قازىرگى ورنىڭىز:قازىنامالار » تولىق مازمۇن

كەسىك قول كەلىنشەك

قوسىلعان ۋاقىت:2016-02-13كورىلىمى:加载中

باستايىن ءبىر حيكايات كەلگەن ويعا،
ۇقسايدى تاماشا ءىس جيىن - تويعا.
ءسوز بىلەر وتىز جاسقا كەلىپ قالدىق
قىزدار دا ءىس تانيدى جەتسە بويعا.
ءبىز تۇر عوي قويشىلار دا ءسوز سويلەيدى،
وتارلاپ ءۇش كۇنشىلىك بارسا قويعا.

تاعى دا مۇنى جازعان اقىت پاقىر،
بۇل ءسوزىم تاقۋالارعا بالداي تاتىر.
سويلەيىن تىرشىلىكتە تاۋپيق تىلەپ،
ارالاپ وتىز جاس تا كەلە جاتىر.

وتىز جاس كەلمەس قايتىپ وتسە باستان،
توقتايدى سالماق تارتىپ قىرىقتان اسقان.
الدى - ارتى سۇم دۇنيەنىڭ ماعلۇم بولماس،
وقىعان حيكاياتتان جازدىم داستان.

يمام جاعىپار سادىقتان راۋايات ءسوز،
كىتاپتان كورىپ جازدىم كوزبەنەن كوز.
كوبەيتپەي ءوز مۇڭىممەن بۇل قيسانى
جارانلار، قۇلاعىڭ سال ايتايىن تەز.

*            *            *

ەرتەدە ءبىر باي وتكەن مالدى بولىپ،
كورمەگەن ءوز تۇسىندا جارلى بولىپ.
جاقسى - جامان ءبارىن دە عيبىرات قىپ،
ءوتىپتى شاماسىنشا حالدى بولىپ.

بار ەكەن جالعىز ۇلى دىنگە بەكەم،
ماڭايىن مادينەنىڭ قىلعان مەكەن.
دۇنيەدەن وتەرىندە اقىل ويلاپ
وسيەت بالاسىنا قىلعان ەكەن.

− ەي، بالام، مىنا دۇنيە جالعان دەيمىن،
ايرىلما شاماڭ كەلسە مالدان دەيمىن.
تۇرام دەپ كەدەي بولماي تاعى ويلاما
نەشە بايلار كەدەي بوپ قالعان دەيمىن.

ايتايىن ءبىر ءناسيحات ساعان، جانىم،
اگاردا قولدان كەتسە جيعان مالىڭ.
جاردام سۇراپ بارما سەن كارى ادامعا،
كارى ادام سيلامايدى بەتتىڭ ارىن.

نەگە دەسەڭ كارى ادام قاتتى بولار،
وزىنە ءوز دۇنيەسى ءتاتتى بولار.
جاسىنان جالعان ءدامىن قۇنىق العان،
سول ءۇشىن بار دۇنيەسى تاپشى بولار.

جاس ادام جۇمساق كوڭىل، قايىر بەرەر،
كارى ادام قاتتى پەيىل، ءزابىر بەرەر.
مۇحاممەت مۇستاپانىڭ قۇرمەتى دەپ
سۇراساڭ اق كوڭىل جان قابىل كورەر.

اكەسى ايتىپ وسىنداي وسيەتتى،
كوڭىلىنە ءتاڭىرى سالعان وسى گەپتى.
قازادان قۇتىلاتىن شارا بار ما
ساپارى بارسا كەلمەس ءجۇرىپ كەتتى.

اكەسى دۇنيە سالىپ، قالدى بالا،
بالاعا قۇداي بەرگەن اقىل دانا.
اكەسى تەگىن بولجاپ ايتقان ەكەن،
بولىپتى بالا كەدەي بارا - بارا.

اپاتقا ول بايقۇستىڭ مالى كەتتى،
ساۋدادان سىنىپ قولدان ءدانى كەتتى.
پەندەگە كەدەيشىلىك ەرىك قويا ما
ەل كەزىپ قايىر سۇراپ تەنتىرەپتى.

كارى ادامعا بارمادى اكەسى ايتقان،
جوندىگە جولىعار ما باعى قايتقان.
تەلمىرىپ وتىرعانعا بەرگەن بار ما،
تەنتىرەپ ەلدەن - ەلگە بەينەت تارتقان.

*            *            *

شاھارعا باھىرا دەگەن ءبىر كۇن كەلدى،
دۇكەننەن كوركەم وسكەن جىگىت كوردى.
مۇحاممەت مۇستاپانىڭ قۇرمەتى ءۇشىن،
ءبىر قايىر مۇقتاجىنا تىلەپ كوردى.
ول جىگىت باقىل ەكەن جۇرەگى ارام،
(بىلە مە پەندە سىرىن تانىماعان).
ول ءمۇساپىر كەسىرگە قۇنىكەردەي
سويلەدى رەنجىتىپ جامان - جامان.

جونەلدى نازالانىپ الگى جىگىت،
ءبىر قايىر بەرمەگەن سوڭ قىلسىن با ءۇمىت.
شاھاردى ارى - بەرى كوپ ارالاپ،
جولىقتى ءبىر قاتىنعا كەزىپ ءجۇرىپ.

ول قاتىن اسقان سۇلۋ وتىر تاقتا،
كورگەن سوڭ جىگىت باردى قاتىن جاققا.
ءوزىنىڭ مۇڭىن شاعىپ زارلىق قىلدى،
قايدا دەپ مۇنداي قاتىن مەن بەيباققا.

قاتىنعا جاقىن كەلىپ جايىن ايتتى،
(اركىمنەن قايىر سۇراپ كوڭىلى قايتتى).
مۇحاممەت مۇستاپانىڭ قۇرمەتىنە
ءبىر قايىر مۇقتاجىما بەر دەپ ايتتى.

قاتىن ايتتى:
− حاق ءۇشىن جانىم قۇربان،
قايتەيىن بايىم باقىل قۇداي ۇرعان.
بەيشارا مۇنى اپارىپ كۇنىڭ كور دەپ
ۇستىنەن ءبىر كيىمىن قايىر قىلعان.

باعاسى بۇل كيىمنىڭ ءۇش مىڭ ءدىلدا،
كەدەي مۇنى تابا الماس ەشبىر جىلدا.
باعاناعى باقىلدىڭ قاتىنى ەكەن،
جارانلار، قۇلاعىڭ ساپ مۇنى تىڭدا.
كيىمدى جارلى بايقۇس الىپ كەتتى،
باقىلعا باعاناعى بارىپ جەتتى.
ءبىر قاتىن مۇنداي جاقسى كيىم بەردى،
بولماعان قاتىن قۇرلى نەمە دەپتى.

تانىدى الگى باقىل بۇل كيىمدى،
تالاسسا كەدەي بەرمەس بۇل بۇيىمدى.
«قايىرشىعا وسىلاي بەرە بەرسە،
قويا ما مۇنداي قاتىن جاي - كۇيىمدى».

دەپ ىشتەي قاتتى تۇتەپ كۇيىپ - جاندى،
كيىمدى كەدەي الىپ كەتىپ قالدى.
ءبىر جازا بۇل قاتىنعا قىلايىن دەپ،
ۇيىنە تەز جۇگىرىپ جەتىپ باردى.

− ەي، سۇم قاتىن، بەرەسىڭ نەگە كيىم،
كورىپ ەڭ قايىرشىنىڭ قانداي سيىن.
كەدەيگە رۇقساتىمسىز بيلەپ بەرەر،
سەن بە ەدىڭ دۇنيە تاپقان مەنىڭ ءبيىم.

قاتىن ايتتى:
− بەرگەنىم ءوز كيىمىم.
تەگىندە ۇيدەن كەلگەن ءوز بۇيىمىم.
جاقسىلىق جەردە قالماس، ەتتىم قايىر،
زيانى قانشا بولار ساعان مۇنىڭ؟

ءوز مالىڭدى ساقتا ءوزىڭ ەلگە بەرمەي،
ءوز دىنىڭنەن قايتپاسسىڭ كورگە كىرمەي.
ويلايسىڭ با وتەم دەپ ماڭگى - باقي،
بۇل دۇنيەدەن تاپشىلىق، ءسىرا، كورمەي.
− ەندەشە، بەكەم ەكەن سەنىڭ ءدىنىڭ،
قىلايىن قاراڭعىلىق كورگەن كۇنىڭ. −
دەپ قولىن بىلەزىكتەن كەسىپ الدى،
− مىنەكي وسىلاي دەپ قىلعان ءمىنىڭ.

جىلايدى عارىپ قاتىن شاراسى جوق،
سۇيەنەر حاقتان وزگە پاناسى جوق.
− ەي، جاۋىز، باسىمدى اش مەن كەتەيىن،
جوق شىعار بۇل باسىمدا تالاسىڭ كوپ!

ەي، جاۋىز، قولىم كەستىڭ جازام جوق - تى،
ءتىرىمىن ولمەي قالدىم قازام جوق - تى.
نە دەيىن قىلعان ءىسىڭ قۇدايدان تاپ
كورەتىن مۇنداي ازاپ كۇنام جوق - تى.

سونىمەن ايەل كەتتى باسىن اشىپ،
اشىنىپ تاۋەكەلگە قادام باسىپ.
بارمادى نامىستانىپ توركىنىنە،
بايىنان ايرىلىسقان سوڭ جامانداسىپ.

*            *            *

جاپانعا تاۋەكەل دەپ ءجۇردى قاتىن،
اللانىڭ ولتىرمەسىن ءبىلدى قاتىن.
بەت الىپ قۇلان تۇزگە ءجۇرىپ كەتىپ
كەز بولىپ ءبىر شاھارعا كىردى قاتىن.

جولىعىپ سودىر سۇمنىڭ قاھارىنا،
جات ەلدىڭ بارىپ كىردى شاھارىنا.
ەڭىرەپ ەل ارالاپ ءجۇرىپ كەتتى
شىداماي قول اشۋدىڭ زاھارىنا.
كەزىگىپ ءبىر كەمپىرمەن بولدى سىرلاس،
وتكەنىن شەرتە وتىرىپ بولدى مۇڭداس.
ءبىر ۇيدە جەكە باسى جالعىز كەمپىر،
قاتىندى ءوز قىزىنان ءبىر كەم قىلماس.

قاتىن بايقۇس كەمپىردى «انام» دەيدى،
و داعى ءوز قىزىنداي «بالام» دەيدى.
قۇدايعا قۇلشىلىق قىپ عارىپ قاتىن
جاساعان ءبىر ءوزىڭسىڭ پانام دەيدى.

كوپ قىلدى قۇلشىلىقتى جاپبار حاققا،
كىم تالاسار اللا ءوزى بەرگەن باققا.
جىگىتتەر، قاي ۋاقىتتا قور بولمايسىڭ
كوڭىلدى تاۋەكەل قىپ قويساڭ اققا.

*            *            *

سول جەرگە ءبىر كەرۋەن كەلىپ قوندى،
كەرۋەن باسى كەمپىرگە قوناق بولدى.
وتىرىپ تورگى ۇيگە قاراپ تۇرسا
سول بولمە ءبىر نۇرمەنەن جارىق بولدى.

تاڭىرقاپ شام نۇرىنان بولەك كوردى،
وت ەمەس وتتان مۇلدە ەرەك كوردى.
بولماسا ەرەكشە ءبىر ۇلكەن گاۋھار
ايتەۋ ءبىر عاجايىپتان دەرەك بەردى.

تاڭىرقاپ سىعالايدى جىگىت قاراپ،
بايقاسا قاتىن وتىر قىلىپ تاعات.
دارىعان اۋليەلىك ادام بولار
وتىردى قايران قالىپ تاماشالاپ.

جىگىت ايتتى:
− ەي، انا، ءسوزىم تىڭلا،
ءدام ايداپ بۇگىنگى كۇن كەلدىم مۇندا.
بايان قىل مىنا قاتىن نە قىلعان جان
بالقىتقان ءۇيدىڭ ءىشىن ساۋلە نۇرعا.

كەمپىر وعان:
− بۇل مەنىڭ قىزىم دەيدى،
تىڭلاساڭ حيكاياسى ۇزىن دەيدى.
ايتايىن سۇراعان سوڭ ساعان جايىن،
ەشكىمگە ايتپاعان ەم بۇرىن دەيدى.

كەسىلگەن كىناسىز جان قولى مۇنىڭ،
ءوزى ادال بولعانىمەن ەرى زۇلىم.
وسى كۇندە باسى بوس، قولى شولاق
عيباداتپەن وتەدى كۇنى مۇنىڭ.

دەپ كەمپىر باياندادى كەڭ دە تولعاي،
وتىردى جىگىت تىڭداپ ەمگە تولعاي.
«بولسا دا قولى شولاق كوڭىلى ءبۇتىن،
جان ەكەن قاراپ تۇرار پەندە تويماي.

اگاركي وسى قاتىن جارىم بولسا،
تىلەگىم وعان ايتقان قابىل بولسا.
ارنار ەم مال - جانىمدى جولىنا مەن
قوسىلار قوساق بولىپ ءداۋىر بولسا!»
دەپ ويلاپ جىگىت ايتتى:
− سەنەمىسىز؟
سوزىمە، انا، مەنىڭ كونەمىسىز.
كەمسىنبەي ونىڭ قولىن الار ەدىم،
ريزا بوپ نەكە قيىپ بەرەمىسىز؟

كەمپىر ايتتى:
− ايتايىن سوزگە كونسە،
كوڭىلى تيەمىن دەپ قابىل كورسە.
بەيشارا قولى شولاق عارىپ ەدى،
ايتادى - اۋ بارمايمىن دەپ كوڭىلى ولسە.

ول كەمپىر بايان قىلدى جىگىت ءسوزىن،
«جان ەكەن قور قىلماستاي بارساڭ ءوزىڭ».
كورسە دە بايدى قابىل عارىپ قاتىن
بويادى شەرلى جاسقا ەكى كوزىن.

بارماسقا بايى دا جوق، بالا دا جوق،
جاس قاتىن ەرگە تىمەي شارا دا جوق.
كەمپىردە ونى كۇتەر شاما بار ما،
سۇيەنەر ونان باسقا پانا دا جوق.

امالسىزدان جىگىتكە بارام دەدى،
جىگىت تە عارىپسىنباي الام دەدى.
كەمپىر دە وعان شىنى قامقور بولعان
− بارساڭ بار قور بولماسسىڭ، بالام، − دەدى.

*            *            *

كەمپىر جاتىپ ول قاتىن قىلدى تاعات،
(ەرىنبەي تىڭلاڭىزدار، كوپ جاماعات).
بولعانعا قولى شولاق بەك ۇيالىپ
اللاعا مۇڭىن ايتتى نەشە ساعات.

پايعامبار، اۋليەنى اۋىزعا الاد،
جىلايدى ءمىناجات قىپ بەك قاباعات.
پەندەگە جامانشىلىق قىلماپ ەدىم،
جاسايمىن با وسىلاي بوپ امانات.

جاساعان اينالايىن ءبىر قۇدايىم،
ماعلۇم ءبىر وزىڭە مەنىڭ جايىم.
كەم بولىپ ەر قاسىنا قايتىپ بارام،
جىگەرىم قۇم بولار - اۋ كۇن - كۇن سايىن.

حابيبىڭ قۇرمەتى ءۇشىن كيىم بەردىم،
زالىمنان سول بەبەپتى زۇلىم كوردىم.
تاعى دا سول دوسىڭنىڭ قۇرمەتىنە،
ەي، اللا، ءبىر وزىڭە جىلاپ كەلدىم.

قۇداي - اۋ، كوزسىزدەرگە كوز بەرگەيسىڭ،
مەدەت قىپ مىلقاۋلارعا ءسوز بەرگەيسىڭ.
جىلاعان مەن سياقتى عارىپتەردىڭ
تىلەگىن راحىمان يەم تەز بەرگەيسىڭ.

قۇداي - اۋ، قولىم شولاق مەن ءبىر عارىپ،
نە بولام بۇل بويىمشا ەرگە بارىپ.
بەلىمدى بۋىپ بەر دەپ قاراپ تۇرسام،
كەتەر - اۋ العان ەرىم كوڭىلى قالىپ.

جىلايدى عارىپ قاتىن اعىزىپ جاس،
ساجدەگە ناماز وقىپ قويادى باس.
قۇدايىم راقىم قىلسا قيىن ەمەس
جاسىنان قورعاسىنداي ەريدى تاس.

زارىعىپ جىلاپ تۇرىپ ۇيىقتاپ كەتتى،
ءبىر بەينە قور قىزىنداي جەتىپ كەپتى.
كەم قولىن قولىمەنەن سىلاپ - سيپاپ،
«جازىلار قولىڭ بايقۇس ويان!» دەپتى.

«كەسىلگەن قولىڭدى مەن تاۋىپ قويعام،
بالقىتىپ ءزامزام سۋعا سالىپ قويعام.
جاساعان جارلىق قىلسا جالعايىن دەپ
پايعامبار قۇرمەتى ءۇشىن الىپ قويعام.

كورىپتى اللا قابىل تىلەگىڭدى،
ادالدىق ۇيالاعان جۇرەگىڭدى.
بۇيىردى ماعان دەرەۋ جالعاۋىمدى
اقاۋسىز ءسىڭىر، تامىر، سۇيەگىڭدى.

ەندى ويان جازىلادى قولىڭ سەنىڭ،
اللانىڭ راقىمى كوبىن سەزگىن.
كورەسىڭ الدىڭدا ءالى جاۋىزداردىڭ
كەشەرىن تاۋحىمەتتى سورىن سەلدىڭ!..»

وياندى قاتىن بايقۇس كوزىن اشىپ،
قۋانىپ نەتكەن ءتۇس دەپ اسىپ - ساسىپ.
قاراسا عايىبى جوق قولى ساپ - ساۋ
شۇكىر قىلدى تاڭىرگە كوڭىلى تاسىپ.

ەلجىرەپ قۇدايىنا سيىنادى،
قۋانىش جاسى سەل بوپ قۇيىلادى.
جاراتقان شىن تىلەكتى قابىل قىلماق،
جاۋىزدىق دەمە ءوزى تيىلادى.

قۇلىنا اللا دەگەن داۋلەت قونار،
وتاسساڭ جاقسى جانمەن كوڭىلىڭ تولار.
جاقسى ەردىڭ تالابىن مەن تويتارعانىم،
قارسىلىق قۇدىرەتكە كۇنا بولار.

دەپ ويلاپ ول جىگىتكە قاتىن باردى،
ول جىگىت نەكە قيىپ الىپ الدى.
قاراسا عايىبى جوق قولى ساپ - ساۋ،
− قالاي؟ − دەپ العان جىگىت قايران قالدى.

جىگىت ايتتى:
− ەي، جارىم، تىڭلا ءسوزىم،
جارقىرار شامشىراقتاي ەكى كوزىڭ.
عايىپلى شولاق قول دەپ ەستىپ ەدىم
قالايشا قولىڭ ساپ - ساۋ ايتشى ءوزىڭ؟!

ول قاتىن بايان قىلدى بارشا حالىن،
اۋزىنان ا دەگەندە شىقتى جالىن.
قىمباتتى ءبىر كيىمىن قايىر بەرىپ،
كۇيەۋى قولىن كەسىپ كورگەن زارىن.

مۇنى ەستىپ جىگىت سوندا تاڭ قالادى،
تاعدىردىڭ بار - اۋ، ءسىرا، سان عاجابى.
انا جىلى وزىنە شاپان بەرگەن،
باي قاتىن بولىپ شىقتى العان جارى.
جىگىت تۇرىپ باياعى قايىر العان،
باي قاتىندى بال مىنەز تانىمدى ابدان.
«وسىنداي جاقسى جارىم بولسا» دەگەن
باياعى ەسكە ءتۇستى قىلعان ارمان.

جىگىت ايتتى:
− تانىدىم، قالقام، سەنى،
قۇدايدىڭ بۇل دا بولسا بەرگەن دەمى.
سونداعى قايىر بەرگەن جىگىتىڭ مەن،
بايىتتى سول كيىمىڭ پاقىر مەنى.

پايعامبار قۇرمەتى دەپ بەردىڭ كيىم،
ءۇش مىڭ ءدىلدا باعاسى ارتىق بۇيىم.
سول ءدىلدانى ساۋدالاپ بايىپ كەتتىم، −
دەپ جىگىت بايان قىلدى جايى - كۇيىن.

− ءاي، جانىم، مەندەگى بۇل سەنىڭ مالىڭ،
قولىڭدى ناقاق كەسكەن ول سۇم زالىم.
مال تۇر عوي قارا باسىم ءبارىن سەن ءبىل
جولىڭا پيدا بولسىن مالى - جانىم.

شۇكىرلىك قىلدى سوندا قاتىن حاققا،
«بەرىپتى اللا جاردەم مەن بەيباققا».
جىلايدى قۋانعاننان شۇكىر قىلىپ،
قور بولماس شىن جۇرەگىن بەرگەن اققا.

*            *            *

قوسىلىپ زاۋرەن ءسۇردى ەكى بەگزات،
تاۋىپتى ادالدىقپەن تالاي كوپ زات.
قۇدايىم ءوزى قالاپ قوسقاننان سوڭ،
كوڭىلىندە نەگە بولسىن بوتەندىك جات.

ءبىر كۇنى وتىر ەدى باي مەن قاتىن،
ءبىر بايقۇس قايىر سۇراپ كەلدى جاقىن.
جاماندىققا جاساۋلى تاباق بار عوي،
ۇعىڭىز مىنا ءسوزدىڭ عالاماتىن.

قايىرشى كەلدى ەسىككە ءولىپ - تالىپ،
مۇگەدەك قول - اياعى ءتۇسى سارىق.
مۇسەۋرەپ قايىر سۇراپ ەڭىرەپ تۇر،
كورگەن جان عيبىرات الار قايران قالىپ.

بۇل ءوزى نەتكەن جان دەپ زارلى - مۇڭلى،
جاقىن كەپ قاتىن ونىڭ جايىن ءبىلدى.
ءوزىنىڭ قولىن كەسكەن جاۋىز ەكەن،
مولتەڭدەپ قاراي الماي تازىم قىلدى.

ەرىنە ايەل ونى قىلدى بايان،
(پەندەنىڭ قىلعان ءىسى اللاعا ايان).
كەتىپتى دۇنيە - مالى جۋعان كىردەي،
مىنەكي تۇرعان كۇيى − كۇنى قاران.

باي وعان جاقىندادى جايىن سۇراپ،
الگى سۇم زار جىلايدى قايىر سۇراپ.
− باياعى مال - جيھازىڭ قايدا سەنىڭ،
بەرمەۋشى ەڭ سوقىر جارماق زالىم سۋايت.

− ونىڭ راس، كوپ ەدى مەنىڭ مالىم،
قولىمنان داۋلەت تايىپ كەتتى حالىم.
پاتشاعا جازىقتى بوپ زىندان جاتىپ
سالىندى قازىناعا بارشا مالىم.

− ەي، زالىم، سىعاندىققا بار ما پايدا،
نيەتىڭ دۋشار قىپتى وسىندايعا.
بار ەدى ءبىر قاتىنىڭ ايداي سۇلۋ
ءجونىن ايت سول قاتىنىڭ كەتتى قايدا؟

− رۇقساتسىز قايىرشىعا ول كيىم بەردى،
اشۋىم سول قاتىنعا قيىن كەلدى.
سول ءۇشىن قولىن كەسىپ، باسىن اشقام،
بىلمەيمىن قايدا ەكەنىن بۇگىن كەز - دى.

ول ءوزى ءبىر اياۋلى قاتىن ەدى،
جانىنا قىلعان ءىسىم باتىپ ەدى.
جولىقتىم قارعىسىنا جازىقسىزدىڭ،
زارلانىپ قارعىسىمەن اتىپ ەدى.

− ول قاتىنىڭ ساۋىققان ەندى ءبۇتىن،
زالالىڭنان تاستاپ ەد ەلى - جۇرتىن.
نەكەلى بوپ ءبىر بايمەن تۇرمىستاندى،
ايرىلىپ قول - اياقتان ءوزىڭ ءجۇرسىڭ.

وڭباسسىڭ بۇدان بىلاي ولگەنىڭشە،
بۇل بەينەتتەن توزاققا كىرگەنىڭشە.
سەنى كورسە ول قاتىن جارىپ تاستار،
كەتە بەر ىزىڭمەنەن كەلگەنىڭشە.

دەپ مىرزا ول زالىمعا زەكىرەدى،
ءبىر كەزدە قورلىعى ابدەن ءوتىپ ەدى.
قۇنجىڭداپ قول قۋسىردى تاعزىم ەتىپ،
ونسىز دا باعاسى ابدەن كەتىپ ەدى.

قاتىن كەپ قايىر بەرىپ جولعا سالدى،
نامىسسىز ساندالىپ كەپ قايىر الدى.
جومارتتىڭ كەسەمىن دەپ قولىن جولسىز،
جولىعىپ قارعىسىنا ءوزى قالدى.

وسىنداي ءبىر عازيزدى قىلعان تالاق،
قاس قىلعان قايىرلىعا بولدى عاراپ.
جاقسىلىق قايدا بولسا جەردە قالماس
جىگىتتەر، ساۋاپ جولدان باسپا اعات.

حيكايات وسىمەنەن تامامدالدى،
عيبىرات الارلىق ءىس باياندالدى.
قيسانى حاتقا سالعان اقىت پاقىر،
دۇعاعا قولىڭدى جاي تامام جارلى.

1901 - جىل


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428