قازىرگى ورنىڭىز:قازىنامالار » تولىق مازمۇن

ءدانىشپان بالا

قوسىلعان ۋاقىت:2016-02-13كورىلىمى:加载中

ءبىر كەڭەس ايتقىم كەلدى شاكىرتتەرگە،
ويلانسا ۇعاما دەپ باقىت نەدە.
بار اللا رىزدىققا ءوزى كەپىل
سويتسە دە بەرمە دەگەن جاتىپ جەرگە.

تالاپتانساڭ، ىزدەنسەڭ بەرەم دەگەن،
تالانتىڭ بولسا رىزدىق تەرەم دەگەن.
ايتايىن وسى جايلى ءبىر ەرتەگى
عيبىرات بولا ما دەپ ولەڭمەنەن.

مەن دە مۇنى ەستىپ ەم بالا كەزدە،
قوزى جايىپ جۇرگەندە دالا كەزبە.
مەن كەلگەندە ايتاتىن اپام - اتام
باسقا ايتارى جوقتاي - اق مۇنان وزگە.

كوپ - كوپ ەستىپ جات بولعان كەڭەس ەدى،
ويىما ورالاتىن ەلەس ءوزى.
ەرتەك دەمەي ەس كورىپ ۇعار بولساڭ
اللا بەرسە باعىشتار ورە سونى.

بولىپتى جەسىر ايەل، جەتىم بالا،
بولماپتى باستارىندا جاقسى پانا.
سۇيەنىش جوق، سۇيەنەر قازىنا جوق
جەتىم - جەسىر بولعان سوڭ كۇنى قارا.

اركىمنىڭ ءىسىن ىستەپ كۇنەلتىپتى،
حالدارى كەم ەل كەزىپ جۇرەر ءتىپتى.
مالدانار مالدارى جوق، ەگىنى جوق
پانا بولار كىسى جوق سۇيەر ءتىپتى.

ايتەۋىر ولمەس كۇنىن كورەدى ەكەن،
ولمەگەن جان رىزدىعىن تەرەدى ەكەن.
ەلدە بارى وزىندە جوق بولعانىن
جاس بالا ادىلەتسىز سەزەدى ەكەن.

سۇرايدى اناسىنان مۇنىڭ جايىن،
جان باعۋ كۇيى قيىن بولعان سايىن.
سوندا تۇرىپ اناسى وكسيدى ەكەن
شىعارىپ كوكىرەگىنەن زار - ۋايىم.

− ەي، بالام، مەن ءالسىزبىن، سەن بولساڭ جاس،
بىزدە جوق قورعان بولار سۇيەنىش باس.
تىربانىپ تىلەگەنگە اللا بەرەر
وعان بىزدە شاما جوق، ءجۇرمىز عوي اش.

كۇش كەرەك، ەپ تە كەرەك قۇرالۋعا،
دۇرىسى بەرىلمەۋ ءجون ۋايىمعا.
بۇعاناڭ قاتىپ، اقىلىڭ تولعان شاقتا
عۇمىردىڭ شومىلارسىڭ شۋاعىنا.

بالا ايتادى: − ولمەسەم وسەمىن عوي،
اقىل قالاي تولادى شەشە ونى قوي.
ەگەردە اقىل ويلى العىر بولسام
جول اشىپ، تۇساۋىمدى شەشەمىن عوي.

انا ايتادى: − ارداقتى ۇلىم مەنىڭ،
ءبىر جاسىڭدا اكەڭنىڭ ءتۇرىن كوردىڭ.
اكەڭ وتە كەم ءسوزدى، ويلى جان ەدى،
تىلەگىم سول اكەڭنىڭ ويىن بەرگىن.

ويلانساڭ وي جۇيەسىن تابا الاسىڭ،
بەكىنسەڭ بەل بۋعانعا بارا الاسىڭ.
ىعىن ءبىلىپ ىستەسەڭ لايىقتى
بابىنا بارلىق ءىستىڭ قانا الاسىڭ.

ويلاپ ءجۇر قايدا، قالاي بارارىڭدى،
بارعاننان قانداي ۇلەس الارىڭدى،
ءبارىن دە ىستەپ جاتىلساڭ جاس باسىڭنان،
تاباسىڭ ەلگە دە، ەرگە جاعار ۇلگى.

انا ءسوزىن بالاسى حۇپ الىپتى،
كوپ تىڭداپ، از سويلەۋدى شىعارىپتى.
كوپ بالا ويناعاندا اسىر سالىپ،
قوسىلماي جەكە وتىرىپ جۇرە الىپتى.

بالالار كەيدە ەسىرىپ كەتەدى ەكەن،
ماقتانىپ كەيبىرلەرى بوسەدى ەكەن.
وسىندايدا وت شىعىپ ويىنىنان،
اتا - اناسى اراعا تۇسەدى ەكەن.

كەيدە اۋىسىپ بۇل كەرىس اتا - اناعا،
ءتۇس شايىسىپ القىمدار ىسەدى ەكەن.
وسىلاردىڭ ءبارىن دە كورگەن بالا،
بارىنە وزىنشە تون پىشەدى ەكەن...

سول ەلدە ءبىر كۇنى ۇلكەن داۋ تۋىپتى،
شەشىمسىز تالاي كەڭەس ايتىلىپتى.
ءبىر قوزىنىڭ مەنشىگى تالاي بولىپ،
ءبي، قازىلار اقىلى سارقىلىپتى.

ەكى ادامنىڭ ساۋلىعى قىزىل توقال،
ءبىر تۇندە قوزىلاپتى ولار قاتار.
ەكەۋىن تەڭ ءبىر الا قوزى ەمىپ تۇر
قايسىسى ءوز ەنەسى كىم ايتار ءدال.

ەگىز تۋسا ءبىر ساۋلىق داۋ بولا ما،
ەكى ەنە ءبىردى تۋار مال بولا ما!
تەلىگەن ءتۇن بالاسى ادام دا جوق
ءبىر قوزى قايدا كەتكەن تاڭ بول اعا.

قۇس العان، ءيت - قۇس جەگەن شىعار ونى،
ەنەسى ءوز ءتۇل حالىن ۇعار ەدى.
ەكى ساۋلىق تەڭ ءيىپ ەمىزەدى
كىم مۇنى ناق ايىرىپ شىعار ەدى.

ەش ادام بۇعان جاۋاپ تابا المايدى،
ەكى داۋگەر كەڭەستى قۇپ المايدى.
ءارقايسىسى وزىنە تاۋەلدى ەتىپ
ساپىرىپ شاڭداق داۋدى شىعاندايدى.

مۇنى كورىپ ورتاعا بالا كەلدى،
قولىنا ەكى شىنى الا كەلدى.
− مەن بۇعان ايتايىن ءبىر تورەلىك! − دەپ
وزىنە جالت قاراتتى تامام ەلدى.

− تىڭدادىم باستالعاننان وسى داۋدى،
ويىمدى كوپكە ايتۋعا ەسىم اۋدى.
قوزىنىڭ قۇلاعىنان تامشى قان اپ،
قوي قانىن سۋدا قوسساق قوسىلادى.

بولعانمەن ەكى قويدىڭ سىرتى قىزىل،
قاندارى تەڭ بولمايدى ايتساق ءتۇزۋ.
ەنەسىمەن قوسىلىپ قوزى قانى
باسقا قويعا قوسىلماس قانى قىزىل.

كوپ ۇيعارسا وسىنى سىنار ەدىم،
ايىرىپ ءوز ەنەسىن شىعار ەدىم.
دەگەندە ەل دە قۇپتاپ، داۋگەرلەر دە
تاپتى دەدى بۇل ءىستىڭ تۋرا جولىن.

سونان ەلدىڭ بالاعا نازارى اۋدى،
ەكى داۋگەر دوعاردى مىنا داۋدى.
ەكى ساۋلىق، ءبىر قوزى داۋلى مالدى
جولىڭ دەپ بالاعا ولار جولعا قويدى.

تاعى ءبىر كۇن سول ەلدە داۋ شىعادى،
بەستى اتانعا تالاسقان جان شىعادى.
«مەنىكىنەن» باسقانى بىلمەيتىندەي
ەكى داۋگەر ەگەسىپ قالتىرايدى.

بىرەۋ ونى ايتادى، بىرەۋ مۇنى،
سوندا دا تابىلمايدى ءىستىڭ شىنى.
ەكى جاقتىڭ سالىنعان ەن - تاڭباسى
كەلىپ تۇر قالاي ايتسا ءسوزدىڭ قىبى.
ءبي - قازىلار حۇكىم ءسوز ايتا الماعان،
ءار ءسوزدى ايتىپ مايىسىپ قايقاڭداعان.
اقىرى بۇل اتاندى ساتىپ ەلگە
ەكەۋىنە تەڭ بولمەك جول تاڭداعان.

سول كەزدە بۇل اراعا بالا كەلگەن،
بالانىڭ تۇراعى دا تاياۋ جەردەن.
ۇعىسىپ داۋدىڭ جايىن بولعاننان سوڭ،
جول سۇراپ ءسوز سويلەيدى تۇرعان ەلدەن.

− جاماعات، اتالارىم، اعالارىم،
بۇل ءىستى ەستىپ ءمان - جايىن شامالادىم.
ەكى داۋگەر سوزدەرىڭ التىن بولسىن،
اكەلىڭدەر بۇل اتان ەنەلەرىن!

دەگەن سوڭ ەكى داۋگەر الىپ كەلدى،
كەلگەنىن ەكى ىنگەننىڭ حالىق كوردى.
ونان بالا جىقتىرىپ بەستى اتاندى
تاقىمىنا قىل بۇراۋ سالىپ كوردى.

اتان سوندا باقىرىپ بوزداپ كەتتى،
تامام ەلدىڭ جان كۇيىن قوزعاپ كەتتى.
سارى ىنگەن تۇر قايتارىپ جاي كۇيىسىن
ال، قارا ىنگەن بۇيدا ءۇزىپ جاسىن توكتى.

بۇيدا ءۇزىپ، مۇرنىن جىرىپ اتانعا ۇشتى،
پەرۋانا بالاسىنا مەيىرى كۇشتى.
سول بەتى قالىڭ ەلدى جارىپ ءوتىپ
بوتا اتاننىڭ ۇستىنە كەلىپ ءتۇستى.
بۇل ءىستى داۋگەر كوردى، حالىق كوردى،
ادام ازىپ، مال شىنىن تانىپ كەلدى.
ءبي، قازىلار تاپپاعان داۋ كەسىمىن
جاس بالا جالتارتپاستاي تاۋىپ بەردى.

ەل بۇعان ەڭىرەدى، شۋلاپ كەتتى،
بار ادامنىڭ جۇرەگى تۋلاپ كەتتى.
بەك سايلاپ بەرەكەمەن جاس بالانى،
داۋ سوڭىن تويعا ۇلاتىپ دۋلاپ كەتتى.

سوندا داۋگەر سارى ىنگەندى الىپ كەلدى،
ءوزىنىڭ ايىبىن شىن تانىپ كەلدى.
ايىبىما اتادىم تۇيەمدى دەپ،
اناسىن سول بالانىڭ تاۋىپ بەردى...

جارانلار، ۇقتىڭدار ما بۇل كەڭەستى،
ناقاققا كەي جاھىلدەر كوپ ەگەستى.
زەردەلەپ ءىستىڭ تەگىن تەكتەي بىلگەن
جاس تا بولسا دانىشپان بالا شەشتى.

ول بالا تالاپتاندى اللا بەردى،
قۇلشىنباسا ول قۇديعا جارعا كەلدى.
اق نيەتپەن تالپىنعان تالابىنا
جەتىمدىكتەن جەتەلى بەكتىك كەلدى.

جارانلار، مۇنان عيبىرات الىڭىزدار،
مۇنداي سوزگە شىن قۇلاق سالىڭىزدار.
جەتىم بالا جەتىلگەن نىعىمەت جولىن
ءبارىڭ دە باياندى ەتىپ تابىڭىزدار!


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428