قازىرگى ورنىڭىز:ولەڭدەر مەن جىرلار » تولىق مازمۇن

بەتاشار

قوسىلعان ۋاقىت:2016-03-01كورىلىمى:加载中

ۇلكەننەن رۇقسات اپ قۇربىم،
بەت اشۋعا كەپ تۇرمىن.
اتقارۋعا بۇل ءىستى،
مەنى دە بەس جىل توستىردىڭ.
باتالاسىپ ۇلكەندەر،
تىلەگەن ساعان دوستىعىن.
قۇس ەدىڭ ۇشقان سەن عايىپ،
ءبىز تۇسىردىك تور جايىپ.
تۇعىرعا بۇگىن قونعان سوڭ
قۋانىپ تۇرمىن سىز جايىپ،
اقىلدى بيكەم ويلانشى
نە دەسەم سىزگە لايىق؟!

ۇرپاقتى باۋلىپ ءوسىرۋ،
اتا - انانىڭ مىندەتى.
تاربيەمەن ەرجەتۋ
ۇرپاقتىڭ ۇلى قىزمەتى.
اتا - اناڭنىڭ ءۇمىتىن
اقتايمىن دەپ ويلاساڭ
ۇيعارعانىن وزىڭە،
ورىنداي ءبىل قاي - قاشان.
ويتكەنى بارلىق اتا - انا،
بالاسىنىڭ قامىن جەر.
اتا - اناڭ ىقىلاس بەرگەنگە،
تاۋەكەل دەپ سوڭىنا ەر.
سول ءۇشىن قۇربىم ايتامىن،
اقىلى دەپ بارشانىڭ.
باتالى قول ارىماس،
باتاسىز قۇل جارىماس.
مۇنداي كەڭەس ايتار جان،
ىزدەسەڭ دە تابىلماس.
ارسىز كوكبەت اتالماي،
اشۋمەن جارعا تاقالماي،
سۋعا تۇسكەن ساقارداي
بۇرقىلداساڭ جاراماس.

جاراتقاننىڭ زاڭى بۇل،
قىز بالا ەلدىڭ قوناعى.
باعى جانعان قىزداردىڭ
كەلگەن جەرى بولادى
ماڭگىلىك ءورىس سونارى.
ول جەردە ول وركەندەپ،
ەل اناسى بولادى.
اقىلى دانا ءار بيكە
مۇنى زاڭ دەپ ۇعادى.
سول ءۇشىن دە كەلە ساپ،
تاڭ بوزىنان تۇرادى.
تازالانىپ تاپتەشتەپ،
بەتى - قولىن جۋادى.
نامازدارىن ورىنداپ
اللاعا قۇلشىلىق قىلادى.
ءۇي جۇمىسىن ورىنداپ،
ءبارىن تىندىم قىلادى.
تاڭعى استارىن ازىرلەپ،
ەل كوڭىلىنەن شىعادى.
وسىنداي بولعان كەلىندى،
ەلى دە قۇرمەت قىلادى.
قۇتتى بولسىن كەلىنجان،
مۇندا باسقان قادامىڭ.
وزىڭدەي ەركە ول ءبىر جان،
قوساق بولعان ادامىڭ.
باقىت بەرسىن سەندەرگە،
تارتقان جان بوپ تەگىنە.
مال مەن باسىڭ تەز ءوسسىن،
ەل سالتىنا بەرىلە.
جاقسى دەگەن اتتارىڭ،
اينالسىن ەلدىك سەنىمگە.
اتا - انا، قايىن، قايناعا،
ابىسىن، ءسىڭلى، ەرىڭە.
اتاسىنا ءبىر سالەم!
توسەك ورىن، ءۇستى - باس،
كىرىڭدى جۋماي، قىلما لاس.
باس -كوزىڭدى بيتتەتپە.
سەسكەنەر ەرىڭ، قۇربىلاس.
سىبىرتكى، سابىن، سۋ كەرەك،
تازالىق ءدىنسىز جاراماس.
وڭبايتىن سالاق ايەلدە
توزعانىنا قاراماس.
كيىمىنىڭ جىرتىعىن،
ۇلعايتپاي استە جاماماس.
جالاڭ اياق، جالاڭ باس،
ايەلگە ءجۇرۋ جاراماس.
ەرىنشەك بولما − ۇيقىشىل،
شارۋاعا ارالاس.
ابىسىندارىڭ جاقسى ەمەس،
اقىلدارى قارالاس.
سەن ولارعا ۇقساما
ۇيات ۇشقان جاقسى جاس.

ىشكى جۇمىس سەنىكى،
ەرىڭ وعان قاراماس.
قارنىڭ اشسا، شارشاساڭ،
جاسي كورمە سەن بول تاس.
سىپىرىپ ءۇيدى تازا ۇستا،
بالاعا زەكىپ قاتتى ۇرىسپا.
ىشكەن ادام رەنجىر،
ىدىسقا كىر جۋىتپا.
دامبالدىڭ باۋى، بالاعى،
كورىنبەسىن ەش تىسقا.
جەڭىڭمەن سۇرتپە بەتىڭدى،
تۇتقىشپەن شاينەك جانە ۇستا.
شۇبالاڭداتپاي كيىمدى،
ىقشامدى قىپ كي قىسقا.
جاقسى ادامنان ۇلگى الىپ
قاتارىڭنان قالىسپا.
جاماننان جۇعار كەساپات،
دەنەڭ تارتىپ الىستا.
ەنەڭىزگە ءبىر سالەم!
قوي - قوزى مەن ەشكى - لاق،
تۇنشىقتىرما توقپاقتاپ.
بۇكىرەيتىپ بەلىن وكىرتىپ،
بايلاما بۇزاۋ اش قاقتاپ.
ەرتە تۇرىپ جايىلتساڭ،
بەرەدى قۇداي سوندا باق.
سالماقتى بول از ءسوزدى،
ورىنسىز كۇلمە ىرجاقتاپ.
ەرىڭە قىلما قيانات،
باسقامەن ويناپ قىلجاقتاپ.
بۇركەنبەي شاپان باسىڭا،
دارەتكە بار ما دالاعا.
جاس بالا ەرتپە قاسىڭا،
كورىپ قوياد بالادا.
ەكى تىزەڭدى ادىرايتىپ،
دامبالدىڭ ءبيتىن قاراما.
جاقىن جەرگە وتىرما،
بىرەۋ كەلىپ قالاما.
وتە جالتاڭ بولمايدى
ءبىر نارسەنى پانالا.
قولىڭا قۇمان الىپ بار،
كىر - لاسىڭدى تازالا.
جەل جاققا بار ما جانە دە،
ىقتاسىن جەلدى پانالا.
وتە ۇزاق بارساڭ قاسقىر بار،
ول جاعىن ويعا سانالا.
نامازىڭدى تاستاما،
جاس جانىڭنىڭ جولداسى.
قۇدايدى ۇمىتۋ بولاما
اقىلىڭمەن ويلاشى.
دەنەڭ سەرگەك بولادى،
بەيناماز كەلىن بولماشى.
ەرى مەن اتا - اناسى،
قايناعا، قايىن داناسى.
وزدەرىڭ سۇيەپ ادام قىل،
بىرەۋدىڭ بۇل جاس بالاسى.
قولعا تۇسكەن تورعايداي،
پىشىنىنە قاراشى.
اكە - شەشە، ەلىنەن
ايرىلعان بۇل بالاسى.
قورعالاتار بايقۇستى،
سوزدەرىڭنىڭ الاسى.
سەندەردە تەز حابارلاس
ءىنىسى مەن اعاسى.
قايناعاڭا ءبىر سالەم!
قاشقان كەلىن اتانباي،
قوساعىڭمەن تاتۋ ءوت.
ەرلى - بايلى ادامنان
بۇل مىنەزدى كورەم جەك.
بولىمسىزعا بۇلتيىپ،
شارىلداسقان نەگە سەپ.
قيامەتتىك جولداسپەن
رەنجىسپەي تاتۋ ءوت.
كەلىنشەكتىڭ سيپاپ كەكىلىن،
ەرى سەن دە قۇرمەت ەت.
بال جالاسقان دوس بولىپ
بەينەت كورمەي تورگە جەت.
دوستىق، ىرىس، تىنىشتىق،
وجاۋ، ءشومىش، تەگى بار.
قويىندا ەرى، قولدا ءدان،
باقىتتى ايەلگە ەبى بار.
شورشاڭ حانىشا شادىراڭداپ،
اقىلدى ەركەك نە قىلار.
باستارىڭ جاس قاراعىم،
باقىت، داۋلەت تابىلار.
الىس - بەرىس ءبىتىپتى
نەشە جىلعى قۇدالىق.
تىزە تالدى تۇرەگەپ،
وسى اراعا تىنالىق.
اقساقال بەرسىن باتاسىن،
ءسوزدى ءتامام قىلالىق!
1847 - جىل.


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428