قازىرگى ورنىڭىز:قازىنامالار » تولىق مازمۇن

حيكايات ءۇش جىگىت

قوسىلعان ۋاقىت:2016-02-13كورىلىمى:加载中

ءۇش جىگىت ساپار قىلعان ساحاراعا،
جول الدى كاسىپ ىزدەپ ءبىر قالاعا.
وسىنداي حيكاياتتان ءسوز قالدىرماي
تەك جۇرسەك ارتتا قاعاز ءسوز قالار ما؟!

بۇل ءوزى حيكايا ەدى وقىپ كورگەن،
كوڭىلىمدى وقىعاندا ەرەك بولگەن.
سالىستىرساڭ تابىلار اينالاڭنان
از مال ءۇشىن ارامدىق جولىندا ولگەن.

ۇشەۋى تاۋدان استى جازيراعا،
قىزىعى دۇنيەنىڭ مالى بارعا.
ءبىر تاۋدىڭ ەتەگىنەن ءۇش ءمۇساپىر
جولىقتى ءبىر عاجايىپ قازىناعا.

ۇشەۋى ءبىر جىلعانى قۇلداپ ەدى،
استى تىگىل قاباقشا سۋ بار ەدى.
سۋ ورعان قاباقشانىڭ ەرنەۋىنەن
شەتى شىعىپ ءبىر ساندىق تۇرعان ەدى.

كورگەن سوڭ ول ساندىقتى بارماسىن با،
ءىشىن اشىپ نازارىن سالماسىن با.
ىشىنەن ات باسىنداي التىن شىقتى
التىندى ادام پەندە الماسىن با؟!

ءۇش جىگىت ءبىر تۋىسقان، ءبىر اتادان،
ءىسى جوق ءبىر - بىرىنەن جىرا تانعان.
قان تۋىس، جول سەرىك بوپ كەلە جاتىپ
جولىقتى قازىناعا جىرا سايدان.

التىندى تاۋىپ الىپ قۋانىستى،
تاسىدى كوڭىلدەرى جۇبانىستى.
ءبولىپ الساق دۇنيە مالى عوي دەپ
جالعانعا تويىنعانداي ۋانىستى.

بۇل التىن ۇشەۋىنە ەرمەك بولدى،
بازاردان تاماق الىپ كەلمەك بولدى.
ءىشىسىپ اراق - شاراپ، ءماجىلىس قىپ
سونان سوڭ التىندارىن بولمەك بولدى.

شەتىنەن التىننىڭ از كەمىك الدى،
تاياۋدا ءبىر قالاشىق ەلى باردى.
سونان بارىپ ءىشىپ - جەم اكەلۋگە
ەكى اعاسى ءىنىسىن بۇيىرادى.

كىشىسى تاماق ءۇشىن بازار باردى،
دۇكەننەن نەشە ءتۇرلى تاماق الدى.
«ەكى اعاڭدى ءولتىر دە التىندى ال»
دەگەن ءسوزدى كوڭىلىنە سايتان سالدى.

«بازاردان نەشە ءتۇرلى تاماق السام،
ىشەتىن سۋسىن ءۇشىن اراق السام.
عاپىلدىقپەن ىشەر ەدى بۇلار بىلمەي
ىشىنە بىرەۋىنىڭ زاھار سالسام».

دەپ ويلاپ نەشە ءتۇرلى اراق الدى،
ىشىنە بىرەۋىنىڭ زاھار سالدى.
ءولتىرىپ ەكى اعامدى جالعىز ءوزىم
التىندى الامىن دەپ قيالداندى.

قايتادى تاماق الىپ بۇل بەيشارا،
كىرەدى ءبىر عازازىل ەكى اعاعا.
دالباڭداپ كەلە جاتىر قايتا قايتىپ
وپاسىز دۇنيەگە شارا بار ما.

وتىرعان التىن باعىپ ەكى اعاسىن،
الدادى دۇنيەنىڭ جالعان تاسى.
«ءىنىڭدى ءولتىر، ەكەۋىڭ ءبولىپ ال» دەپ
ازعىردى عازازىل كەپ يمان قاسى.

بۇلاردىڭ ولتىرۋگە كوڭىلى كەتتى،
كوڭىلىنە شايتان سالدى سۇم نيەتتى.
«التىندى ەكەۋ ءبولىپ الايىق» دەپ
جاسىرىن ەكەۋىنىڭ ءسوزى ءبىتتى.

ءىنىسى تاماق الىپ جەتىپ كەلدى،
كوڭىلىنە جامان قيال ءبىتىپ كەلدى.
بايقاتپاي ابايسىزدا ەكى اعاسى
ءىنىسىن جىلدامىراق ولتىرەدى.

ءولتىرىپ اپ ءىنىسىن اھ ۇرادى،
الدىنا اراق - شاراپ جاقىن الدى.
الدىمەن تاماق ءىشىپ الايىق دەپ
ەكەۋى داستارقانعا وتىرادى.

ىشەدى اراقتارىن ەكى پاقىر،
حابار جوق ەشنارسەدەن بولىپ تاقىر.
كەز كەلدى بۇرىنىراق زاھار شيشا
جان كەتىپ ەكەۋى دە قۇلاپ جاتىر...

بۇزادى دۇنيە سۇم ىقىلاستى،
پەندەنى ىقىلاسسىز نالەت باستى.
دۇنيە دوسى دۇنيەنىڭ بوعى بولماق
ءبىر جەردە ءۇش جىگىت تە جويدى باستى.

التىندا ما بۇل قىلمىس ادامدا ما،
دۇنيەگە تويمايتىن اراندا ما.
تۋرا تانىپ، ءتۇسىنىپ، ساراپقا ساپ
عيبىرات السىن دەپ جازدىم جاراندارعا.


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428