قازىرگى ورنىڭىز: تولعاۋلارى » تولىق مازمۇن

قالام،سيا-كوز جاسى

قوسىلعان ۋاقىت:2016-02-22كورىلىمى:加载中

ءبىسمىللا بولار ءسوز باسى،
قالام، سيا − كوز جاسى.
كوڭىل كەلدى جەلپىنىپ،
قارا پەردە سەرپىلىپ،
از عانا كەڭەس قوزعاشى.

نەمەنە قوزعار كەڭەسىم،
بولماسا مەدەۋ دەمەسىن.
زامانانىڭ حال - جايىن
ءسىرادا كىمنەن كورەسىڭ.
جان جولداسىڭ − قاراۋىل
بارىندا كىمگە سەنەسىڭ.
ەسكى زامان، ەسكى ادام،
كىمدەر مۇنى ەلەسىن.
قىلت ەتسەڭىز سىلت ەتكەن،
كىمگە كوڭىل بەرەسىڭ!

جۇتاڭ زامان قالدى جاي،
جاداعاي بولىپ تاۋ مەن ساي،
عىلىمسىز جاندار جالتاقتاپ
قالتاقتاپ جۇرەر ءبي مەن باي.
بۇيتە بەرسە جوق بولار
ءوڭدى كيىم، سۇلۋ تاي.
قايعى، ۋايىم − ازىعىڭ
بۇرىن دا جەسەڭ جال مەن ماي.
جالعاننىڭ جايىن ويلاساڭ
كوڭىلىڭ بوسقا قالعانداي.
بولماساڭ دا شىن جەتىپ
ماعىريپاتقا نانعانداي.
زامان مۇنداي بولعان سوڭ
تۇرا ما جاستار قارمانباي.
بولماشى ىسكە كەكشيىپ
عالامات ءىس بۇل قانداي؟
زامانانىڭ تۇرىنە،
كوڭىل قويماي بىرىنە
قويا ما حالىق جاندانباي.

زامانىڭ كەلدى قىرلانىپ،
بوراندى بۇلتتاي سۇرلانىپ،
اۋرە بولعان از قازاق
ءاربىر ىسكە شىرمالىپ.
كوزى اشىق ويلى ازامات
وي ويلاندى تىربانىپ.
ءجۇرمىز ءماز بوپ ءبىز قازاق،
ماعىريپاتتان قۇر قالىپ.
ءبىز جاتىرمىز وزگە وياۋ
نەسىنە ءماز بوپ جىرعالىق.
جايىن جاتساق جاۋ تاياۋ
بەكەر بوسقا تۇرمالىق.
ۋاقىت − وتسە قايىرىلماس
قۇيرىعى جىلپىڭ ءبىر بالىق.
ۇيىقتاساق وزگە نە قىلماس،
ويانالىق، شىڭدالىپ.
وزگە حالىق نەعىپ تۇر
ولاردى دا تىڭدالىق.
زامانا قالاي اعىپ تۇر
تىم ناداندىق قىلمالىق.
ءتىسىن قايراپ جاۋىڭ تۇر
«مىقتىمىز» دەپ بۇلدانىپ.
جەر ەمشەگىن ەمگەن جۇرت
جازىلىپ بولدى − «قۇرجالىق».
ءوز بويىنا سەنگەن جۇرت
جىلدان جىلعا شىڭدالىپ.
ماعلۇماتقا جەتكەن ەل
سىدىرعىشتاي سىندالىپ.

ءبىز جايىنبىز جابىرقاۋ،
عاپىل - جاھىل سامىرقاۋ،
سۋعا تۇسكەن، كوككە ۇشقان
سوعان قاراپ تاڭىرقاۋ.
اڭدىپ تۇرعان ءار جۇرت بار
ءبارى دە ەمەس دەنى ساۋ.
كەز كەلگەندە ءتۇرتىپ قال
ۇيىقتاپ جاتسا مۇڭسىز تاۋ.
تالاپتانىپ وي ويلان
مىناۋ قالاي ياپىرىم - اۋ؟!
جاتقانمەنەن ورانىپ
قويمايدى ەكەن زامان جاۋ.
«ءشۋ» دەگەندە جۇرمەيتىن،
ءجۇر دەگەندى بىلمەيتىن،
بولىپ قاپپىز شابان - شاۋ.

وقىس قىلار تۇرالىق،
ءبىز دە ادامدىق قۇرالىق،
ۇيقى اشاتىن داۋانى
كورشىلەس ەلدەن سۇرالىق.
داۋا بەرسە ساۋىعىپ،
ونىمەن تاتۋ تۇرالىق.
بەرەكە قىلىپ باس قۇراپ،
ادامشىلىق قىلالىق.
بىلگەننەن اقىل ءبىز سۇراپ
باسىمىزدى قۇرالىق.
وسىنى ويلاپ بايقاستاپ،
وي ويلايىق قۋانىپ.
تالاپتىڭ جولىن قۋالىق،
ونەرلى ەلمەن جاناسىپ
ءمانىسىن بايقاپ ۇعالىق.
اقىل، تالاپ، وي، زەيىن
وقىعانعا بولار سەپ.
جالىندى جۇرەك، جاس تالاپ،
وتكىزبە ءومىر بوسقا تەك.
عىلىم - ءبىلىم − ماعىريپات
جامان دەسەڭ مەنى سوك.
الپىستان جاسىم اسىپتى
كۇنىم كەتكەن ۋايىم كوپ.
كۇن بۇرىننان قارماساڭ
بۋىنىڭ بەكەم بولار بەك.
ونەرگە تامان جارماسساڭ
كەتپەيدى جەكجات حاقىڭ جەپ.
قۇبىلسا زامان، سەن قۇبىل،
ءىس كەلەدى شۇپ - شۇعىل.
قيسايعاندى قىڭىرايتىپ
نەگە بولدىڭ سەن قۇزىر؟
دۇشپان كورسەڭ سىر ايتتىڭ
بولا المادىڭ جۇپ - جۇمىر.

ونەردى قايتىپ الاسىڭ،
جونىڭە قالاي باراسىڭ؟
ءوزىم نادان، ءوزىم قارت
تابا المايمىن شاراسىن.
ۇرى - زالىم قولىڭ تارت،
ازدىرما قازاق بالاسىن!
اتاڭ كەرەي اباق ەل
مۇندا بار ما تالاسىڭ؟
ءوز اراڭنان سوقسا جەل،
سوندا قايدا باراسىڭ!

اباق كەرەي اۋىلىم،
اتالاس تۋعان باۋىرىم.
ءور كەرەيدە بەيسى، ۋاڭ
وزىڭنەن شىقتى داۋيىڭ①.
ەلدىڭ بايقاپ جاي - كۇيىن
ادامشىلىق قىلساق دەپ،
ارداقتالىپ تۇرساق دەپ.
توماعالى حالىقپىز،
ەندى جەكە تۇرساق دەپ.
قازاق دەگەن ات الىپ
تىرشىلىك جولىن قۋساق دەپ.

ونەر عىلىم قايدا بار؟
قانداي ىستە پايدا بار؟
تىرشىلىك نەگە ايلانار؟
ىنتىماق قايتىپ بايلانار؟
بۇل زاماننىڭ حالقىندا
نەشە ءتۇرلى قايلا بار.
كەيبىرەۋ كوكتە ۇشىپ ءجۇر،
ۇشقان قۇستان پىسىق ءجۇر.
جەر بەتىمەن زىرىلداپ
سۋ استىنا ءتۇسىپ ءجۇر.
قايدا كورسەڭ قور قازاق
كوش ارتىندا كوشىپ ءجۇر.

ويان قازاق نامىستان،
ونەر ىزدە الىستان.
ۇيرەنىپ انىق بىلە الساڭ
سەن دە ەشكىمنەن قالىسپان.
باسەكە زامان كەز بولدى،
جاننىڭ ءبارى جارىسقان.
ۇيقىدان ويان تەز بول دەپ
تۇرەگەلىپ الىسقان.
قايلالى حالىق ارىستان،
قايلاسىز حالىق كورتىشقان.
ەلى مەن جەرىن قورعاۋعا
قاي - قايسىسى قارىسقان.

سەن دە قامدان باس كوتەر،
قامدانباساڭ باس كەتەر.
باياعىدان جاتتىڭ عوي
ەندى ويانساڭ نەڭ كەتەر!
ويانباي جاتساڭ بۇركەنىپ
باسقىن باسىپ مەڭدەتەر.
دەنەمەن وسەر كەتتى كۇن
ونەرمەن ەل ەرجەتەر.
ويانباي جاتساڭ قايتەيىن،
ۇيىقتاپ قالساڭ قاتتى ءمىن،
قاي دوسىڭ كەلىپ تەربەتەر؟

جان - جاعىڭا قاراشى،
نە ەكەن جۇرتتىڭ تالاسى!
جازىلمايتىن دەرتىڭ سول
كەمشىلىكتىڭ جاراسى.
بىلمەگەنگە بولار ما
ناداندىقتىڭ شاراسى.
جىگەر بوپ بويعا قونار ما؟
«قاراڭعى جاتقان حالىق» دەپ
دۇشپاننىڭ قىلعان تاباسى.

بۇل سوزدەن ءسىرا شوشىما،
قۇدايعا شۇكىر ءدىن جارىق،
قاراڭعىعا قوسىلما.
يمان انىق، نۇر جارىق
قاراڭعىلىق دەگەن سول،
ماعىريپاتتان قۇر قالىپ.
ماعىريپات دەگەن قانداي جول
كوڭىل قويىپ تىڭدالىق:
شويىن جولدا وت - اربا،
تەلەفونمەن ءسوز جالعا،
وت كەمە سۋدا ءجۇزىپ ءجۇر،
سەن دە بايقاپ جان قارما.
ارتىق سوزبەن قۇر بوسكەن
نە شارا بار ازعانعا!

تەلەگرام مەن تەلەفون
الىستان حابار الادى.
ايلىق جەرگە جىبەرسە،
سول مەزەتتە بارادى.
اتپەن جۇرسە نەشە كۇن
ارىقتاپ شارشاپ قالادى.
كورشى سونىڭ امالىن
عىلىممەن ىزدەپ تابادى.
ايشىلىقتىڭ حابارىن،
ءبىر ساعاتتا الادى.
راديو مەن اپپارات
الىستان تارتار ءسوزىڭدى.
ماگنيت پەن ەلەكتر
شىنداسا تارتار ءوزىڭدى.
وسىنى ۇيرەن دەگەن ءسوز
عافىلاتتان اش دەپ كوزىڭدى.
عافىلات باسقا تۇسكەن سوڭ
ءار جۇرت مۇنى سەزىندى.
جانىڭ كەيىپ كۇيگەن كۇن،
ءوزىڭ الىپ تاستارسىڭ
كونبەيتىن جەلكە بەزىڭدى.
ارمانداۋ مەن قارتايىپ
كورە الماي كەتتىم سول كۇندى.

ۇيىقتاپ جاتقان ءزىلدى باس،
ال، باسىڭا ءتيدى تاس.
جازعان باسىڭ جارىلسا
ەندى قايتىپ جازىلماس.
جالقاۋ مىرزا بولما ماس.
سىرىڭدى ءبىلىپ جان - جاقتان
اڭديدى سەنى تۇرعان قاس.
پايدا بەرمەس قۇر ماقتان،
قارا كوزدەن اقسا جاس.
تالاپ قىلىپ ءار جاقتان
ۇيرەنىپ ەلگە ونەر شاش.
نە پايدا بار ىرجاقتان
اقىلىڭ بولسا سونان قاش.
بىلگەندەر ايتىپ زار قاققان
«قور بولسا» دەپ «عازەز باس».
كوز جاس پەنەن جۇرەك قان
بۇعان سەنبەي بولدىڭ تاس.

كورسەت بار ما اقىلىڭ،
كىتاپتان كورگەن ناقىلىڭ.
كورمەدىك تە كونبەدىك
قىسقا دا امال تاقىلىن.
وزىمىزگە ەرمەدىك،
ەندى قايسى جاقىنىڭ.
اتاسى بولەك الىس جۇرت
ءبىلدى مە ەكەن اتا ۇلىن.
ادىراڭداپ بولما سىرت
ويلا شىراق اقىرىن.
اقىل تاۋىپ، وي ويلان
حالىق بولار قامىن قىل.
ۇقتىرايىن ءمىن قويما.
ۇقپاساڭ دا قىلما جەل.
ءبىراق ءومىر جەتەر مە
كۇنى تاياۋ سولار گۇل.
ۇعىلماي - اق كەتەر مە
سايراپ تۇرعان نە بۇلبۇل.
كوزى جوقپەن تەڭ ءوتتى - اۋ،
جۇيرىك پەنەن نە ءدۇلدۇل.

قاتەرلى زامان وقپەن تەڭ
بۇل ءسوزىمدى بايىم قىل،
نە بار ەكەن بۇل سوزدە
ۇعىنىپ جانىم قۇلاققا ءىل.
تۇزەلمەسەڭ بۇل تەزدەن
مەيلىڭ تاستا، مەيلىڭ ءبىل.
سوندا دا ويلا ادامدىق،
اڭ ەمەسسىڭ تۇزدەگى.
كەيىنگى جاس ۇرپاقتى
ءبىلىمدى جان قىلالىق.
اڭگىمە ءسوزدىڭ ءتۇيىنى
قامىن ويلا ەلىڭنىڭ
راس تا جامان ناداندىق
پەندەنىڭ ءۇمىت ۇزبەگى.
وڭاي ما ەكەن ولارعا
ءتارتىپ پەن اقىل تىزبەگى.

ونەر ىزدەپ قىل تالاپ،
شىن جۇرەكتەن ىنتالاپ.
جابىلىپ جاۋىڭ جان - جاقتان
جاقىنداپ قالدى قىلتالاپ.
جانىڭدى قورعاپ سەن ساقتان
جەل كىرگىزبەي تۇمشالاپ.
وقىساڭ عىلىم، ونەردى
بىلەسىڭ كەتەر - كەلەردى.
لايىق كورمە، جىگىتتەر،
بوسقا ءشىرىپ ولەردى.
ءار جۇرت بولىپ ۇمىتكەر
ىلگەرى شاۋىپ جونەلدى.
جەتكەننەن سوڭ بيىككە
ءبارى دە جۇرتپەن تەڭەلدى.
ىلىنگەن سوڭ ەلدىككە
كوزدەدى جوتا - بەلەڭدى.
ونى كورىپ بىلگىشتەر،
اقىل، قايرات بەرگىشتەر،
جۇرتقا سالدى ولەڭدى.

ەندى قازاق ۇيقىڭدى اش،
جاتقاننىڭ سورى ارىلماس.
سەل قاپتايدى تۇرا قاش،
جارىلادى - اۋ، قاشپاي باس،
وسى ماسىڭ قالاي ماس!

ۇيقىدان كوتەر باسىڭدى،
ونەرگە كوندىر جاسىڭدى.
سەنەن باسقا حالىقتىڭ
ۇيقىسى شايداي اشىلدى.
بەرەكەلى بەتىڭ جوق،
ورنىڭ جامان شاشىلدى.
كونبەيتۇعىن ارتىڭ جوق
ارتىڭ بىلسە باسىڭدى.
قويمادىڭ دا تويمادىڭ
قياناتشىل قاسىڭدى.
ايعىرمەن ات بوپ الىستىڭ
سول سەبەپتى اشىندى.

عىلىم - ءبىلىم ماعىريپات،
تىنىش جاتساڭ دا ۇعىپ جات،
ەل بىلگەنىن بىلسەڭىز،
قاتارعا كىرىپ جۇرسەڭىز،
بولارسىز سوندا كوڭىل شات.
ۇيدە جاتىپ بۇقپاڭىز،
پايداسىز تاعى شىقپاڭىز،
دۇنيە جۇرتتىڭ ءىسىن قىل
قۇلاققا ماقتا تىقپاڭىز.

ويان، ويان! وي ويلان،
ءسوز ءمانىسىن ۇقساڭىز.
ك. . . نەن ءتۇرتىپ وياتار،
جايىن جاتىپ بۇقساڭىز.
دوس از، دۇشپان كوپ بولىپ
سوندا قوسار قاتارعا،
كونبەيمىن دەپ شىقساڭىز.
ۇناي ما توپتان قاشساڭىز،
ابۇيىردى اشساڭىز.
ەلگە پايدا تيگىزىپ
عىلىمعا اياق باسساڭىز.
قاراڭعىلىق تاۋىنان
جارىققا تامان اسساڭىز.
مەن قالايدىڭ داۋىنان
اۋلاعىراق قاشساڭىز.
اۋرۋ كوپ جۇرت ساۋىنان
دەن ساۋلىققا باسساڭىز.
كەكىرەيگەن جۋاندىق
ول مىنەزدى تاستاڭىز.
جۋاندىق مۇنداي بولعاندا
نە بولادى باسقامىز؟!

بۇل ءىستىڭ نە شاراسى،
ونەر جەرىن قاراشى.
بەرەكە قىلىپ جۇم بولساڭ
قايران قازاق بالاسى.
ءىجدىھاتتا ءبىر بولساڭ،
بولادى كىمنىڭ تالاسى.
بولمايتىندى بولدىرار
ىشكى اقىلدىڭ شاراسى.
اعالىق اقىل قوندىرماس
عافىلات، جاھيل قاراسى.
ارتتا قالساڭ الاقتاپ
دۇشپاننىڭ قانار تاباسى.
ۇقتىرا الماي سالاقتاپ
قاڭعيدى جۇرتتىڭ اعاسى.
جۇمىرلانعان جۇم ەلدىڭ
امان جۇرەر جاعاسى.
بەرەكەسىز سۇم ەلدىڭ
حالقىن بايقاپ قاراشى.
ويلاپ تۇرسام جازىلماس
قايعىلى جۇرەك جاراسى.
سۇم باستاسا نە قىلماس
تومەنشىك بولسا ساناسى.
ءبىلىمدى ىسكەر ارلانباس،
بار بولسا ويلى داناسى.
باسقىن باسسا جان قالماس
كەلمەگەن سوڭ شاماسى.
«بىرىكپە» دەگەن قارعىس ءسوز،
ايتقان با اتا - اناسى.
قۋلىق - سۇمدىق ويلانىپ
جەڭدى مە جۇرەك قاراسى؟!
سەندەي حالىق نە ءتۇرلى
ەسەپتەن، بايقاپ قاراشى.
جازىلمايتىن دەرتىڭ سول
جالقاۋلىقتىڭ جالاسى،
كوڭىلىڭنىڭ الاسى،
ناداندىقتىڭ نالاسى.
التى ميلليون قازاق ۇلت
ءبىر اتانىڭ بالاسى.
بىتىراتقان ولاردى
كوڭىلىنىڭ الاسى.
ىرگەڭدەگى مىنا ورىس
ونىڭ دا تولدى باعاسى.
بەرەكە - بىرلىك قۇراسىپ،
بىلمەگەندى سۇراسىپ
جىرتىعىڭدى جاماشى.
اقىلعا جۇمىر بولساڭىز،
ادامدىققا تولساڭىز،
مىناۋ دا حالىق دەگەندەي
تولعانداي بولسا ورتاڭىز
بولادى كىمنىڭ تالاسى.

بوتەن سەنى جۇباتپاس،
ءسوزىڭدى ايتقان ۇناتپاس.
ءوزىڭدى ءوزىڭ قورعاڭىز،
سونىمەن دە توزدىق قوي
قوسىلماس قايناپ سورپاڭىز.
كونبەس، سونبەس مىنەز بار
وسىدان جامان قورقامىز.
اقىل تاۋىپ وي ويلان
قور بولمايدى بوي قورىعان.
ۇمتىلا باسىپ ويلاشى
«مەن دە ەشكىمنەن قور بولمان».
كورشىلەس جۇرتتان اقىل ال،
قاراسقانىن ماقۇل ال.
ادام قىلار پايداسىن
دۇشپان كورمە جاقىن ال.
تۇتاس تۇرىپ جۇمىر بول،
بىتىراپ كەتپە وڭ مەن سول.
تۇگەل ءجۇرىپ بەت قويساڭ
كەزىكپەي مە تابار جول.
تىلەك - جۇرەك ءبىر بولسا
تابىلاتىن اقىل مول.
نە تاباسىڭ ويلاشى
قاڭعىپ كەتسەڭ وڭدى - سول.
كورىنگەنگە تەلىم بوپ
بولمايمىسىڭ بوسقا قور.
تەلىم بولعان ناشارعا
كورىنگەننىڭ ءبارى زور.
باس - باسىنا قاڭعىرعان،
بىرىنەن - ءبىرى ايرىلعان
قازاققا بىتكەن قالىڭ سور.

قاڭعىساڭ يتشە تەلىم بوپ،
قورلىققا باسىڭ شەگىلمەك.
بەرەكە قىلساڭ ەڭبەكپەن
ىرگەڭ بەكىر ەرۋلەپ.

ويلاساڭ ۇلى ەلدىكتى،
قايدا دەسەڭ ەل قۇتى
مادەنيەت جولىنا
تۇسكەن حالىق كوندىكتى.
ەسىڭدى جيىپ ەرلەرشە
ءجۇرشى ءتۇزۋ جوندىكتى.
ءوز باسىڭدى ءبىر ويلا،
ارتقى قامىن مىڭ ويلا،
وزىنە - ءوزى جەتكەن جۇرت
جان جاعىنان كىرلىكتى.
وزىڭە تارلىق قىلماساڭ،
ىقىلاسىڭمەن تىڭداساڭ،
باسقا جانعا ءمىن قويما
ءوزىڭ تۇزە تىرلىكتى.

ۇقپاساڭ مۇنى كەتەرسىڭ،
مال بولماس كۇيگە جەتەرسىڭ.
ءبىر زاماندا ويلاساڭ
سوندا وكىنىش ەتەرسىڭ.
اقىل ايتسا كەڭكىلدەپ
سىرتىڭ جۋاس مەكەرسىڭ.
كەكەك - سەكەك ەتەم دەپ
ەل بۇلدىرگەن ەسەرسىڭ.
ۇساق قۋلىق - سۇمدىققا
قاپتىڭ ءتۇبىن تەسەرسىڭ.
ۇنەمدى جىلدىق اقىلعا
ويلامايتىن كەسەلسىڭ.
ءوز باسىڭ شىعىپ بۇلدىققا
كەممىن دەپ كىمنەن وسەرسىڭ.
ءبۇلدىرىپ الىپ «ءبىلدىم» دەپ
وڭاشا دا بوسەرسىڭ.
پەيىلدەنىپ بەل شەشىپ،
جۇرەكتەگى ءتۇيىندى،
جادىراپ قاشان شەشەرسىڭ؟!

ۇعىنىپ ۇمتىل، شىراعىم،
زامانعا ءتۇر قۇلاعىڭ.
ادامشىلىق الىستا
ويلا جولدىڭ جىراعىن.
عۇمىر وتەر بىلىنبەي،
مىسالى، ونىڭ ءبىر ساعىم،
ءتۇس كورىپ جاتقان تۇنىڭدەي،
ءومىر ءسۇرىپ تۇرماعىڭ،
ءبىر ساعاتتىق سۇم دۇنيە
سوندا دا نەشىك قىلماعىڭ.
ونەرىڭ بولسا وندىرەر
ۇستاساڭ سونىڭ ءبىر جاعىن.
زامان سەنى كوندىرەر
نەمەنە، وعان قىلماعىڭ؟
بىلسەڭ ءبىلدىڭ، ءىلىندىڭ،
ىلىنبەسەڭ ءسۇرىندىڭ.
اتاعىڭ جوق، اتىڭ جوق،
اتىڭ قالسا حاتىڭ جوق،
تۋدىم دەپ كىمگە ءبىلىندىڭ؟

ارى ويلا دا، بەرى ويلا،
تار ويلاماي، كەڭ ويلا.
ادامشىلىق قاتارعا
كىرەر جولدى سەن ويلا.
نەسيە - قامال ساتارعا
ەكى جۇرتتى تەڭ ويلا.
قۇمار بولساڭ جاتارعا
تويارعا عانا جەم بويلا.
قاراڭعى تاڭ اتارعا −
ناداندىققا ەم ويلا.
اقىلسىز، ويسىز، ءبىلىمسىز،
ادەپسىز، جاھىل − عىلىمسىز،
تاماعىڭ توق، قايعىڭ جوق
حايۋان مالشا ءجۇرىپسىز.
ءدىن، دۇنيەدەن بولىپ «توق»
قايعىسىز ءومىر ءسۇرىپسىز.

باسىڭا بىرەۋ سالسا شوق،
قايتىپ شىداپ تۇراسىز.
ايتقان سوزگە كونبەگەن
نادانعا نەشىك قىلاسىز!
ءاربىر ءسوزدى سويلەگەن،
قىزىل ءتىلىم بۋىنسىز.
جۇرەك كوڭىل بەرمەگەن
نادانعا نەگە جۋىرسىز؟
كەي كەزدەرى ءتۇڭىلىپ
دوستان داعى سۋىرسىز.
سۋىما كوڭىل جالىندا،
جۇقارما جۇرەك قالىڭدا،
سەنەن باسقا جان جوق پا
حاق ىسىنە تارىلما!
داۋلەت كورسەڭ قۋانىش
ابدەن حوش بوپ سالىنبا.
جولداس بولساڭ ۇلىق ءىس
ويى تەرەڭ عالىمعا.
ءبىر كەساپات بولار كەز
ءۇيىر بولساڭ زالىمعا.
توقتالسىن مۇندا وسى ءسوز،
ۇعىلۋى بولسىن تەز،
وتىرعان توپ قالىڭعا.

مۇنى جازدىم، جارانلار،
ءيىسى قازاق زاتىنا.
قازاق - كەرەي اقىنى
اقىت پاقىر اعاڭنىڭ،
نۇسقا قالسىن ارتىنا.
ءبىز دە بوسقا كەتەرمىز
بۇرىنعىنىڭ سالتىنا.
قازاقتان شىققان بىلگىشتەر
تاستادى ما ۇلگى حالقىنا؟!
جانىم كەيىپ كۇيەدى - اۋ،
وسىنداي ءىستىڭ پارقىنا.
قيلى - قيلى زاماننىڭ
ۋاقىت جەتتى شالقىما.
قايران ەلىم وقىپ ءجۇر،
كوڭىلىڭە توقىپ ءجۇر،
قالدىرعان ءسوزىم ارتىما.

1931 - جىل


评论加载中...

copyright © 2016 苏ICP备15062819号-1

哈萨克族伟大的思想家、阿肯-阿合提.乌鲁木基的网站 Tel:18792514428