قازىرگى ورنىڭىز:قازىنامالار » تولىق مازمۇن

جاۋىز پاتشانىڭ جاڭىلىسى

قوسىلعان ۋاقىت:2016-02-13كورىلىمى:加载中

بولىپتى ەرتەدە ءبىر زۇلىم پاتشا،
ءار ءتۇرلى ءىس ىستەگەن اقىماقشا.
قاباعان ءيت بىتكەندى تۇگەل باعىپ،
سول ءۇشىن جۇمساپ وتكەن ىرعىن اقشا.


كوپ بىلسە دە كوڭىلى قاتال ەكەن،
جاقتىرماسا جازىقسىز ماتايدى ەكەن.
جەندەتتەر جاسايدى دەپ اياۋشىلىق،
حايۋاندىقپەن جازالاپ جاتادى ەكەن.
كەيدە تاڭىپ اساۋدىڭ قۇيرىعىنا
كەيدە قوسپاق نارعا دا اسادى ەكەن.
اشۋى وندايعا دا تارقاماسا
يتكە تاستاپ اشۋىن باسادى ەكەن.
«جازعان قۇلعا راقىم قىلمان!» دەگەن
وزىنە - ءوزى قىلعان قاسامى ەكەن.


وسىلاي قاسام قىلىپ باستا ءتىپتى،
تالايدى ناقاق جەردەن قاقساتىپتى.
اراشا تىلەگەنگە التى تاياق،
الدىنا يتتەرىنىڭ تاستاتىپتى.


ايۋداي دولى يتتەرى ارس - ارس ۇرگەن،
تىرناعى ىلىنگەندى ءبىراق بۇرگەن.
تالاي جان يتكە جەم بوپ جازىقسىزدان
جابىرلەپ ەلى - جۇرتىن تۇرشىكتىرگەن...


پاتشاعا قىزمەت قىلعان جاقىندارى،
جازىم بوپ قازا تاپقان عاپىلدارى.
ون جىلداي وعان قىزمەت ەتىپ كەلگەن،
بولعان - دى ءبىر جاس جىگىت اقىلدى ءارى.


جاقىن بوپ پاتشامەن ول ارالاسقان،
ونەرلى ءبىر جاس بوپتى جۇرتتان اسقان.
زاۋدە عالام پاتشاعا جاقپاي قالسام
بولام - اۋ دەپ يتكە جەم بۇل دا ساسقان.


بولعان سوڭ ءوزى ونەرلى، ءوزى ەپتى،
ول جىگىت ءبىر اقىلدى ءىس ىستەپتى.
ءيت باققان ەكى يتشىمەن تاتۋ ءجۇرىپ،
كورسەتىپ يتتەرىڭدى ءجۇرشى دەپتى.


جاناسىپ باقتاشىعا جۇرگەندىكتەن،
اس بەرگەندە ىلەسىپ كىرگەندىكتەن.
يتتەر دە كوزى ءۇيىر بوپ، ءيىس الىپ،
ول جىگىتكە ىرىلداپ ۇرمەي كۇتكەن.


ءيت قورانى توڭىرەكتەپ كورەدى ەكەن،
جاسىرىن ءبىر قوي سويىپ كەلەدى ەكەن.
كورسەتپەي پاتشاعا دا، يتشىگە دە،
سول قويدى يتتەرگە اكەپ بەرەدى ەكەن.


قۇلقىنعا ءيتتى قويىپ ادام دا قۇل،
تەك قانا سىعان بولماي جومارتتىق قىل.
كۇنىندە قويدىڭ ەتىن بەرگەننەن سوڭ،
بولىپتى ەركەلەيتىن ۇرمەك تۇگىل.


جىگىتكە پاتشا ءبىر كۇن اشۋلانىپ:
− مىنانى تاستا، − دەپتى، − يتكە اپارىپ!
جەندەتتەر جارلىقتى العان جانتالاسىپ
يتتەرگە لاقتىردى بايلاپ - تاڭىپ.


مۇنى يتتەر اۋەلىندە تانىماپتى،
ءتاپا - ءتاۋ جۇلقىلاۋعا ورتاعا اپتى.
ءيىس سەزىپ، يىسكەلەپ تانىپ قالىپ،
ەركەلەپ ءبارى بىردەي جاتىپ قاپتى.


ەرتەسى پاتشا تۇردى بولىپ نالا،
ءوزىنىڭ قىلعان ءىسىن كوڭىلىنە الا.
− كەشەگى كىسىنى يتتەر جەدى مە، − دەپ
يتشىگە ايتتى: − دەرەۋ بارىپ قارا.


ءبىر ءيتشى كەتتى داعى قايتىپ كەلدى،
پاتشاعا ويدا جوق ءسوز ايتىپ كەلدى.
− يتتەردىڭ ورتاسىندا وتىر ءتىرى،
جەۋ تۇگىل، ۇرگەن دە جوق ءيتتىڭ ءبىرى.
يتتەر جاتىپ قاسىندا ەركەلەيدى،
ەي، تاقسىر، قالاي بولدى مۇنىڭ سىرى!
بۇل يتتەردەن ءتىرى جان شىقپاۋشى ەدى،
بار بولسا بۇل بىلگەنى ءيتتىڭ ءتىلى.
ايتەۋىر ءبورىباساردى باعىندىرار
بويىندا بار بولعانى مۇنىڭ جىنى.
ايتپەسە ادام ەمەس، پەرى مە ەكەن
جەتپەدىم بايىبىنا ءىستىڭ شىنى.
ءبىر ءيتشى بارىپ ونى ەرتىپ كەلدى،
پاتشانىڭ بۇل جىگىتتى كوزى كوردى.
پاتشا جۇرەكسىنىپ مۇنى كورىپ:
− شىراعىم، ءجونىڭدى ايتشى، كىمسىڭ؟! − دەدى.


جىگىت ايتتى: − مەن ءسىزدىڭ قىزمەتشىڭ،
ماعان ءمالىم ىستەرلىك ءىسىڭ سەنىڭ.
ءسىزدى سيلاپ تاستاعام يتكە سۇيەك،
سول سۇيەكتىڭ بوداۋىن الدىم بۇگىن.
سىزگە دە ون جىل قىزمەت ىستەپ ەدىم،
بىلمەدىڭىز قايتارىپ يتتەي ءجونىن.


تالاي جاندى يتكە جەم قىلعان ەدىڭ،
ولەم بە دەپ قورىققام مەن دە تەگىن.
جان العىشىم ءيت بولار دەگەن ويمەن
ولارعا ازىق بەرگەم تاۋىپ ءجونىن.


يتتەر اقتاپ جەگەنىن تالامادى،
تالاپ جەسە شىعاما يتتەن قۇنىم.
سىزگە دە ون جىل ادال قىزمەت ەتكەم
ءسىز ول ءۇشىن قىلدىڭىز يتكە سوعىم.


تولعانىپ مىنا سوزگە جۇرت توپتالدى،
بىلگەنگە جىگىت ەمەس حان سوتتالدى.
بۇرىنعى ەتكەن ءىسىم قاتە ەكەن دەپ،
ۇتىلىپ پاتشا دا اۋىر ويدا قالدى.


كونەدە ەرتەگى ەدى بۇل ءبىر اڭىز،
بار بولسا اينالاڭدا ويلا ناعىز.
اقىت قاجى اڭىزدى جىر قىپ جازدى
قيسا قىپ وقىسا دەپ تولعانامىز.


تورە مەن چيڭسايلاردىڭ قىلىعى وسى،
وزدەرىڭ اينالاڭنان ويلا ناعىز.
ويدان قۇراپ وتىرىك جازدى دەمە،
بۇل ءوزى ەرتە كەزدە بولعان اڭىز.


ءبىلىمدى جان جاۋىزدىق جاسامايدى،
اقىلىمەن قۇرىقتار قاشاعاندى.
ءبىلىمسىز جان ءبىلدىرىپ ناداندىعىن،
حايۋاندىق حارەكەتتەن اسا المايدى.


جاۋىزدىقتىڭ جازاسى ءجابىر كورۋ،
كىمدە - كىم ونان شەتتەپ قاشا المايدى.
ءبىلىمدى جان ۇيىتىپ بەرەكەگە،
بىلىمسىزگە ءىس ىستەتەر اسا ءماندى.


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428