قازىرگى ورنىڭىز:ولەڭدەرى » تولىق مازمۇن

اسپانداعى اي مەن كۇن

قوسىلعان ۋاقىت:2016-02-01كورىلىمى:加载中

اسپانداعى اي مەن كۇن،
عالامنىڭ ورتاق جارىعى.
ازەلدە جازعان ماڭدايدان
ءپاندانىڭ ايال تالىعى.
ىلگەرى كەتكەن ءپاندانىڭ،
وسى كۇنگى ادامدار،
ارتىندا قالعان سالىعى.
عالامات بولار ءارتۇرلى
اقىر زامان شالىعى.
ەكى جۇرتتا ءبىر تۇسەر،
قورلىق كورىپ زالىمنان
ءمازلۇمنىڭ قىلعان زارىعى.
تىرەۋى جوق اسپان ـ كوك،
استىمىزدا قارا جەر.
حالقىنا زالىم ءبي بولسا
ەلىن شايقاپ پارا جەر.
اقىلىڭ بولسا، جارانلار،
شاريعات ءسوزىن الا بەر.
كىمدى تەگىن قويادى
دوستىكتەي قىلىپ تىك قازعان،
اتالار جاتقان قارا جەر.
شىنىمەن سورلى بولعانىڭ
ولگەن سوڭ ءبىراق باراگور.
........................
........................
........................
.......................
بۇرىنعى ءبارى قايدا ءجۇر،
عيبىرات الىپ اڭدالى.
عيبىرات الماس سولاردان
ادامنىڭ اپتىق اڭعالى.
كۇنى بىتسە كىم قالار،
قۇدايدان بۇيرىق بولماسا
جەر كوكسەپ كىم ءجۇر بارعالى.

اينالاسى دۇنيەنىڭ،
مۇحيت ـ تەڭىز اينالعان.
قۇداي ءتاۋپيق بەرگەن جان
قۇلشىلىق قىپ پايدا العان.
تەنتىرەپ ءجۇرمىز مال ـ مال دەپ
ولمەي قايسى باي قالعان.
جاياۋمىن دەپ كەدەي ءجۇر،
ات ءمىندى دەگەن ءسوز بارما؟
قىل كوپىردەن ايدالعان.
اقىرەتتە قور بولار،
كۇنا قۋىپ شايتاننىڭ
تۇزاعىنا بايلانعان.

جيىرما بەسى بايقاساڭ،
جىگىتتىڭ كامال تولعانى.
ون سەگىزدە قىز بولىپ
پىسقان ميۋا بولعانى.
ابىروي جەتسە ارتىق بوپ،
جىگىتكە داۋلەت قونعانى.
سيلاپ وتسە ەل مەن جەر
جىگىتتىڭ پانا قورعانى.
بىتپەگەنمەن ول جامان،
كوتەرىلگەن داۋلەتتىڭ
تومەنشىك بولىپ سولعانى.

جەتى جاسار بولعاندا،
ات تولادى مىنىسكە،
جورعا مىنسەڭ جولاۋشى
ۇمتىلاسىڭ جۇرىسكە.
تالاپتى بالا ون بەستە
مويىن قويار ءبىر ىسكە.
قور بولمايىن دەگەن سوڭ،
جاماندىققا كىرىسپە.
الەمەتى اپ كەتەر
كەساپاتتى نادانمەن
جولداس بولىپ جۇرىسپە.
كەساپاتى تەك قويماس،
قياپاتسىز ناداننىڭ.
اقىرى جولداس بولمايدى،
جۇرەگى قيسىق ادامنىڭ.
عۇمىرى باقي قالمايدى،
ون سەگىز مىڭ عالامنىڭ.
تۋىسساڭ دا ءدىلى جات
قۋلىعى كوپ قارامنىڭ.
وزىڭە كەتەر ادەت بوپ،
قىزمەتىن قىلساڭ ايانبا، 
اتاڭ مەننەن اناڭنىڭ.
ءتىپ كەتسە بەلگى جوق،
وپاسىز سۇمىراي زاماننىڭ.
اقىرى بولار ءبىر عارىپ
مىڭ جىل كورگەن اماننىڭ.
جۇرەگى جات بولعاندا،
اقىلىن تۇزەي المايسىڭ،
وزىڭنەن تۋعان بالاڭنىڭ.
تەگى كەتەر بۇيىرماي،
(كىتاپ ءسوزى وسىلاي)
قايىرى جوق ساراڭنىڭ.
ءبىر تۋىسقان جاقىنعا،
پايداسى تيمەس جاماننىڭ.
قىزمەت قىلساڭ ءبىر مۇرات
الدىڭدا تۇرعان اعاڭنىڭ.
جاقسىسى كەتسە ەل وڭباس،
جاڭبىرى جوق جەر وڭباس،
ەش پايداسى تيە مە،
ءدانى كەتسە ساباننىڭ.
پايدا تيەر ادامعا،
جۇرەگى مىقتى اسىلدان.
ادامعا پايدا تيگىزەر
اقىل اسقان باسىنان.
جەتەسى جامان بوزبالا،
كارتەيىپ ءجۇرەر جاسىنان.
بەكەرگە شىعىن ارتىق ءسوز،
سابادان اسىپ تاسىعان.
ساپار شەكسە جالعاننان
جاقسىنىڭ ورنى اشىعان.
بايقاساڭىز، جارانلار،
كەيبىر جامان كوپ جاسار،
سۇيكىمى جوق بولسادا
قۇرتتاعان ەتتەي ساسىعان.
ازىراق ايتتىم، جارانلار،
وپاسىز دۇنيە سالتىنان.
ءدام ايداسا اسىلدار،
ايرىلىپ جۇرەر حالقىنان.
جاماننىڭ كوبى وزار ما
اسىل تۋعان جالقىدان.
ەلگە تۇتقا جومارت باي،
ايدىن كولدەي شالقىعان.
جاقسىلىق ۇلەس الا ما
پەيىلمەن قىلماي قالقىعان.
قايىرى جوق سارااڭ باي
اقى داۋلار جالشىدان.
اقىلعا تويپاڭ باي بولسا
ءبي شىعادى مالشىدان.
اشىققاننىڭ اۋىلى
مىلتىق اتسا ءبىر جاياۋ،
ەت دامەتەر اڭشىدان.
قونىس بىلمەس جامان باي،
كۇندە كوشىپ شوشاڭدار.
ەكى كۇن ۇداي كوشكەن سوڭ
بوس بەلبەۋ قاتىن بوساڭدار.
شىنى جاقىن دوس جەرگە
كەشىگىپ بارساڭ توساڭدار.
ارىقتاتىپ ات مىنگەن،
جاياۋ ءجۇرىپ شوقاڭدار.
جامان قاتىن ۇل تاپسا،
قۋات كورىپ قوقاڭدار.
تەز وكپەلەر بۇرتايىپ
بايعا جاققان توقالدار.

ەركە بولسا ءوز بالاڭ،
اقىل ايتار اعاڭداي.
جاسقا كارى كەز كەلسە،
اقىل بەرەر جاعا الماي.
قايتىپ جاقسى بولاسىڭ
ناق جۇرەگىڭ اعارماي.
مال جۇتاتار جامان باي،
اقىلىن تاۋىپ باعا الماي.
ونەرسىز ادام جۇرەدى،
كاسىپ ءجونىن تابا الماي.
ءولدىم دەسە اس بەرمەس،
اتادان قايىر قىلماعان
تەگى بولسا ساراڭ باي.

قايىرى كوپ جومارتتىڭ،
جوق شىقپايدى تىلىنەن.
جامان بولماس اقىرى،
جاقسى اۋىزعا ىلىنگەن.
تۇبىندە جاقسى بولمايدى،
جالعاندا جۇرگەن ادامعا،
كەسەپاتى بىلىنگەن.
قاتقان بوققا جىعىلار،
باعى قايتىپ سۇرىنگەن.
جومارت بولار ءارقاشان،
بۇ جالعاننان تۇڭىلگەن.
وزىڭدە بارى كورىنبەي،
ءسوز سوڭىن بايلىق ساناما،
كىسىدەن سۇراپ ۇڭىلگەن.

كەي جامانعا مال بىتسە،
كوتەرىلىپ ءال بىتسە،
ەسىرىپ جۇرەر شالقاقتاپ،
جاۋاپ بەرمەس انىقتاپ.
قيقاقتاتار جاۋىرىنىن
اتى جۇرسە ارىقتاپ.
اڭعال بولسا شابارمان،
ەلدى جۇرەر دۋ قىلىپ.
اركىمدى بارىپ ءبىر سۇزەر،
ۇلىقتىڭ ءسوزىن بۋ قىلىپ.
جارالعان سونداي سورلى بوپ
ەمىنىپ وتەر قۋ قىلىق.
قۇداي باقىت جاراتقان،
جاقسى شىعار جاقسى ەلدەن،
جىعىلمايتىن تۋ قىلىپ.

تومىرىق جاننىڭ مىنەزى،
مۇزداپ توڭعان اعاشتاي.
اۋلاق جۇرەر كەي جامان
جاقسىعا جاقىن جاناسپاي.
جات جۇرەك ارام كەتەدى،
جاقىنىنا قاراسپاي.
جات اقىلدى اعايىن
الىس تۋعان الاشتاي.
جايسىز قاتىن شەلپەگى
كۇلگە كومگەن قالاشتاي.
ەكى شارگەز بىرىكسە،
ولگەنىنشە كەتەدى،
اقىل قوسىپ جاراسپاي.
زامانا مۇنداي كەزىندە،
ەركىمەن جۇرەر ەر بارما،
ناپسىگە تامان تالاسپاي.
كەي جاقسىنىڭ مىنەزى،
وتىرادى تارىلماي.
الدىنان بىتپەي كەتە مە،
ارىز ـ ارمان ارىلماي.
عىلىم قونسا جۇرەككە،
جيعان قازىنا مالىڭداي.
كەي شارگەزدىڭ مىنەزى،
شالقىپ جانعان جالىنداي.
ءيىلىپ تۇرار كەي جاقسى،
جاساڭ شىبىق تالىنداي.
ءسوزى ءتاتتى كەي شەشەن،
ميۋا شەكەر بالىنداي.
تىرشىلىكتە، جىگىتتەر،
قۇلشىلىققا بەكەم بول،
كەۋدەدەگى عازيز جان
قالار ءبىر كۇن الىنباي.

1924 ـ جىل


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428