قازىرگى ورنىڭىز: تولعاۋلارى » تولىق مازمۇن

قالام الىپ ازىراق

قوسىلعان ۋاقىت:2016-02-22كورىلىمى:加载中

قالام الىپ ازىراق،
ءسوز جازايىن ازىناپ.
بەس - التى اۋىز عازىلىم
كەڭەس ەتتىم زار جىلاپ.

سۇم دۇنيەنى شيمايلاپ،
پاقىر اقىت جىرلايدى.
جالعاننىڭ ءىسى جيعاندى،
اقىرەت ءىسى يماندى.
جارىلقايدى جاراتقان
حارامنان ءناپسى تيعاندى.
ءادىل تورە دەپ ايتار
بۇرماي بيلىك قىلعاندى.

اقىتتىڭ ءسوزىن كىم بۇزار،
بۇلبۇل قۇستاي سايراسا.
بەك سويلەسكەن ەكى دوس،
ايتقان سەرتتەن تايماسا.
ۋاعدالاسقان سەرتتەرىن
ورىنداۋدى ويلاسا.
ءتانىڭ كۇنگە كۇيمەيدى
التايعا ەلىڭ جايلاسا.
اققۋ قۇستار قالىقتاپ
وزەن - كولدە ويناسا.
كوكورايعا شالقىتىپ
بايلار بيە بايلاسا.

شىن جۇيرىكتەر سويلەيدى،
بايگەگە قوسقان اتتاي بوپ.
شەجىرەلەر شەرتەدى
عالىم جازعان حاتتاي بوپ.
قايىرسىز تۋعان ادامنىڭ
جاقىنى كەتەر جاتتاي بوپ.
ۇرى - زالىم سويلەيدى
تۇك كورمەگەن اقتاي بوپ.
حالىقتان العان وڭ باتا
قابىل بولسا ورالار
ءتاڭىرىم بەرگەن باقتاي بوپ.

جاقسىلار سويلەر شەشىلىپ،
جۇيرىكتەي قىزعان ەسىلىپ.
جامانعا تيىم ءسوز ايتسا
ەسىرىك كەتەر وشىگىپ.
ايرىلىپ كەتسە ەكى دوس
ساعىنار كوزى تەسىلىپ.

جورعالاي باسىپ قولىمىز،
قالامعا ءمىنىپ تايپالار.
شىن سۇيەر جارىن كورگەندەي
قاعازدى ءسۇيىپ ايقالار.

باعى تايسا ماڭدايدان
ەردىڭ قۇتى شايقالار.
پەندەنىڭ باقىت قۇشقانى
لەبىزىنەن بايقالار.
ەردىڭ قۇتى تايماسىن،
اعايىن كادىر شايماسىن.
جۇيرىك تۋعان تالاپتى ەر
بىرەۋدىڭ قويىن جايماسىن.
ەل قونىستان اۋماسىن،
كوكەكتە قار جاۋماسىن.
تالاپتانعان ەر جىگىت
بىرەۋدەن ساۋىن ساۋماسىن.
جۇرت جاقسىسى ولمەسىن،
جاماندىق ەلگە كەلمەسىن.
جاقسى كەتىپ جاماندار
دۇسپانعا ەرىك بەرمەسىن.
كوڭىلى اپتىق ەر جىگىت
قورلىق - زورلىق كورمەسىن.
جاقسى جىگىت جالعاندا
جامان قاتىن الماسىن.
ومىرىنشە قور بولىپ
وكىنىشكە قالماسىن.
قور قىزىنداي جاقسى قىز
جامانعا كۇنىن سالماسىن.
وسىلاردىڭ قامى دەپ
عارىپ اقىت زارلاسىن.

ەر جىگىتتەر سويلەيدى،
ەكپىنى زور داۋىلداي.
ايتقان ءسوزى بىلگەنگە
شيپالى ەم دارۋداي.
ەركىن سۇلۋ ەر جەتسە
جاڭا پىسقان قاۋىنداي.

كوكىرەكتەن شىققان كوسەم ءسوز،
قوينىڭداعى اقشاداي.
سىرى بىرگە شىنى دوس
جەمىستى باۋلى باقشاداي.
بەرەكە كوركى ەر جىگىت
ەل بيلەگەن پاتشاداي.
جومارت بايدىڭ داۋلەتى
ەل كوشەتىن ات شانا - اي.
شىن سۇلۋدىڭ سيپاتى،
ماساتى كىلەم تۇرىندەي.
ونى ساناپ ايتارعا
مەن كەلەمىن ۇلگىرمەي.
ەركىن جىگىت، جاقسى قىز
بايشەشەكتىڭ بۇرىندەي.
ەتى جۇمساق اق بولسا
اق ەرمەننىڭ گۇلىندەي.
جۇمىر بىلەك، جۇپار ءجۇز
دولانانىڭ تۇرىندەي.
وسىنداي سۇلۋ قۇشقان جان
ءومىرى وتەر سۇرىنبەي.
ەل ىشىندە ەڭسەلى
ەگەيلەردىڭ بىرىندەي.
ويلاپ تۇرساڭ دۇنيە كەڭ
جەتەرىڭ جالعىز تۇبىردەي.
وسىرسەڭ دە ونى، كەسسەڭ دە،
الەمگە قالار بىلىنبەي.
ەلگە ەتكەن ءىسىڭ جاسايدى
مىقان اعاش سەكىلدى
مىڭداعان جىلدار شىرىمەي.
سونداي ءبىر كەزگى ساتتەردە،
قاجىساڭ، تالىپ شارشاساڭ
باسىڭا پانا، جان تىنىس،
قوسىڭدا الار ءبىر تىنىس،
قوساعىڭ بولار پىرىڭدەي.
جىگىتتەر، تاپساڭ جاقسى جار،
جابىرقاتپاي، جاسىتپاي،
ايالاپ، كۇتىپ وتىڭدەر،
اۋليەنىڭ بىرىندەي.
كوڭىلىڭ تاپسا جاراسىم
وتەدى جالعان بىلىنبەي.
ماحابباتىڭ بولسا حوش،
بولماسا كوڭىلىڭ ورتا بوس.
يمانىڭ تولىق بولسا ەگەر
تىرشىلىكتە، اعالار،
العانىڭ بولسا اڭعارلى
اسىل سەرىك، اقىل دوس،
ءومىرىڭ وتەر بولىپ حوش
جايناعان جازدىڭ گۇلىندەي.

بارىنە سەرىك اقىلىڭ،
ەلگە سيعان ماقۇلىڭ.
ول دا مەرەي ادامعا
جاقسى بولسا جاقىنىڭ.
جامان بولسا جاقىنىڭ
تاۋسىلماس ءتىپتى عاپىلىڭ.
قاجىرىڭدى مۇقايدى
شابان ات، شارگەز قاتىنىڭ.
ساندالساڭ شارشاپ بەكەرگە،
ۇرىنارسىڭ كەسەلگە.
شۇكىرلىك قىلماس سۇم ءناپسى
بارعا قاناعات ەتەر مە؟
ەڭبەك قىپ تەرىن اعىزباي
مۇراتقا پەندە جەتەر مە؟!

بۇل كەڭەسىم جاستارعا،
بوزبالا بولعان ماستارعا.
قايراتتى تۋعان قايران ەر
قۇلشىلىعىن تاستار ما.
قۇلشىلىعى بار پەندە
كەسىرلى جۇمىس باستار ما؟
مۇراتىڭ بولسا بۇيداگەر
جەتەلەر بيىك اسقارعا.
ايتارىم اسىل، جىگىتتەر،
جىگىتتىككە ماس بولما،
جەتەلى ەرگە قاس بولما،
جەتەسىزگە دوس بولما،
ەرجەتكەندە جاس بولما.
كەلەكە، مىسقىل كوپ قۋىپ
مۇراتتى جانعا ءوش بولسا،
مۇراتسىزبەن حوش بولما،
كۇبىدەي ءتۇپسىز بوس بولما!
شاشىلىپ وندا قالاسىڭ،
سارساڭ بولىپ ساناتىڭ.
جارتى پۇلعا جاراماس
جاسىل قامقا ماناتىڭ.
كەلەكە مەن مىسقىلدان
پايدا جوق كىسىم تاباتىن.

كەڭەس جازدىم زارمەن تەڭ،
جوقتى تەڭەپ بارمەن تەڭ.
قالام السام قولىما
قالامىم جۇيرىك، دارمەن كەم.
تاۋسىلار ەمەس، اعالار،
ارمانىم الىس ايمەن تەڭ.
ايتارىمدى ۇقساڭ بالمەن تەڭ،
جايا، شەكەر، جالمەن تەڭ.
جامانعا ءسوزىم ەم بولماس
تىرشىلىگى مالمەن تەڭ.
شابانمەن شارشاپ كەلەمىن،
ارمانىم اسقار تاۋمەن تەڭ.
سوندا دا بۇلك - بۇلك جەلەمىن،
جوسىلعان جولىم جاپاندا
قىمتاعان قالىڭ قارمەن تەڭ.


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428