قازىرگى ورنىڭىز: تولعاۋلارى » تولىق مازمۇن

اباي قاسىموۆقا حات

قوسىلعان ۋاقىت:2016-02-22كورىلىمى:加载中

(1931 - جىلى موڭعۇليا حالىق رەسپۋبليكاسىنىڭ باينولگەي ايماعى اقبالشىق دەگەن جەرىندە جازىلعان)

اتىم اقىت ءور كەرەي،
تانيدى اركىم ءوزىمدى.
ءسوز سالمايمىن مايدانعا
التىنعا بالاپ جەزىمدى.
ءسوز اسىلى سول بولار
عيبىرات شىقسا سەزىمدى.
ازامات دەپ حات جازدىم
اسىلعا بالاپ ءوزىڭدى.

ناداندى ماقتاپ اسىرمان،
از سويلەمەي باسىلمان.
اتاسى جاقسى ارسىزدىڭ
جاقسى دەپ ءمىنىن جاسىرمان.
تاۋەكەلگە بەت قويسام
تاۋ مەن تاستان توسىلمان.
نادان وسەك قىلار دەپ
بەرەكەنى قاشىرمان.
اقىل - ويلى بىلگىشتەن
انىعىن بىلمەي باسىلمان.
اقىل - ويىڭ − ءبىلىم - دى،
ءبىلىم ءتۇبى − ءىلىم - دى.
بىلگەنىڭشە اسىق بول
جولعا قويماي جۇگىڭدى.

حالىق كەتەر جاتىرقاپ،
قيسىق ءىس قىلساڭ قىڭىرلاپ.
مايدانعا شىق ەر بولساڭ
نە قاجات بۇعىپ تىعىلماق؟!
قۇپيا سوزدەن نە پايدا
جەكە جەردە سىبىرلاپ.
اتاسى ناشار از اۋىل
ارمانمەن وتىر جىبىرلاپ.
موڭعۇل سويلەر حۇرىلداپ،
ورىس سويلەر شىرىلداپ.
قازاق بايقۇس جاتپاي ما
ۇيقىدا ءالى پىرىلداپ.
بەرەكەسى قاشقان جۇرت،
الا بولار ىرىلداپ.
كۇشتىنىڭ جاۋى ءوزى بوپ
ناشارى جىلار شىرىلداپ.
كۇشتىنى جىقساڭ تۇرماستاي
كوشكە كىم باس بوپ تۋىلماق؟!
جوسىلار جولىن تاپپاعان
ۇيلىعىپ قالعان شۋىلداق.
ءبىر كەزىڭنەن اسپاعان
الدى - الدىنا دۋىلداپ.
قويان جۇرەك قورقاق كوپ
ءوز ۇيىندە سويلەسە
جۇرەگى ۇشقان سۋىلداپ.
ىستەيمىز ەندى قالاي دەپ،
جۇما سايىن تالاي كەپ،
ساسىتار قۇلاق دۋىلداپ.

كوكتەۋ، كۇزەۋ، جايلاۋى،
قىستاۋى ەمەس سايلاۋلى.
قاڭباقشا كوشكەن تاسقىن ەل
مال بولىپ كەتكەن ايداۋلى.
عۇمىردىڭ ۇعار ما ول جايىن
ءبىر جىلدىڭ دا جوق بايلامى.

تاپتىڭ با بۇعان سونار جاي،
جايىلىپ ەلىڭ قونارداي؟!
بارىمتاسىز جاسار ما ەل
بىلەكتىگە تونالماي.
دۇنيە دۋ بوپ شاتتانسا
قازاق جاتىر ويانباي.
اتا زاڭىم دەپ سويلەر
ەسكى عۇرپىن قويا الماي.

ناداندىق ەسكى مىنەزبەن
جۇرسەڭ باسىڭ قور بولار.
قودىرايىپ قوقايساڭ
اركىمگە باسىڭ جەم بولار.
اقىلدى جان تىربانىپ
جاقىن جەردەن دوربالار.
اقىلسىز جان اپتىعىپ
الىسقا تالىپ زورلانار.
ميزام - زاكون - لي - حىۋىل
ويلاساڭ باسىڭ تەڭ بولار.

وياندى عالام وياندى،
قورقىتار اركىم قوياندى.
گۇل اشقانمەن قۇبىلىپ
دولانا بولماس توراڭعى.
بۇقپالاماي بۇيىعىپ
ەلدى وڭار كورسەت جوباڭدى.
ەستيمىن ەلدەن انىقسىز
اينالىپ باسقا سوراڭدى.
زامانا زاڭى وزگە دەپ
كوشىرە مە ەل قوراڭدى①.
ەۆروپا مەن ازيا
كۇتىپ تۇر ما بوراندى!
پاتشالاردا نە سىر بار
كىم تۋدى ودان جوعارى؟!

كورىپسىڭ ءبارىن ارالاپ
موڭعۇلعا كەپسىڭ جاعالاپ.
ءبىلىپسىڭ ءبارىن سارالاپ
ىستەرىڭ بارداي دارالاپ.
ءمىنىپسىڭ تۇلپار تاعالاپ
نە قىلماقسىڭ ساعالاپ؟!
ىزدەگەنىڭ ولجا ما،
وعان كىم بەردى جولداما.
ءجونىڭدى ايتشى جوسىلتىپ
ءجون ۇعۋ ەلگە جول - جورا.
ەستيمىن ەل دەپ ەريسىڭ،
ەسكى زاڭنان جەريسىڭ.
ەشكى ساۋعان كەدەيدى
قاي موشكەڭە تەليسىڭ؟!

سالماقسىڭ ەلگە نەنى ولجا؟
ولگەن مالدان تەرى ولجا.
جىلاۋلى ەلىڭ جىرعايتىن
تاپتىڭ با ەرەك كەن ولجا!

مەن بىلسەم ولجا عىلىم عوي،
عىلىم دەگەن ءبىلىم عوي.
اياق استى قور بولماي
قاتارعا كىرىپ ءجۇرۋ عوي.

بىزدە عىلىم كەندە عوي،
ساۋىقپاس ەلىڭ ەمدەمەي.
ەلىمنىڭ جايىن ويلاسام
ۇيقى بەرمەس كەرمەك وي.

ادامشىلىق قاي جاقتا،
كوز سالساڭشى جان - جاققا.
بەرەكە - بىرلىك قۇراساڭ
قۇت ورنايدى اۋماققا.

بەرەكە - بىرلىك − ارتىق ءىس،
بەرەكەسىزدىك − تانتىق ءىس.
كوپ اقىلى قۇرالسا
الا بولماي جۇرە السا
پاتشا دا امان ەل تىنىش.
بەرەكە قۇرار قاي قازاق،
كورسەت مەن دە سىنايىن.
ونەر ۇيرەت، ءبىلىم بەر
اباي، جانىم، شىراعىم.
ءوزىڭنىڭ ەلىڭ ەمەس پە
اينالساڭ دا الەم تۇراعىڭ.
كارى اعاڭدى كەلىپ كور
ەستىپ جۇرگەن قۇلاعىڭ.
ۇلاعاتىڭدى ۇقپاققا
ءجون - جايىڭدى سۇرادىم.

اسىعىستا از جازدىم،
ازىرقانباي بايقارسىڭ.
بەت كورىسۋ جاي - جاعىن
ءوزىڭ ءبىلىپ ايتارسىڭ.

اقىلى كامال، قاراعىم،
ۇعارسىڭ سالەم ءسابابىن.
ۇعىنساڭ سالەم ءسابابىن
تياناق تاۋىپ تىنامىن.

1931 - جىل


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428