيدە ءۇش - ءتورت كۇندەي ەرۋ بولدىق،
ادام ءۇشىن ابىروي داۋلەت مولدىق.
كامالي، سىدىق دەگەن عازەز جانلار
بىزلەردى قاتتى سيلاپ قوناق بولدىق.
ىبىرايحاننىڭ ۇيىنە قوناق بولىپ
شاتلىققا قۋانىسىپ قاتتى تولدىق.

جەكسەنبى كۇن ماشينا تاۋىپ مىندىك،
دۇيسەنبى كۇن جايسانعا قاراي جۇردىك.
سارسەنبى كۇن ءبىز ءوتىپ دوم تۇسىنان
جۇما كۇن جايسانعا كەلىپ كىردىك.
كەشكە جاقىن تۇعىلعا كەلىپ توقتاپ،
از عانا كەمە ۇستىندە قاراپ تۇردىق.
تەڭىز، داريا، تاۋ، شولدەن امان ءوتىپ
اللانىڭ قۇدىرەتىنە شۇكىر دەدىك.
اقىرىن زايا قىلما پاتشا قۇداي
اينالعان جىل قۇسىنداي پاقىر مۇڭلىق.

تۇعىل دەگەن جايسان كول جاعاسى ەكەن،
التايدىڭ تومەنگى ەرتىس دالاسى ەكەن.
كەرىمبەردى، ءسالىمجان دەگەن زاتلار
اقىلى كوپ ادامنىڭ داناسى ەكەن.
ساۋدامەن ەربىت، ماسكاۋ بارىپ جۇرگەن،
داۋلەتكە دە كوپ جاننىڭ اعاسى ەكەن.

مارحامات بۇ كىسىلەر بىزگە تانىس،
بۇرىننان بەك سويلەسىپ بولعان انىس.
سەمەيدەن تەلەگرام بەرىپ ەدىك
اۋىلىمىز بولعان سوڭ ءالى دە الىس.

ات شەگىپ كەپ تۇرىپتى ءسالىمجان باي،
كەلىپتى بىزدەن بۇرىن، كەيىن قالماي.
ساعىنعان مۇڭلىق بولىپ بەيشارالار
قاۋىشىپ كورىسكەن سوڭ كوڭىلىمىز جاي.

ساعىنعاننان جىلاسىپ امانداستىق،
ايرىلماي قۇشاقتاسىپ تابانداستىق.
دۇنيە شىركىن ءار جەردە تابىلادى - اۋ،
ءبىلىمدى ادامدى ادام تابا الماستى.
ەرتەڭىندە ءبىز كەلدىك جايسان قالا،
ساقتاعان ءار قاتەردەن اللا تاعالا.
شاھيتلىككە بارىپ ءبىز زيارات ەتتىك
الدىڭعى جىل سوندا وتكەن سادىق اعا.
قاجى جولدا سوندا وتكەن سادىق اعا،
ءبارىمىز ءبىر اتادان تۋعان بالا.
عاربىلىكتە وتكەنى ەسكە ءتۇسىپ
كوزىمىزدەن جاس اقتى ەستەن تانا.
وتكەنگە يمان، تىرىگە ساۋلىق بەرىپ
بارشامىزعا بولاگور ءتاڭىرىم پانا.
دۋاندا احىمەت زاكي يمام احۇن
امانداسا كەلىپتى عىلىم دانا.

مويىدىن عابدولعاني كەلدى تاعى،
جايسانعا ءبىز پاقىردىڭ كەلگەن شاعى.
احىمەت يمام، ءۋالي ءانۋاروۆ
كورىستى مەدرەسەدە جاننىڭ ءبارى.
مۇعالىم، مۇتتاعالام بارشا زاتلار
كورىسىپ بەك تاماشا قىلدىق انى...
جىگىتتەر، اقىر ءتۇبىن كامىل ويلا،
قالادى ءار پەندەدەن دۇنيە ءپاني.
قۇدايىم اقىرىنا بەرىپ حايىر
تارقاسىن مومىنلارنىڭ قايعى عامى!

جايساننان بەرى ءجۇرىپ كەلدىك ەلگە،
اباق ەل، التاي، ساۋىر مەكەن جەرگە.
قازىرەت اتا مەكەنىن زيارات قىپ
كەلدىك قوي تۋىپ وسكەن التاي − كەڭگە.
اتا - انا − ۇلىق زات، ەل مەنەن جۇرت
امانداسىپ تىنىعىپ كىردىك وڭگە.
ءار ءىستىڭ ارتقى جاعى حايىر بولسا
جول ءجۇرۋ ۇلكەن مەرەي جىگىت شەرگە.
بار ءىستىڭ الدى - ارتىن اللا بىلەر
اللادان بۇيرىقسىز - اق بولار دەمە.

مۇسىلماندىق جولىنا كامال پەندە،
بۇگىنگى ءىستى قالدىرماس كۇنى ەرتەڭگە.
دەنەگە جانىڭ قوناق شولاق ءومىر
مۇساپىرلىك سونداي ءىس بىلگەن ەرگە.
ءىز قالسىن ارتتاعىعا ساپارىمنان
دەپ جازعان ءبىر بەلگىم عوي جالپاق ەلگە.
رازى بول ەل - جۇرتىم ءسوز بولسا دا
مۇرام جوق تاستاپ بەرەر مۇنان وزگە.
«قاجى بايان» دەپ قويدىم جىردىڭ اتىن
بەلگى دەپ قاجى جولى بىلگەن ەرگە.


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428