قازىرگى ورنىڭىز:ولەڭدەر مەن جىرلار » تولىق مازمۇن

بەتاشار

قوسىلعان ۋاقىت:2016-03-01كورىلىمى:加载中

بەتاشار باسى ءبيسمىللا،
ءبيسمىللا كەلەر مىڭ جىلدا.
از وسيەت ايتايىن،
شۋىلداماي ءسوز تىڭدا.
مەن ايتايىن بەتاشار،
جاماندىقتان جان قاشار.
جاقسى ىرىمعا بەتاشار،
اشىلعاندا جاماندىق،
جىن - شايتان بولسا شەت قاشار.
جاڭا كەلدىڭ كەلىن جان،
قوناقسىڭ عوي سەن مۇندا.
ويىن - كۇلكى، توي بولار،
كەلىننىڭ بەتىن اشقاندا.

كەلىن كەلدى سابىلىپ،
تورعىننان جەلەك جامىلىپ.
كەلىن كەلدى دەگەندە،
بالالار ءجۇر ساعىنىپ.

ال ايتايىن بەتاشار،
جاماندىقتان جان قاشار.
ۇلكەنىڭ بار، كىشىڭ بار،
نە دەپ ايتسام ۇناسار.
جاقسى كەلىن سەن بولساڭ،
جاقسىلىق كوپ جاناسار.
قۇدايدىڭ بەرگەن باعىنا،
قانداي جان شىعار تالاسار.
ءبىلىمدى بولساڭ كەلىنجان،
ناشارلارعا جاناسار.
ءبىلىمسىز بولسا كەلىنجان،
جىلتىراققا تالاسار.

كەلىننىڭ بەتىن اشايىق،
ۇلكەننەن ۇلگى شاشايىق.
بەتاشاردى جول قىلعان،
بۇرىنعى وتكەن ماشايىق.

اۋەلى سيلا اتاسىن،
اتانىڭ الار باتاسىن.
باتا دەگەن ىقىلاس،
كورسەتەر جولدىڭ قاتاسىن.
ىقىلاس اشار جولىڭدى،
ونان ءلاززات تاتاسىڭ.
جاقسى كەلىن سەن بولساڭ،
ەلىڭە ۇلگى شاشاسىڭ.
ۇلگى بەرىپ زامانعا،
جۇگىرە زىرلاپ باساسىڭ.
كەلىنى كەلىپ قۋانعان،
كيت كيىپ، سي العان.
كورىمدىگىن بەرەتىن،
اتاسى ەندى اتاسىن!
اتاڭىزعا ءبىر سالەم!
ءبيسمىللا ءسوزدىڭ ۇلگىسى،
جامان كەلىن بەلگىسى
قيقاڭداپ باسار اياعىن.
ەڭسەسى تومەن باسىلىپ،
توسەك ورنى ءشاشىلىپ.
كوسەۋدەي قىپ وت كوسەر،
اتاسىنىڭ تاياعىن.
جاقسى كەلىن جان سەبىل.
بارلىق ءىسى باپتاداي،
اتاسىنىڭ الدىنان،
سالەمسىز كەسىپ وتپەيدى
ادەبىنەن اتتاماي.

ونان سوڭ سيلار اناسىن،
ەنەسى بايقۇس نە دەسىن.
ەنەسىنەن باتا السا،
كەلىنگە ايتار كەڭەسىن.
وت اۋىزدار سىرىڭدى اپ،
كەلىنى جامان دەمەسىن.
جاقسىدان ۇلگى ەرگەنگە،
اقىل - كوڭىل بولگەنگە.
ءار نارسەگە تالاپ قىل،
قۇمارتىپ ۇيرەن كورگەنگە.
ەنەسى بايقۇس دال بولىپ،
كورىمدىگىن اتاسىن.
كورىمدىككە ىقىلاس،
بەرسىن اق باتاسىن.
ەنەڭىزگە ءبىر سالەم!
ونان سوڭ سيلار قايناعاڭ،
ادەپتى كەلىن ويلى ادام.
ەسىك اشىپ كىرگىزىپ،
تۇسكەندە اتىن بايلاعان.
شاڭ جۇقتىرماي ۇستىنە،
قايناعاسىن سيلاعان.
كورىمدىگىن اتاسىن،
قايناعاسى سايلاعان.
جورعا تايى بار شىعار،
بەلدەۋگە اكەپ بايلاعان.
بەرە الماسا كورىمدىك،
بەكەرگە ءتىلىم زارلاعان
بۇعان قاتتى تاڭعالام!
قايناعاڭا ءبىر سالەم!
ونان سوڭ سيلار ابىسىن،
ابىسىن مۇندا بارمىسىڭ.
ءبىر اياق ۇيدە اس بولسا،
ابىسىن ىشەر جارمىسىن.
كورىمدىگىڭدى اتاپ شىن،
جەڭەشە مۇندا بارمىسىڭ!
ابىسىنعا ءبىر سالەم!
ونان سوڭ سيلار قۇربىسىن،
قۇربىسى مۇندا تۇرمىسىڭ.
ءوز تۇسىڭدا كەز بولعان،
كەلىننىڭ بەتىن كوپ اشقان
مەن دە ءبىر ىستىق دەڭگەگىڭ،
اشىق تا ءتاتتى ايتايىن.
اتادان قالعان ەرمەگىم،
بولماسا دارا قاقسايتىن
قۇربىلاسى سەن بە ەدىڭ.
بەتىن اشۋدى ۇيعارعان.
بەتاشار قاينىڭ مەن بە ەدىم.
قۇربىلارىڭا ءبىر سالەم!
تۇيە بەرسەڭ اعىنان،
بوتالاپ وسەر باعىنان.
ءوز تەگىنە تارتادى،
بالتا وزباس سابىنان.
اتاسى ەنشىسىن بەرىپتى،
وسەر - وسپەس باعىنان.
جۇرت اش دەپ ماعان بەرگەن سوڭ،
شىعا المادىم داۋىنان.
بەزىلدەگەن مەن قۋ جاق،
شىعىپ ەدىم ازەلدەن.
ماي سالىپ وتقا تامىزىپ،
كەلەت دەپ كەلىن ساعىنىپ.
بالالار شۋلاپ دۋلاپ ءجۇر،
بايگە اتتاي جاراۋ سابىلىپ.

ايتقان ءسوزىن زاڭ قىلعان،
ۇلىقپان حاكىم، شۇعايىپ.
پايعامبار سالعان سانات قوي،
جاقسى ءوسۋى ۇلعايىپ.
كەيىمە، كوپ جىلاما،
سابىرلى بول سىنالا.
كۇن سايىن جۇرتىڭ جيىلار،
بۇل اي ۇنەم تابىلماس.
كەزىپ كورىپ ءجۇر شىعار،
قىزىر مەنەن ءىلياس.
ورنىعىپ جۇرەك توقتاماي،
وكسىگىڭ سەنىڭ باسىلماس.

ءباتيما، زەينەپ اپاڭىز،
جۇرەكتە قايعى - قاپامىز.
ۇزاتىپ قىزىن سالىپتى،
بۇرىنعى اتا - انامىز.
ايتسام ارعى حالىقتى،
نۇح پايعامبار بولىپتى.
جالعىز قىزىن ۇزاتىپ،
ول دا اپارىپ سالىپتى.
جاماعاتقا ءبىر سالەم!
ءبىر اي بولماي تۇرعانشا،
سۋعا بار ما ىرعالىپ.
ابىسىڭا جاعارسىڭ،
مىنەزىڭ بولسا ءبىر قالىپ.
ەرتە جاتىپ، جاي تۇرما،
جۇمىسىڭنان قۇر قالىپ.
تاكاپپار بولما، شىراعىم،
قالاسىڭ جۇرتقا سىنالىپ.
كەلىن جامان دەگىزىپ،
بەتكە سالىپ ءبىر سالىق.
ايتقان ءسوزدى ۇعىپ ال،
بولعاندا ۇيدە ەل تانىپ.
زامانداسىڭ كەلگەندە،
بوس مىنەزىڭ كورگەندە.
وسەك ايتىپ قوزدىرما،
ءۇيىڭدى ءشاشىپ توزدىرما.
ۇيىڭە كىسى كەلگەندە،
ۇيالماس بول ەلدەن دە.
ءۇستى - باسىڭ ۇيپالاق،
جيعان جۇگىڭ قۇيقالاق،
جۇرمەسىن دەنەڭ اشىلىپ
نە دەيمىن بۇدان اسىرىپ.
ادەپتى، جاقسى بولساڭىز،
قادىرلەسە ورتاڭىز.
جاماندى قويار جاسىرىپ.
ءبارىنىڭ دە شەگى بار،
ءبارىنىڭ دە تەگى بار.
شەگىنەن اسساڭ قالماي ما،
جاسىرعانىڭ اشىلىپ.
پايدالى سوزگە ەرمەگەن،
سوزىنە ەلدىڭ سەنبەگەن.
ءوز ءسوزىن عانا ءجون كورگەن،
اراداعى دۇشپاندار
بولسىن دەپ اتەي دەم بەرگەن.
الۋدى ءبىلىپ بەرمەگەن،
تاتۋ جۇرمەس ەلمەنەن.
بەتالدى سويلەپ دۇرىلدەپ
جەتپەسكە قولىن سەرمەگەن،
قاينىڭدى قالقام قادىرلە،
قاينىڭا دا ءبىر سالەم!
جامان كەلىندى ايتسام مەن،
تىنىم اپ تۇندە جاتپاعان.
ەرى ۇمتىلار قالباڭداپ،
كەلىن قاشار جالباڭداپ.
بۇتيىپ جۇرمە كەلىنجان،
كوڭىلىم سەنەن قالعان دەپ.
بيالى كەلىن بولاگور،
اتا - اناڭنىڭ قامىن جەپ
ەرتە تۇرىپ سۋىن جىلت،
ازىرلەپ اسىن، شاي، تۇزىن
جاس بالاداي كورىپ كۇت.
قاسىڭا كەلگەن بالانى،
جاقسى سيلا كورمە سىرت.
كۇلە سويلەپ الدارسىڭ
ار جاعىڭدا بولسا جىلىت.
ەل سوزىنە ىلەسىپ،
اسا سويلەپ بولما قىرت.
ۇلگى بولساڭ كەلىنجان،
الار ءتالىم سىزدەن جۇرت.
جاماعاتقا ءبىر سالەم!
جامان كەلىندى ايتسام مەن،
ەرتە جاتىپ ۇيىقتاپ،
تۇسكە تامان تۇرادى.
قاسىنا كەلگەن بالانى،
جاقتىرماي جاسقاپ ۇرادى.
بەتىن دە جۋماي تۇرا ساپ،
شاۋگىمگە شايىن قۇيادى.
العان جارى بەيشارا
قاتتى ايتۋعا شاما جوق.
ىزا بوپ ىشتەي تۇرادى.
جامان كەلىن بەلگىسى،
وسەك ايتار تىڭقىلداپ.
ورىنسىز كۇلەر جىرتىڭداپ،
ەرىنەن ءبىر ءسوز ەستىسە
تىنىش الار بۇرقىلداپ.
بىرەۋدىڭ ايتقان ءسوزى ءۇشىن،
دودا بوپ سويلەر بۇرتىڭداپ.
پايدالىعا ەرمەگەن،
سوزىنە حالىق سەنبەگەن،
ءوز ءسوزىن ءوزى ءجون كورگەن،
بەدەۋ اتقا جەم بەرگەن،
ەلدەن العان بەرمەگەن.
تاتۋ جۇرمەس ەلمەنەن،
جەتپەسكە قولىن سەرمەگەن.
بىلگەنگە جانعا ءبىر سالەم!
اقىلىڭ دانا بار بولسا،
ماقتاۋدى جۇرتقا شاشايىق،
مىنەزىڭ جامان تار بولسا،
ماڭىڭنان تەز قاشايىق.
اپتىعىپ كەلگەن اساۋدىڭ
بۇل اپتىگىن باسايىق.
مەن ايتايىن وسيەت،
ۇلكەنگە قىل قىزمەت.
سۇيكىمدى بولساڭ ەلىڭە،
باسىڭا قۇنار باق داۋلەت.
ۇلكەننىڭ ءتىلىن قايتارما،
ماقتاۋعا جاقسى ايتارما.
تاكاپپار قىلتىڭ تار مىنەز،
جاقىن بولما شايتانعا.
بەرەكەلى ءدانىڭدى،
بەرەكەسىن كەتىرىپ،
ەلگە شاشپا بارىڭدى.
ءدانسىز وتىر دەگىزىپ،
كەتىرمە كەلىن سىنىڭدى.

تازالىعىڭ بولسىن اق قاعاز
ەلىمەن بولما ءدۇرداراز.
جات ەلگە كەلدىم دەمەڭىز
ىشتەي ويلاپ جۇرمەڭىز.
ۇيدەگى ءدانىڭ تاۋسىلىپ
ەلگە كۇلكى بولماڭىز.
مىنا ايتقان اقىلىم،
قۇلاق سالىپ تىڭداڭىز.
ۇلكەندەر ايتقان اقىلدى،
انىق ۇعىپ الىڭىز.
اقىلدىڭ تىڭدا تۇراعىن،
ۇعارسىڭ بولسا قۇلاعىڭ.
كۇن شىعارىپ تۇرماڭىز،
جەلىپ تۇر جۇردەك جورعاداي.
اتىپ تۇرساڭ قورعانباي،
راقات كۇتىم ويلاماي.
وسىنداي بولعان كەلىنگە
باق كەتەمە ورناماي.
وتىرىپ الما جالپيىپ
تالقان سالعان دورباداي،
وبالىڭ بولار وزىڭە،
قالماسسىڭ ءتۇبى سورلاماي.
ءيبالى سويلە كەلىنجان،
قويىپ قالما بولجاماي.
جاقسى كەلىن سەن بولساڭ
ەل - جۇرتىڭ تۇرماس قورعاماي.
ەل باتاسىن العان سوڭ،
باسارسىڭ اياق جورعاداي.
قالجىڭ ءسوزدى شىن كورىپ
قالماڭىز اكاۋ، بۇل قالاي؟!
1899 - جىل


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428